فيديو: حل المسائل الكلامية بضرب أعداد في جدول الضرب

يأخذ طفل ٧ جنيهات كل أسبوع من أبويه. كم جنيهًا يحصل عليه الطفل في ٥ أسابيع؟

٠١:٥٢

‏نسخة الفيديو النصية

يأخذ طفل سبع جنيهات كل أسبوع من أبويه، فكم جنيهًا هيحصل عليه الطفل في خمس أسابيع؟

في المثال ده عرفنا إن عندنا طفل بياخد سبعة جنيه في الأسبوع الواحد، يعني سبعة جنيه كل أسبوع، فيا ترى كام جنيه هياخده في خمس أسابيع؟ دلوقتي إحنا عندنا في الخمس أسابيع الطفل هياخد سبعة جنيه كل أسبوع منهم، يعني هياخد سبعة جنيه خمس مرات. يبقى علشان نعرف هو هياخد كام جنيه، هنجيب حاصل ضرب خمسة في سبعة، يعني حاصل ضرب عدد الأسابيع اللي هو خمسة، في عدد الجنيهات إلى هياخذها الطفل في الأسبوع الواحد واللي هو سبعة. يا ترى حاصل ضرب خمسة في سبعة هيطلع كام؟

هنقدر نوجد حاصل الضرب باستخدام طريقة النماذج، يعني هنستخدم قطع العد؛ وهي عبارة عن دوائر، وهنحطّ سبع دوائر جنب بعض، وهيمثلوا السبع جنيهات اللي بياخدهم الطفل في كل أسبوع، وهنبدأ نعدّهم؛ وهنحطّ سبع دوائر تانيين، واللي هيمثلوا السبع جنيهات اللي هياخدهم الطفل في الأسبوع التاني؛ وهنكمل عد، وهكذا لحد الأسبوع الخامس.

وبكده هنلاقي إننا استخدمنا خمسة وتلاتين قطعة عد، لخمس صفوف كانوا بيمثلوا الخمس أسابيع، ولسبع دوائر كانوا بيمثلوا السبع جنيهات اللي هياخدهم الطفل في كل أسبوع؛ وبالتالي حاصل ضرب خمسة في سبعة هيساوي خمسة وتلاتين؛ يعني عدد الجنيهات التي يحصل عليها الطفل في خمس أسابيع هتساوي حاصل الضرب خمسة في سبعة، واللي لقينا إن هي بتساوي خمسة وتلاتين جنيهًا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.