فيديو: مقارنة الكسور

يوضح الفيديو كيفية المقارنة بين كسرَيْ وحدة عن طريق الرسم، مع أمثلة توضيحية.

٠٩:٣٨

‏نسخة الفيديو النصية

مقارنة الكسور.

هنعرف في الدرس ده إزاي نقدر نقارن بين كسرَي وحدة. يعني إيه كسرين وحدة؟ كسر الوحدة، زيّ ما عرفنا قبل كده، هو الكسر اللي بيمثّل جزء واحد من أجزاء الشكل المتطابقة. عشان نقدر نقارن بين كسرين، بنستخدم العلامتين دول: العلامة الأولى دي اسمها أكبر من. العلامة التانية، اللي هي دي، دي أصغر من. فلمّا نيجي نقارن بين الكسرين، بنشوف هل الكسر الأول أكبر من التاني، ولّا العكس الأول أصغر من التاني.

لو عندنا مستطيلين بنفس الحجم. واحد منهم مقسوم نصفين متساويين. ولوّنّا أحد النصفين دول. والتاني متقسّم لأربع أجزاء متطابقة. أخدنا أو لوّنّا جزء واحد من الأربع أجزاء دول. فبقى الجزء الملوّن هنا بيمثّل واحد على أربعة من الشكل، أو رُبع الشكل. لو بصّينا عَ الشكلين اللي قدامنا، وعايزين نقارن: يا ترى الجزء اللي بيمثّل واحد على اتنين من الشكل، أو نصف الشكل، هو اللي أكبر؛ ولّا الجزء اللي بيمثّل واحد على أربعة، أو رُبع الشكل، هو اللي أكبر؟ واضح من الشكلين إن الجزء اللي بيمثّل النصف، هو أكبر من الجزء اللي بيمثّل الرُّبع.

يبقى لو جينا نكتبها بشكل رياضي، عايزين نقارن الكسر اللي هو نصف، مع الكسر اللي هو رُبع. وهنبتدي المرة دي بالنصف. يا ترى نصف أكبر ولا رُبع؟ إحنا هنلاقي إن النصف أكبر من الرُّبع. فهنستخدم علامة أكبر من، اللي هي العلامة دي. لو ابتدينا المقارنة بالرُّبع، يعني بنشوف الرُّبع أكبر ولّا النصف. فإحنا عارفين إن النصف هو اللي أكبر. فبالتالي معناها إن إحنا عايزين نقول إن رُبع أصغر من نصف. يبقى هنستخدم العلامة دي، علامة أصغر من. ما ننساش شكل العلامتين. دي علامة أكبر من، ودي علامة أصغر من.

هنجيب صفحة جديدة ونشوف مع بعض مقارنات أخرى مع كسور أخرى. مطلوب مننا في السؤال ده نشوف الكسر الأكبر، ونعمل حواليه دايرة.

لو بصّينا لأول سؤال، هنلاقي عندنا دايرتين. دايرة مقسومة لجزئين متطابقين. ودايرة تانية مقسومة لتلات أجزاء متطابقة. لوّنّا جزء واحد من الدائرة اللي مقسومة لنُصين، اللي هو بيمثّل واحد على اتنين من الدائرة، أو نصف الدائرة. وفي الدائرة اللي جنبها لوّنّا جزء واحد من التلات أجزاء المتطابقة. فالكسر اللي عندنا بيمثّل جزء من تلات أجزاء متطابقة، أو تِلت الدائرة. يا ترى نصف أكبر ولّا التِّلت؟ واضح من الرسم إن نصف الدائرة، الجزء الملوّن بالأزرق ده، أكبر من تِلت الدائرة، اللي هو الجزء الملوّن باللون الأصفر. يبقى دلوقتي نقدر نعمل دائرة حوالين الكسر اللي هو نصف.

أمّا في السؤال التاني، فهنلاقي إن عندنا دائرة متقسّمة لأربع أجزاء متطابقة. ودائرة أخرى متقسّمة لِتَمن أجزاء متطابقة. لوّنّا في الدائرة الأولى جزء من الأربع أجزاء المتطابقة، وفي التانية جزء من التَّمن أجزاء المتطابقة. فالدائرة الأولى، الكسر اللي بيعبّر عن الجزء الملوّن هو رُبع، أو واحد على أربعة. أمّا الدائرة التانية، فالكسر اللي بيعبّر عن الجزء الملوّن فيها هو واحد على تمنية، أو تُمن. يا ترى رُبع أكبر ولّا تُمن؟ لو بصّينا عَ الدائرتين، هنلاقي إن الدائرة الأولى الجزء الملوّن اللي فيها أكبر من الجزء الملوّن في الدائرة التانية. يعني نقدر نستنتج من هنا إن رُبع أكبر من تُمن.

مطلوب مننا في السؤال رقم تلاتة وأربعة نقارن بين الكسرين، باستخدام علامة أكبر من، أو علامة أصغر من. لو بصّينا في السؤال رقم تلاتة، هنلاقي إن عندنا مستطيلين. كل مستطيل منهم متقسّم لمجموعة أجزاء متطابقة. المستطيل الأول متقسّم لأربع أجزاء متطابقة، مظلل منهم جزء واحد. فيبقى الكسر اللي بيمثّله: واحد على أربعة، أو رُبع الشكل. أمّا المستطيل التاني، فمتقسّم لتلات أجزاء، مظلل منهم جزء واحد. يعني الكسر اللي بيمثّله: واحد على تلاتة، أو تِلت الشكل. طب يا ترى رُبع الشكل هو أكبر ولّا تِلت الشكل؟ واضح من الرسم اللي قدامنا إن تِلت الشكل أكبر من رُبعه. فيبقى معناها إن لو جينا نقول رُبع أكبر من ولّا أصغر من تِلت، هنلاقي إن رُبع هو أصغر من تِلت. يبقى هنستخدم علامة أصغر من.

هنتنقل للسؤال رقم أربعة. هنلاقي عندنا شكلين. الشكل الأول عبارة عن مستطيل متقسّم لتَمن أجزاء متطابقة، مظلل منهم جزء واحد. يبقى الكسر اللي بيمثّل الجزء المظلل هو: واحد على تَمنية. يعني جزء من تَمن أجزاء متطابقة. أمّا المستطيل اللي جنبه، فهو متقسّم لعَشر أجزاء متطابقة، مظلل منهم جزء واحد بس. يعني الكسر اللي بيمثّله: واحد على عشرة، أو عُشر الشكل. طب يا ترى واحد على تمنية أو تُمن الشكل أكبر، ولّا عُشر الشكل؟ واضح من الرسم إن تُمن الشكل أكبر من عُشر الشكل. فيبقى هنستخدم علامة أكبر من. عشان واحد على تمنية أكبر من واحد على عشرة، أو تُمن الشكل أكبر من عُشر الشكل.

هنجيب صفحة جديدة ونكمّل مع بعض أمثلة تانية. مطلوب مننا نستخدم الرسم عشان نقارن بين الكسرين اللي عندنا، ونكتب علامة أكبر من أو أصغر من. أول سؤال عندنا بنقارن ما بين رُبع وتِلت. رُبع معناها دائرة متقسّمة لأربع أجزاء متطابقة. يعني اللي هي الدائرة اللي عندنا دي. ورُبع عبارة عن جزء واحد من الأربع أجزاء المتطابقة دي. أمّا تِلت، فعبارة عن دائرة متقسّمة لتلات أجزاء متطابقة، زي دي كده. وتِلت هو جزء من الأجزاء دي. يا ترى رُبع أكبر ولّا تِلت؟ من الرسم نقدر نقول إن تِلت أكبر من الرُّبع. معناها إن لو جينا نقارن وابتدينا بالكسر اللي هو رُبع، يبقى لازم نكتب علامة أصغر من. يعني رُبع أصغر من تِلت.

المرة دي في السؤال التاني، عايزين نقارن خُمس ورُبع. خُمس معناها إن الدائرة هتبقى متقسّمة لخَمس أجزاء متطابقة. وخُمس ده عبارة عن جزء واحد من الخَمس أجزاء المتطابقة دي. أمّا الرُّبع فبيمثّل جزء من أربع أجزاء متطابقة. طيب من خلال الرسم، يا ترى خُمس هو أكبر من ولّا أصغر من رُبع؟ واضح من الرسم إن رُبع أكبر من الخُمس. معناها إن خُمس أصغر. يعني نقدر نقول إن واحد على خمسة أو خُمس أصغر من رُبع.

في السؤال رقم تلاتة عايزين نقارن الكسرين تِلت وتُمن. تِلت ده عبارة عن جزء واحد من تلات أجزاء متطابقة. أمّا تُمن فعبارة عن جزء من تَمن أجزاء متطابقة. لو بصّينا على الشكلين اللي قدامنا، يا ترى تِلت أكبر ولّا تُمن؟ واضح إن تُلت أكبر من تُمن. يبقى هنستخدم علامة أكبر من. تِلت أكبر من تُمن.

في السؤال رقم أربعة، فإحنا بنقارن الكسر واحد على عشرة، أو عُشر؛ مع الكسر واحد على ستة، أو سُدس. واحد على عشرة أو عُشر عبارة عن جزء من عَشر أجزاء متطابقة، زي الشكل اللي عندنا ده. أمّا سُدس فعبارة عن جزء واحد من ستّ أجزاء متطابقة. طب يا ترى لو بصّينا عَ الشكلين، يا ترى سُدس أكبر ولّا عُشر؟ واضح من الرسم إن سُدس أكبر من عُشر. يبقى لو جينا نقارن وابتدينا بعُشر أو واحد على عشرة، يبقى لازم نستخدم علامة أصغر من. يبقى واحد على عشرة أصغر من واحد على ستة. يعني عُشر الشكل أصغر من سُدس الشكل.

عرفنا في الدرس ده إزاي نقدر نقارن بين كسرين باستخدام علامة أكبر من، وعلامة أصغر من.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.