فيديو: قراءة الوقت باستخدام الساعة التناظرية

أيُّ ساعة توضِّح توقيت السابعة إلا عشر دقائق؟ [أ] ساعة ١ [ب] ساعة ٢ [ج] ساعة ٣ [د] ساعة ٤ [ﻫ] ساعة ٥

٠٤:٤٣

‏نسخة الفيديو النصية

أيّ ساعة توضّح توقيت السابعة إلّا عشر دقائق؟

عاوزين نعرف أيّ ساعة من الخمس ساعات اللي قدامنا دول، بتوضّح الساعة سبعة إلّا عشر دقايق. فهنبدأ نشوف ساعة ساعة ونقراها، بعدين نعرف مين فيهم الساعة الصح ونختارها.

نيجي للساعة الأولى: ده هو عقرب الساعات اللي هو العقرب القصير، وده عقرب الدقايق. هنلاقي إن عقرب الساعات ما بين العشرة والحداشر؛ فده معناه إن الساعة عشرة، لسه ما جاتش حداشر. أمّا بالنسبة لعقرب الدقايق، فهنلاقيه بيبص عَ السبعة. يعني إيه بيبص عَ السبعة؟ يعني الساعة عشرة ونص وخمسة. ليه قلنا: «ونص وخمسة؟» لأن الستة هنا هي نص الساعة. طب لمّا نحط عليها الخمس دقايق دول؟ تبقى ونص وخمسة. فنقول: إن الساعة عشرة ونصف وخمسة. إيه الخمسة دي؟ اللي هي الخمس دقايق. ده كده بالنسبة للساعة الأولى، عرفنا نقراها إزاي؟ عشرة ونص وخمس دقايق. طبعًا مش هي الإجابة الصح؛ لأن عاوزين نعرف أيّ ساعة هي الساعة سبعة إلّا عشر دقايق.

طب تعالوا كده نشوف الساعة اللي تحتها. عقرب الساعات أهو محصور بين إيه؟ بين التسعة والعشرة، لسه ما عدّاش العشرة؛ فده معناه إن الساعة تسعة، تمام. طب بالنسبة لعقرب الدقايق؟ برضو على السبعة، فبرضو نقول: ونص وخمس دقايق. يبقى الساعة تسعة ونصف وخمس دقائق.

نيجي بقى للساعة التالتة، اللي عليها الدور. الساعة هنا إيه؟ هنيجي برضو أول عقرب نقراه عقرب الساعات، أهو محصور بين السبعة والتمنية، لسه ما وصلش للتمنية، أقرب للسبعة؛ يبقى الساعة سبعة، حلو جدًّا. سبعة وإيه بقى؟ أو سبعة إلّا إيه؟ نبص على عقرب الدقايق، هنلاقي عقرب الدقايق بيبص على الاتنين، يعني إيه بقى بيبص على الاتنين؟ هو لو مش عقرب الدقايق بيبص عَ الاتناشر، تبقى الساعة سبعة بالظبط؟ جميل. طب ولو بيبص عَ الواحد؟ كده زوّدنا خمس دقايق؛ تبقى الساعة سبعة وخمسة. طب لو بيبص عَ الاتنين؟ يبقى كده زوّدنا كمان خمس دقايق؛ يبقى الساعة سبعة وعشرة. فده معناه إن الساعة سبعة وعشر دقائق، مش هي الإجابة الصح؛ لأن إحنا عاوزين الساعة سبعة إلّا عشر دقايق.

طيب نشوف الساعة اللي عليها الدور، الساعة رقم أربعة، ونبص على عقرب الساعات، عقرب الساعات موجود بين إيه؟ بين السبعة والتمنية، لسه ما عدّاش التمنية. بس لو نلاحظ هنا إن عقرب الساعات قريب أوي من التمنية، وبعيد شوية عن السبعة؛ فده معناه إن الساعة قرّبت جدًّا إن هي تكون تمنية. يعني إيه قرّبت تكون تمنية؟ يعني قرّب عقرب الدقايق ده إنه يقف على الاتناشر. طب هو ناقص له قدّ إيه عشان يقف على الاتناشر؟ عقرب الدقايق موجود هنا، ناقص له خمس دقايق لحد هنا، وكمان خمس دقايق لحد هنا، خمسة وخمسة، يعني ناقص له عشر دقايق؛ يعني معنى كده إن ناقص عشر دقايق والساعة تبقى تمنية. يعني إيه ناقص عشر دقايق والساعة تبقى تمنية؟ ده معناه إن الساعة تمنية إلّا عشر دقائق.

عرفنا إزاي نقرأ الساعة؟ يعني لمّا عقرب الدقايق يكون موجود عند العشرة، فده معناه اللي هو ناقص العشر دقايق دول بس والساعة تبقى تمنية بالظبط؟ دي برضو مش هي الإجابة الصح. إحنا عاوزين سبعة إلّا عشر دقايق، مش تمنية.

نيجي لآخر ساعة، نبص على عقرب الساعات، موجود بين الستة والسبعة، قرّب أوي أوي أوي أوي من السبعة خلاص، قرّب يقف عليها بالظبط، ناقص له حتّة قدّ إيه عشان يوصل للسبعة؟ ناقص له الحتّة دي؛ خمسة وخمسة، اللي هي عشر دقايق. فده معناه إيه؟ ده معناه إن هنا الساعة سبعة إلّا عشر دقائق، وتبقى هي دي الإجابة المطلوبة، وهي دي الساعة اللي إحنا المفروض نختارها، واللي بتمثل سبعة إلّا عشر دقايق. العقرب بتاع الساعات قريب أوي من السبعة، أما عقرب الدقايق، فهو واقف على العشرة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.