تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مقارنة وترتيب الأعداد الصحيحة

أحمد لطفي

يوضح الفيديو كيفية مقارنة الأعداد الصحيحة وترتيبها باستخدام خط الأعداد.

٠٤:٠١

‏نسخة الفيديو النصية

هنتكلم عن مقارنة وترتيب الأعداد الصحيحة، وهنعرف إزاي هنقدر نقارن الأعداد الصحيحة ونرتبها. والعدد الصحيح هو أي عدد بينتمي لمجموعة الأعداد اللي مكتوبة قدامنا، وهنلاحظ إننا ممكن نستخدم خط الأعداد عشان نقارن ونرتب الأعداد الصحيحة.

لو عندنا مثال بالشكل ده، مطلوب نستبدل الدائرة اللي باللون الأصفر بإشارة أكبر من أو أصغر من؛ لتصبح اتناشر الدائرة اللي باللون الأصفر سالب أربعة جملة صحيحة، وبالتالي محتاج أقارن بين العددين الصحيحين اتناشر وسالب أربعة. في البداية هنرسم خط أعداد بالشكل ده، وهيكون عندنا العدد اتناشر والعدد سالب أربعة بالشكل ده، وهنلاحظ إن العدد اتناشر على يمين العدد سالب أربعة؛ وبالتالي اتناشر هتكون أكبر من سالب أربعة، يعني هنستبدل الدايرة اللي باللون الأصفر ونكتب مكانها إشارة أكبر من، وبالتالي اتناشر أكبر من سالب أربعة جملة صحيحة.

لو عندنا مثال آخر بالشكل ده، مطلوب نرتب الأعداد سالب تسعة، وستة، وسالب تلاتة، وصفر، من الأصغر إلى الأكبر. يبقى باستخدام خط الأعداد هيكون عندنا خط أعداد بالشكل ده، على خط الأعداد هنضع نقاط عند سالب تسعة، وستة، وسالب تلاتة، وصفر. وعشان نرتب الأعداد من الأصغر إلى الأكبر، يعني هنكتب الأعداد من اليسار إلى اليمين، وبالتالي الترتيب من الأصغر للأكبر هيكون سالب تسعة، سالب تلاتة، صفر، وستة. ويبقى كده قدرنا نرتب الأعداد من الأصغر إلى الأكبر باستخدام خط الأعداد.

لو عندنا مثال آخر بالشكل ده، يوضح الجدول اللاعبين في لعبةٍ ما ونتائجهم، مطلوب نرتب النتائج ترتيبًا تنازليًّا. عشان نقدر نرتب النتائج ترتيبًا تنازليًّا هنستخدم خط الأعداد، هيكون عندنا خط الأعداد بالشكل ده. هنمثل نتائج اللاعبين من داخل الجدول على خط الأعداد، هيكون عندنا ستاشر، وسالب حداشر بين سالب عشرة وسالب اتناشر، واتنين، وسالب تمنية، وسالب اتنين، وسالب تسعتاشر بين سالب تمنتاشر وسالب عشرين، وستة، وتمنتاشر. وعشان نرتب الأعداد ترتيبًا تنازليًّا، يعني هنرتبهم من اليمين إلى اليسار، وبالتالي ترتيب النتائج تنازليًّا هيكون: موجب تمنتاشر، موجب ستاشر، موجب ستة، موجب اتنين، سالب اتنين، سالب تمنية، سالب حداشر، وسالب تسعتاشر.

وبكده نكون قدرنا نرتب النتائج تنازليًّا باستخدام خط الأعداد. ويبقى في النهاية نكون عرفنا إزاي نقدر نقارن الأعداد الصحيحة ونرتبها باستخدام خط الأعداد.