تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مخطَّط الصندوق وطرفيه

أحمد مدحت

يوضح الفيديو التمثيل بالصندوق وطرفيه، وكيفية تفسير ومقارنة البيانات باستخدامه، مع أمثلة توضيحية.

٠٤:٤٦

‏نسخة الفيديو النصية

هنتكلم عن مخطط الصندوق وطرفيه.

في الفيديو ده هنعرف إيه هو مخطط الصندوق وطرفيه، وإزاي نمثل البيانات من خلاله، وكمان هنعرف إزاي نفسر البيانات لو عندنا تمثيل بالصندوق وطرفيه، وإزاي نقارن البيانات.

الشكل اللي عندنا عبارة عن تمثيل لمجموعة من البيانات بمخطط الصندوق وطرفيه، وبنستخدم في التمثيل بالصندوق وطرفيه خط الأعداد علشان نوضح انتشار مجموعة من البيانات. من خلال إن إحنا بنرسم صندوق حوالين قيم الرُّبَيعين، وهم الرُّبيع الأدنى والرُّبيع الأعلى، وبيمتد من الصندوق ده طرفين بيبقوا عبارة عن خطين بيوصلوا ما بين الرُّبَيعين والقيم القصوى للبيانات، اللي هي القيم العظمى والصغرى، بشرط ما تكونش قيم متطرفة، طرف منهم بيوصل ما بين القيمة الصغرى للبيانات والرُّبيع الأدنى، والطرف التاني بيوصل ما بين الرُّبيع الأعلى والقيمة العظمى لمجموعة البيانات. فمثلًا لو عندنا مجموعة البيانات، ميتين وعشرة، وتلتمية، وستمية، وستمية وعشرين، وسبعمية، وتسعمية وخمستاشر، وعايزين نمثلها بمخطط الصندوق وطرفيه؛ فأول خطوة هنعملها إن إحنا هنرسم خط أعداد بيحتوي على القيمتين العظمى والصغرى للبيانات، زي ما هيظهر لنا، في الخطوة التانية هنحدد القيم القصوى والوسيط والرُّبيع الأدنى والرُّبيع الأعلى على خط الأعداد. فبالنسبة لمجموعة البيانات اللي عندنا هنلاقي إن القيمة الصغرى، وهي ميتين وعشرة، أما القيمة العظمى فهي تسعمية وخمستاشر، أما الوسيط لمجموعة البيانات، فهيبقى عبارة عن الوسط الحسابي للقيمتين ستمية، وستمية وعشرين، ومكانه هيكون بينهم. بعد كده هنلاقي الرُّبِيع الأدنى هو تلتمية، أما الرُّبيع الأعلى فهو سبعمية. كده إحنا أوجدنا القيم اللي إحنا عايزينها، هنبدأ نحددها على خط الأعداد زي ما هيظهر لنا.

في الخطوة التالتة هنرسم الصندوق وطرفيه، الصندوق هنرسمه حوالين الرُّبَيعين زي ما هيظهر لنا. بعد كده هنرسم الطرفين؛ الطرف الأول هيوصل ما بين القيمة الصغرى والرُّبيع الأدنى، والطرف التاني هيوصل ما بين الرُّبيع الأعلى والقيمة العظمى.

بكده يبقى إحنا مثّلنا مجموعة البيانات اللي عندنا بالصندوق وطرفيه. بعد ما مثّلنا البيانات اللي عندنا، هنلاحظ إن التمثيل بالصندوق وطرفيه قسّم البيانات لأربع أجزاء. وعلى الرغم من إن الأجزاء دي مختلفة في الطول، لكن كل جزء منها بيحتوي على ربع البيانات. كمان هنلاحظ إن كل ما هيزيد طول الصندوق أو طول طرفيه، مدى البيانات هيزيد؛ في حين إن الطرف القصير أو الصندوق القصير بيدل على إن المدى بتاع البيانات قليل. كمان هنلاحظ إن الشكل اللي عندنا فيه نجمة، والنجمة دي بتدل على القيم المتطرفة اللي إحنا ما بنوصلهاش بالأطراف.

بعد كده هنشوف مثال نوضح بيه إزاي نفسر البيانات. عندنا في المثال تمثيل بالصندوق وطرفيه، وعايزين نعرف علام يدل طول الصندوق وطرفيه في التمثيل اللي عندنا.

بالنسبة للتمثيل اللي عندنا، هنلاقيه بيبين إن البيانات بين الوسيط والرُّبيع الأعلى أقصر تباعد وانتشار من البيانات اللي بين الوسيط والرُّبيع الأدنى. وكمان بما إن الطرف الأيمن أطول من الطرف الأيسر، فهتبقى البيانات الأكبر من الرُّبيع الأعلى أكثر تباعد وانتشار من البيانات اللي أقل من الرُّبيع الأدنى. بكده إحنا فسرنا البيانات اللي عندنا، بعد كده هنشوف من خلال مثال إزاي نقارن البيانات لما يبقى عندنا تمثيل مزدوج بالصندوق وطرفيه.

عندنا في المثال تمثيل مزدوج بالصندوق وطرفيه، بيوضح أطوال مجموعة من الأطفال الرضع اللي أعمارهم متساوية من الجنسين بنين وبنات، وعايزين نستخدم التمثيل ده علشان نقارن بين أطوال كلا الجنسين.

من خلال التمثيل اللي عندنا، هنلاقي بصورة عامة إن البنات أقصر من البنين، كمان هنلاقي إن الرُّبيع الأعلى للبنات هو سبعة وستين سنتيمتر، وده معناه إن أطوال خمسة وسبعين في المية من البنات هو سبعة وستين سنتيمتر أو أقل؛ في حين إن الرُّبيع الأدنى للبنين هو ستة وستين سنتيمتر، وده معناه إن أطوال خمسة وسبعين في المية من البنين هو ستة وستين سنتيمتر أو أكتر. وكده يبقى إحنا قارنّا بين أطوال البنين والبنات.

بكده يبقى إحنا في الفيديو ده عرفنا إيه هو مخطط الصندوق وطرفيه. وعرفنا إن إحنا بنستخدم التمثيل بالصندوق وطرفيه عشان نوضح انتشار مجموعة من البيانات، وكنا بنتستخدم خط الأعداد علشان نبين الانتشار ده؛ بحيث إن إحنا بنرسم صندوق حوالين قيم الرُّبَيعين اللي هم الرُّبيع الأدنى والرُّبيع الأعلى، وبيبقى عندنا طرفين عبارة عن خطين بيوصلوا ما بين الرُّبَيعين والقيم القصوى للبيانات، اللي هي القيم العظمى والصغرى، بشرط إن القيم دي ما تكونش قيم متطرفة. وعرفنا كمان إن التمثيل بالصندوق وطرفيه بيِقسم البيانات لأربع أجزاء؛ كل جزء بيحتوي على ربع البيانات. وعرفنا كمان إن كل ما زاد طول الصندوق أو طول طرفيه، مدى البيانات بيزيد؛ في حين إن الطرف القصير أو الصندوق القصير بيشير إلى إن مدى البيانات قليل. بعد كده عرفنا إزاي نستخدم التمثيل بالصندوق وطرفيه في تفسير البيانات، وإزاي نستخدم التمثيل المزدوج في مقارنة البيانات.