فيديو: طرح الأعداد المتعدّدة الأرقام

أحمد لطفي

يوضِّح الفيديو طريقة طرح الأعداد المتعدّدة الأرقام.

٠٨:٥٤

‏نسخة الفيديو النصية

هنتكلّم عن طرح الأعداد متعدّدة الأرقام.

وهنعرف إزّاي هنقدر نطرح عدد مكوّن من أكتر من رقم. في البداية، طرح الأعداد متعدّدة الأرقام هي نفس فكرة جمع الأعداد متعدّدة الأرقام، لكن فيه بعض الاختلافات. مثلًا لو جيت قُلت: خمسة زائد اتنين هيساوي سبعة، ممكن أقدر أستخدم خاصية الإبدال، وأقول: إن اتنين زائد خمسة هتساوي أيضًا سبعة. لكن لو جينا قلنا: خمسة ناقص اتنين هتساوي تلاتة، ما أقدرش أقول: إن اتنين ناقص خمسة هتساوي نفس العدد. لأن اتنين ناقص خمسة، أنا كده بطرح عدد كبير من عدد صغيّر. وبالتالي مش هنعرف نطرح عدد كبير من عدد صغيّر. يبقى أهمّ حاجة في الطرح هي ترتيب الأعداد. يعني ما أقدرش أستخدم خاصية الإبدال في الطرح.

لو عايزين نشوف إزّاي هنقدر نطرح عددين مكوّنين من أكتر من رقم من بعض. مثلًا هناخد مثال: عايزين نجيب ناتج خمسة وأربعين ناقص اتناشر.

عشان نقدر نطرح اتناشر من خمسة وأربعين، هنكتبهم في صورة رأسية، يعني بالشكل ده. هنكتب خمسة وأربعين بالشكل ده. وهنكتب اتناشر بالشكل ده. بحيث إن خمسة، اللي في خانة الآحاد، يكون تحتها اتنين في خانة الآحاد. وأربعة في خانة العشرات يكون تحتها الواحد اللي في خانة العشرات. ونبدأ نطرح. نحطّ إشارة الطرح. في البداية، عندنا خانة الآحاد، هنطرحها في الأول. خمسة ناقص اتنين هيساوي تلاتة. وبعدين هنطرح الأرقام اللي في خانة العشرات. أربعة ناقص واحد هيساوي تلاتة. ويبقى كده قدرت أحصل على ناتج طرح خمسة وأربعين ناقص اتناشر. يبقى خمسة وأربعين ناقص اتناشر هيساوي تلاتة وتلاتين.

لو عايزين ناخد مثال آخر، في صفحة جديدة. عايز أطرح تسعمية خمسة وتلاتين ناقص سبعة وعشرين.

في البداية، عشان نقدر نوجد ناتج تسعمية خمسة وتلاتين ناقص سبعة وعشرين، هنكتب العددين تحت بعض في صورة رأسية بالشكل ده. تسعمية خمسة وتلاتين، وسبعة وعشرين. وهنحطّ إشارة الطرح. وهنبدأ نطرح. أول حاجة هنطرح الأرقام اللي في خانة الآحاد، يعني خمسة ناقص سبعة. مش هنعرف نطرح عدد كبير من عدد صغيّر. يبقى محتاج أستلف واحد من التلاتة اللي جنب الخمسة.

عشان أقدر أستلف واحد، محتاجين نعبّر عنها بصورة مختلفة. هنكتب تسعمية خمسة وتلاتين في صورة خمسة، زائد تلاتين، زائد تسعمية. عشان نقدر نستلف واحد من التلاتة اللي خانة العشرات، هنكتبها في صورة: عشرة زائد عشرين. وبالتالي تسعمية خمسة وتلاتين هتساوي خمسة، زائد عشرة، زائد عشرين، زائد تسعمية. هاخد خمسة زائد عشرة مع بعض، والعشرين هكتبها لوحدها، والتسعمية هكتبها زيّ ما هي. يبقى تسعمية خمسة وتلاتين هتساوي خمستاشر، زائد عشرين، زائد تسعمية.

يبقى أنا كده خلّيت عندي في خانة الآحاد خمستاشر. وخانة العشرات فيها اتنين، اللي هي بمثّلها بعشرين. وخانة المئات فيها تسعة، اللي هي بمثّلها بتسعمية. يبقى أنا لمّا استلفت واحد من التلاتة اللي في خانة العشرات بقت اتنين. وبعد ما استلفت الواحد من خانة العشرات، خانة الآحاد بقى فيها خمستاشر بدل ما كان فيها خمسة. وخانة المئات زيّ ما هي، فيها تسعة. يبقى هنشطب عَ التلاتة، وهنكتب فوقيها اتنين. وهنشطب عَ الخمسة، وهنكتب فوقيها خمستاشر.

وبكده هنطرح خمستاشر ناقص سبعة. خمستاشر ناقص سبعة هتساوي تمنية. وهنبدأ نطرح الأرقام اللي في خانة العشرات من بعض. فبقى عندنا اتنين ناقص اتنين. اتنين ناقص اتنين في خانة العشرات هتساوي صفر. وآخر حاجة خانة المئات. سبعة وعشرين، هنلاقي ما فيش رقم في خانة المئات. معنى كده إن مكان خانة المئات فيه صفر. وبالتالي هنقول: تسعة ناقص صفر هيساوي تسعة. يبقى تسعمية خمسة وتلاتين ناقص سبعة وعشرين هيساوي تسعمية وتمنية.

في صفحة جديدة، هناخد مثال آخر. مثلًا عايز أوجد ناتج تسعمية سبعة وعشرين ناقص تسعة وستين.

فهكتب العددين في صورة رأسية تحت بعض بالشكل ده. تسعمية سبعة وعشرين، وتسعة وستين. وهحطّ إشارة الطرح، وهنبدأ نطرح. في البداية، هنطرح الأرقام اللي في خانة الآحاد من بعض. عشان نطرح سبعة ناقص تسعة، مش هنعرف نطرح عدد كبير من عدد صغيّر. يبقى محتاج أستلف واحد من الاتنين اللي في خانة العشرات، اللي في العدد تسعمية سبعة وعشرين. لمّا أستلف واحد مِ الاتنين، الاتنين هتبقى واحد. والسبعة اللي في خانة الآحاد هتبقى سبعتاشر. وبالتالي بقت عملية الطرح سبعتاشر ناقص تسعة، هتساوي تمنية.

وبعدين هنطرح الأرقام اللي في خانة العشرات. عندنا واحد ناقص ستة، مش هنعرف نطرح عدد كبير من عدد صغيّر. يبقى محتاج أستلف واحد من التسعة اللي في خانة المئات اللي في عدد تسعمية سبعة وعشرين. عشان أستلف واحد من التسعة اللي في خانة المئات، التسعة هتبقى تمنية، والواحد اللي في خانة العشرات هيبقى حداشر. وبالتالي عملية الطرح هتكون حداشر ناقص ستة، هتساوي خمسة. وبعدين هنطرح الأرقام اللي في خانة المئات. عندنا تمنية. وخانة المئات في العدد تسعة وستين هتكون صفر. وبالتالي تمنية ناقص صفر هيساوي تمنية. يعني تسعمية سبعة وعشرين ناقص تسعة وستين هيساوي تمنمية تمنية وخمسين.

آخر مثال: عايزين نوجد ناتج خمسمية وتلاتة ناقص ستاشر.

هكتب العددين تحت بعض في صورة رأسية بالشكل ده. خمسمية وتلاتة، وستاشر. وهكتب إشارة الطرح، وأبدأ أطرح. في البداية، هطرح الأرقام اللي في خانة الآحاد. تلاتة ناقص ستة، مش هنعرف نطرح عدد كبير من عدد صغيّر. يبقى محتاج أستلف واحد من الرقم اللي في خانة العشرات، اللي في خمسمية وتلاتة. هلاقي الرقم اللي في خانة العشرات في خمسمية وتلاتة هو صفر. يبقى مش هعرف أستلف منه واحد. يبقى محتاج أستلف واحد للصفر من الرقم اللي في خانة المئات. يعني الرقم اللي في خانة المئات بدل ما هيكون خمسة هيبقى أربعة. ويبقى الرقم اللي في خانة العشرات هيبقى عشرة.

وبالتالي دلوقتي هقدر أستلف واحد من العشرة اللي في خانة العشرات. يبقى العشرة اللي في خانة العشرات هتكون تسعة. والتلاتة اللي في خانة الآحاد هتبقى تلتاشر. تلتاشر ناقص ستة هيساوي سبعة. وبعدين هنطرح الأرقام اللي في خانة العشرات. تسعة ناقص واحد هيساوي تمنية. وبعدين هنطرح الأرقام اللي في خانة المئات. عندنا ستاشر، خانة المئات فيها هيكون صفر. فهيبقى أربعة ناقص صفر هيساوي أربعة. يبقى خمسمية وتلاتة ناقص ستاشر هيساوي ربعمية سبعة وتمانين.

وبكده نكون عرفنا إزّاي نقدر نطرح أعداد متعدّدة الأرقام.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.