فيديو: مقارنة الكسور ذات المقامات المختلفة

أكمل: ٦/١ >_. [أ] ٧/٦ [ب] ٨/٥ [ج] ٢٨/٢٣ [د] ٢٩/٣

٠٧:٤١

‏نسخة الفيديو النصية

أكمل: سُدس أكبر من: ستة على سبعة، ولّا خمسة على تمنية، ولّا تلاتة وعشرين على تمنية وعشرين، ولّا تلاتة على تسعة وعشرين؟

عاوزين نقارن السدس بالأربع اختيارات اللي قدامنا دول، ونشوف هو أكبر من أيّ اختيار فيهم. السؤال ده حلّه طويل شوية، بس سهل جدًّا. الفكرة فيه اللي إحنا هنعمل إيه؟ هنمسك اختيار اختيار، ونقارن ما بينه وما بين السُّدس. هنيجي جنب الستة على سبعة، ونكتب سدس. ونشوف هل السدس أكبر من الستة على سبعة ولّا لأ.

طيب علشان نعرف نقارن ما بينهم، لازم المقامات تكون زي بعض. إيه المقامات دي؟ اللي هي العدد اللي موجود تحت شرطة الكسر؛ السبعة والستة. لازم في الكسر الأولاني يكون العدد اللي موجود تحت شرطة الكسر زي العدد اللي موجود تحت شرطة الكسر في الكسر التاني. يعني إيه؟ أو نعمل ده إزاي؟ هنيجي على السبعة اللي هنا، نضربها في ستة. ونيجي على الستة اللي هنا، نضربها في سبعة. ليه عملنا كده؟ عشان يبقى العدد اللي تحت اتنين وأربعين في الكسر الأولاني زي الكسر التاني. مش ستة في سبعة هي سبعة في ستة؟ طيب تعالوا نشوف كده هيبقى شكله عامل إزاي.

الكسر الأول؛ تحت ضربنا السبعة في ستة اتنين وأربعين. طب هو إحنا ينفع نضرب تحت وما نضربش فوق؟ لأ طبعًا، يبقى زي ما ضربنا تحت في ستة، نضرب فوق في ستة. تبقى الستة في ستة بستة وتلاتين. يبقى إحنا كده عملنا أول كسر ستة عَ السبعة، حطّيناه في صورة ستة وتلاتين على اتنين وأربعين. نيجي للكسر التاني، اللي هو السدس. تحت فيه إيه؟ ستة في سبعة. ستة في سبعة باتنين وأربعين، طيب. ضربنا تحت في سبعة، يبقى نضرب فوق في سبعة، زي اللي عملناه تحت نعمله فوق، الواحد في سبعة بسبعة. كده بقى سهل جدًّا نقارن بينهم؛ لأن عندنا المقامات زي بعض؛ هنا اتنين وأربعين، وهنا اتنين وأربعين. نبص بقى عَ البسط، أو العدد اللي فوق؛ ستة وتلاتين وسبعة. الستة وتلاتين هي الكبيرة، يبقى الكسر ده هو الكبير؛ ستة وتلاتين على اتنين وأربعين. يبقى مش دي الإجابة اللي صح؛ عشان الإجابة اللي إحنا عاوزينها، عاوزين الكسر ده هو اللي يبقى الكبير، اللي هو السدس. يبقى كده هنلغي الاختيار الأول، ونشوف الاختيار اللي بعده.

هنقارن خمسة على تمنية بالسدس. عندنا هنا تحت في الكسر الأولاني، فيه تمنية، وهنا فيه ستة، يلّا نخلّيهم زي بعض، نعمل إيه؟ نضرب تمنية في ستة، ونضرب الستة في تمنية؛ بنعكس. تمام. يلّا نشد شرطة كسر، ضربنا هنا التمنية في ستة بتساوي تمنية وأربعين، ضربنا تحت في ستة، يبقى نضرب فوق في ستة. الخمسة في ستة بتلاتين. يلّا نروح الكسر اللي بعده، تحت ستة في تمنية، برضو تمنية وأربعين. نضرب فوق في إيه؟ في تمنية؛ عشان ضربنا هنا في تمنية، واحد في تمنية بتمنية. تعالوا نقارن كده؛ إحنا قلنا خلاص دي بقت تمنية وأربعين وتمنية وأربعين، ملناش دعوة بيهم. نبص عَ الأعداد اللي فوق؛ هنا تلاتين، وهنا تمنية. يبقى برضو الكسر ده هو الكبير، مش التمنية على تمنية وأربعين اللي هي اختصارها سدس. يبقى برضو الاختيار ده مش هو اللي صح.

نشوف الاختيار اللي بعده؛ تلاتة وعشرين على تمنية وعشرين، هنقارن ما بينها وما بين السدس. هنا مش هنعرف نخلّي الأعداد اللي تحت شرطة الكسر زي بعض؛ اللي هم التمنية وعشرين والستة. طب تيجوا نخلّي الأعداد اللي فوق هم اللي زي بعض؟ يعني نخلّي زي ما هنا فيه تلاتة وعشرين، نخلّي الواحد ده هو كمان تلاتة وعشرين؟ طيب هنعملها إزاي؟ هنضرب الواحد في تلاتة وعشرين، يبقى إيه؟ عندنا الكسر الأولاني ما جراش فيه حاجة، اللي هو تلاتة وعشرين على تمنية وعشرين. هنسيبه زي ما هو، ونغيّر في الكسر التاني. ضربنا الأعداد اللي فوق؛ واحد في تلاتة وعشرين بتلاتة وعشرين. زي ما ضربنا فوق نضرب تحت، فنخلّي الستة برضو في إيه؟ في تلاتة وعشرين. الستة في تلاتة وعشرين بمية تمنية وتلاتين. طيب كده إحنا عندنا كسرين، الكسرين الأعداد اللي فوق بتاعتهم شبه بعض بالظبط. يبقى نقارن بين الأعداد اللي تحت شرطة الكسر. لمّا بنيجي نقارن بين الأعداد اللي موجودة تحت، بنعكس الدنيا. يعني إيه بنعكسها؟ يعني بنخلّي العدد الكبير هو اللي كسره صغير، والعدد الصغير هو اللي كسره كبير. فده معناه هنا إن التمنية وعشرين أكبر من المية تمنية وتلاتين؛ لأنهم موجودين إيه؟ تحت. فده معناه إن الكسر ده، اللي هو بيمثّل السدس، أصغر من الاختيار بتاعنا. فده معناه إن الاختيار ده كمان مش هو اللي صح.

فننتقل لآخر اختيار؛ تلاتة عَ التسعة وعشرين، نحط جنبه السدس، ونبدأ. مش هنعرف نخلّي برضو التسعة وعشرين والستة، اللي هي الأعداد اللي تحت شرطة الكسر زي بعض، بس نعرف نخلّي الأعداد اللي فوق زي بعض. هنا تلاتة وواحد، عايزين نخلّي الواحد ده تلاتة، فنضربه في إيه؟ في تلاتة. ننقل الكسور بتاعتنا؛ تلاتة على تسعة وعشرين ما عملناش فيه حاجة الكسر ده. والكسر التاني ضربنا فوق الواحد في تلاتة بتلاتة. ينفع نضرب فوق وما نضربش تحت؟ لأ، يبقى برضو نضرب تحت في تلاتة، زي ما عملنا فوق. تلاتة في ستة، أو الستة في تلاتة، بتساوي تمنتاشر. يبقى نكتب تحت هنا إيه؟ تمنتاشر. إحنا قلنا في الكسور لمّا نقارن بين الأعداد اللي تحت، بنقارن … الدنيا بتكون معكوسة، يعني إيه؟ الكبير صغير والصغير كبير. طيب إحنا عندنا تحت تسعة وعشرين وتمنتاشر، يبقى الكبير هو التمنتاشر، مش التسعة وعشرين. يبقى ده معناه إن الكسر ده هو الكبير. والكسر ده، اللي هو إيه أصلًا كان أصله إيه؟ سدس. فده معناه إن الاختيار ده، اللي هو تلاتة على تسعة وعشرين ده، هو ده الاختيار الأصغر من السدس. يبقى عرفنا كده الاختيار الصح هو إيه؟ تلاتة على تسعة وعشرين.

فالفكرة في السؤال هنا إننا بنخلّي الكسور يا فيها الأعداد اللي تحت قدّ بعض، يا الأعداد اللي فوق قدّ بعض؛ عشان نقارن ما بينهم ونشوف مين الصغير ومين الكبير. ولمّا عملنا ده وقارنّا، لقينا إن الكسر تلاتة على تسعة وعشرين هو اللي أصغر من الإيه؟ السدس. فتبقى الإجابة النهائية هنا تلاتة على تسعة وعشرين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.