فيديو: حل المسائل الكلامية بقسمة عدد كسري على كسر

يُقطِّع كريم ٢/١ ١ شمامة إلى قطع، كل قطعة منها تساوي ٨/٣ من الشمامة. ما عدد القطع التي بحوزته؟

٠٣:٢٣

‏نسخة الفيديو النصية

يقطّع كريم واحد ونص شمّامة إلى قطع، كل قطعة منها تساوي تلاتة على تمنية من الشمّامة. ما عدد القطع التي بحوزته؟

يعني عندنا كريم معاه واحد ونص شمّامة، وبيقطّع كريم الشمّام إلى قطع، بحيث إن كل قطعة منها بتساوي تلاتة على تمنية من الشمّامة. والمطلوب إننا نوجد عدد القطع اللي معاه؛ يعني واحد ونص هي كل الكمية اللي مع كريم من الشمام، وبيقطّع الشمام ده لقطع، كل قطعة حجمها تلاتة على تمنية من الشمّامة؛ فمعنى كده إن الواحد ونص شمّامة اللي عندنا لمّا نقسمهم لقطع كل قطعة بتساوي تلاتة على تمنية من الشمّامة، فهيبقى كام قطعة عندنا؟ فمعنى كده عشان نوجد القطع، يبقى هنوجد خارج قسمة واحد وواحد ونص، على، تلاتة على تمنية؛ يعني هنقسم عدد كسري على كسر، وأول حاجة هنعملها إننا هنحوّل العدد الكسري اللي عندنا إلى كسر.

وخلينا نفتكر لمّا بنحوّل عدد كسري إلى كسر، بنيجي عند المقام اللي هو اتنين ونضربه في العدد الصحيح واحد، فهيبقى اتنين في واحد بتساوي اتنين، بعد كده هنجمع اتنين على البسط اللي هو واحد، فهنجمع اتنين زائد واحد هتبقى تلاتة. وأما المقام فهيفضل زي ما هو اتنين، فبالتالي هنبقى كده حوّلنا العدد الكسري لكسر، وبقى بيساوي تلاتة على اتنين، فهيبقى عندنا تلاتة على اتنين مقسومة على تلاتة على تمنية.

فكده بقى عندنا كسرين وعايزين نوجد ناتج قسمتهم، وخلينا نفتكر إننا لمّا بنقسم كسر على كسر، بنيجي عند الكسر التاني اللي هو بعد علامة القسمة، وبنوجد المقلوب بتاعه؛ يعني هنكتب المقام مكان البسط، ونكتب البسط مكان المقام، فيهيبقى عندنا تمنية على تلاتة. وتاني حاجة بنعملها في قسمة الكسور، إننا بنيجي عند علامة القسمة وبنحولها لعلامة ضرب؛ فبالتالي هيبقى تلاتة على اتنين، على، تلاتة على تمنية بتساوي … تلاتة على اتنين هتفضل زي ما هي، وبعد كده قلنا بنغيّر علامة القسمة لعلامة ضرب، وتاني كسر اللي هو بعد علامة القسمة بنقلبه، فهيبقى تمنية على تلاتة. بعد كده هنضرب الكسر تلاتة على اتنين، في، تمنية على تلاتة، ولمّا بنضرب كسور بنضرب البسط في البسط وبنضرب المقام في المقام.

لكن هنلاحظ إننا عندنا هنا تلاتة وهنا تلاتة، فنقدر نختصر عن طريق إننا نقسم البسط والمقام على تلاتة، فلمّا نقسم تلاتة على تلاتة بواحد، وتلاتة على تلاتة بواحد، فيبقى عندنا واحد في تمنية واللي هتساوي تمنية، وأما المقام فهيبقى اتنين في واحد واللي هتساوي اتنين. فهنلاحظ إن البسط أكبر من المقام، فنقدر نقسم تمنية على اتنين، ولمّا نقسمها هتبقى بتساوي أربعة؛ فبالتالي هيبقى خارج قسمة واحد وواحد ونص، على، تلاتة على تمنية بتساوي أربعة.

فمعنى كده إن عدد القطع اللي بحوزة كريم هو أربع قطع.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.