تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: التمثيل بالنقاط

أحمد لطفي

يوضِّح الفيديو تعريف طريقة التمثيل بالنقاط، وكيفية تمثيل البيانات المختلفة باستخدام طريقة التمثيل بالنقاط.

٠٥:٥١

‏نسخة الفيديو النصية

هنتكلّم عن التمثيل بالنقاط، وهنعرف يعني إيه التمثيل بالنقاط، وهنشوف إزّاي هنقدر نمثّل البيانات المختلفة باستخدام طريقة التمثيل بالنقاط.

في البداية الإحصاء هي عبارة عن: تجميع، وترتيب، وتفسير البيانات. والبيانات هي عبارة عن: بعض المعلومات التي تكون في الأغلب أعداد. والتمثيل بالنقاط هو عبارة عن: رسم بياني يوضّح البيانات على خط الأعداد.

يبقى عندنا خط أعداد، وهنوضّح عليه البيانات اللي هي بتكون معلومات وفي الأغلب أعداد. والطريقة دي هتُعتبر تجميع، وترتيب، وتفسير للبيانات باستخدام التمثيل بالنقاط. في صفحة جديدة هناخد مثال عشان نقدر نفهم أكتر معنى التمثيل بالنقاط.

فعندنا جدول بالشكل ده. الجدول بيحتوي على بيانات بيمثّلوا أطوال عشرين مبنى. وعايزين نمثّل البيانات اللي بداخل الجدول بطريقة التمثيل بالنقاط، فهتكون بالشكل ده.

يبقى عندنا خط أعداد بالشكل ده، وقدِرنا نمثّل البيانات اللي بداخل الجدول على خط الأعداد في صورة علامة x. عايزين نعرّف مصطلح اسمه: «القيمة المتطرفة أو الشاذة». يبقى نقدر نقول إن القيمة المتطرفة أو الشاذة هي البيانات اللي بتكون بعيدة عن باقي البيانات. يعني عندنا القيمة ستين دي بتُعتبر قيمة متطرفة أو شاذة. وعندنا القيمة ستة وعشرين دي بتُعتبر قيمة متطرفة أو شاذة.

هنعرّف مصطلح تاني اسمه: «العنقود» وهي عبارة عن البيانات اللي بتكون مُجمّعة حول بعضها. يعني نقدر نقول إن مجموعة البيانات دي هيمثّلوا العنقود؛ عشان مجموعة البيانات دي مُجمّعة حول بعضها.

هنعرّف مصطلح آخَر، وهو: «المدى». وهو عبارة عن الفرق بين أكبر عدد وأصغر عدد في مجموعة الأعداد. هنلاحظ إن في البيانات اللي عندنا لو عايزين نجيب المدى أكبر عدد عندنا هو: ستين، وأصغر عدد هو: ستة وعشرين. يبقى الفرق بين العددين ستين وستة وعشرين ده بيمثّل المدى. يعني المدى ستين ناقص ستة وعشرين، أو نقدر نقول إن المدى عبارة عن: أربعة وتلاتين.

يبقى عرفنا «القيمة المتطرفة أو الشاذة»: هي بيانات بتكون بعيدة عن باقي البيانات. وعرفنا «العنقود»: هي بيانات بتكون مُجمّعة حول بعضها. وعرفنا «المدى» اللي هو: الفرق بين أكبر عدد وأصغر عدد في مجموعة أعداد. في صفحة جديدة هناخد مثال آخَر.

عندنا بيانات مُمثّلة بطريقة التمثيل بالنقاط بالشكل ده. والبيانات بتمثّل عدد الكتب التي قرأها مجموعة من الطلاب في فصل الصيف. وعايزين نحدّد على البيانات دي القيمة المتطرفة أو الشاذة، والعنقود، والمدى.

في البداية هنلاحظ إن عندنا قيمة واحدة بس، القيمة المتطرفة أو الشاذة، عند تسعة. يبقى أقدر أقول إن عند تسعة هتُعتبر قيمة متطرفة أو شاذة. ولو عايزين نحدّد العنقود، اللي هي البيانات اللي بتكون مُجمّعة حول بعضها. ممكن نقول إن هم مجموعة البيانات من واحد إلى تلاتة؛ هيمثّلوا العنقود.

ولو عايزين نحدّد المدى، اللي هو الفرق بين أكبر عدد وأصغر عدد في مجموعة من الأعداد، فالمدى هيكون عبارة عن … عندنا أكبر قيمة هي: تسعة، وأصغر قيمة هي: واحد؛ يعني تسعة ناقص واحد، أو تمنية.

هنلاحظ أيضًا إن عندنا فترة على خط الأعداد ما فيهاش بيانات، ودي هنسمّيها: «فجوة». يبقى الفترة دي هنسمّيها: «فجوة» عشان الفترة دي ما فيهاش بيانات. ويبقى كده قدِرنا نحدّد القيمة المتطرفة أو الشاذة، والعنقود، والمدى، والفجوة على البيانات المُمثّلة بطريقة التمثيل بالنقاط.

لو جينا افترضنا إن القيمة اللي عند تسعة ما كانتش موجودة، وكان مكانها قيمة عند تمنية؛ عايزين نشوف المدى هيتأثّر إزّاي. فهيكون عندنا مدى بصورة جديدة. والمدى هو عبارة عن الفرق بين أكبر عدد وأصغر عدد في مجموعة من الأعداد. وأكبر عدد عندنا هو: تمنية، وأصغر عدد هو: واحد؛ يعني المدى هو تمنية ناقص واحد، أو سبعة. وبالتالي المدى بيتأثّر بتغيير البيانات.

ويبقى كده عرفنا يعني إيه التمثيل بالنقاط. وعرفنا نحدّد القيمة المتطرفة أو الشاذة، والعنقود، والمدى، والفجوة على خط أعداد مُمثّل عليه بيانات بطريقة التمثيل بالنقاط.