فيديو: حساب قياس قوس بالدرجات بدلالة طوله ونصف القطر

طول قوس في دائرة نصف قطرها ٥٠ يساوي ١١٥. أوجد قياس القوس لأقرب جزء من عشرة بالدرجات.

٠٢:٢٦

‏نسخة الفيديو النصية

طول قوس في دائرة نصف قطرها خمسين يساوي مية وخمستاشر. أوجد قياس القوس لأقرب جزء من عشرة بالدرجات.

هنرسم المعطيات اللي عندنا في السؤال. دايرة نصف قطرها خمسين. وفي قوس طوله بيساوي مية وخمستاشر. ومطلوب منّنا إن إحنا نوجد قياس القوس. فيه علاقة مهمة عايزين نفتكرها؛ هي إن طول القوس على محيط الدائرة، بيساوي قياس القوس على قياس الدائرة. إحنا معطى عندنا هنا في السؤال طول القوس، اللي هو مية وخمستاشر. وإحنا نقدر نحسب محيط الدائرة بمعلومية نصف قطرها. والمطلوب منّنا إن إحنا نوجد قياس القوس. أمّا قياس الدائرة، فهو تلتمية وستين درجة.

إحنا عارفين إن محيط الدائرة عبارة عن اتنين 𝜋 نق. طب إحنا عايزين نوجد المحيط ده. هيبقى حاصل ضرب اتنين في … قيمة 𝜋 التقريبية اللي هنستخدمها تلاتة وأربعتاشر من مية. أمّا نصف القطر فهو خمسين. يبقى اتنين في تلاتة وأربعتاشر من مية في خمسين. اللي هو هيبقى بيساوي تلتمية وأربعتاشر.

كده قدرنا نوجد محيط الدائرة. هنبتدي نعوّض في القانون اللي عندنا ده؛ عشان نوجد قياس القوس، لأقرب جزء من عشرة بالدرجات. طول القوس عندنا مذكور في السؤال بمية وخمستاشر. هنقسمه على محيط الدايرة اللي حصلنا عليه، اللي هو تلتمية وأربعتاشر. ده هيساوي قياس القوس، وده المجهول اللي إحنا محتاجين نوجده؛ على قياس الدائرة، اللي هو بيساوي تلتمية وستين درجة. بِضَرب الطرفين في تلتمية وستين، هيبقى قياس القوس بيساوي مية وخمستاشر على تلتمية وأربعتاشر، في تلتمية وستين درجة. اللي هيطلع بيساوي الناتج اللي قدامنا ده بالدرجات.

عايزين نقرّب القياس ده لأقرب جزء من عشرة. هنيجي نحط علامة تحت الخانة المكانية الخاصة بالأجزاء من عشرة، اللي هي دي. ونشوف الرقم اللي على يمين الخانة دي. الرقم ده أربعة، يعني أقل من خمسة. فبالتالي مش هيزوّد الرقم اللي تحته الخط أيّ حاجة. وهتتحوّل كل الأرقام اللي على يمين الخانة المكانية دي، إلى أصفار. يفضل الرقم اللي تحته الخط زيّ ما هو. فهتبقى النتيجة مية واحد وتلاتين وتمنية من عشرة درجة تقريبًا. ويبقى هو ده قياس القوس المطلوب، بعد تقريبه لأقرب جزء من عشرة بالدرجات.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.