فيديو: العدُّ القفزي بالدقائق على ساعة العقارب

أيُّ الساعتين توضِّح التوقيت ٤:١٠؟

٠١:٥٤

‏نسخة الفيديو النصية

أيُّ الساعتين توضّح التوقيت أربعة وعشر دقايق؟

عندنا الساعتين اللي قدامنا دول، وعاوزين نعرف أيّ ساعة فيهم هي اللي بتقول لنا إن الساعة أربعة وعشر دقايق.

علشان نعرف، هنقرأ كل ساعة. فلمّا نيجي نقرأ الساعة دي هنبصّ على عقرب الساعات. فين عقرب الساعات؟ هو ده. باصص على الأربعة؛ يبقى هي فعلًا في الساعات في أربعة. وبعد كده نبصّ على عقرب الدقايق. فين عقرب الدقايق؟ هو ده. بيبصّ على العشرة. طيب هو الوقت اللي إحنا عاوزينه، أو الوقت الموجود في السؤال، أربعة وعشرة ولّا إلّا عشرة؟ هنلاقيه أربعة وعشرة. لكن هنا الساعة أربعة إلّا عشرة دقائق؛ لأن عقرب الدقايق بيبصّ على العشرة. لمّا عقرب الدقايق يبصّ على العشرة، فده معناه إن الساعة أربعة إلا عشرة.

طيب تعالوا نشوف الساعة اللي بعدها، اللي هي الساعة دي. عقرب الساعات برضو بيبصّ على الأربعة. تمام. نيجي لعقرب الدقايق هنلاقيه بيبصّ على الاتنين؛ يعني إيه بيبصّ على الاتنين؟ يعني الساعة عدّت أربعة بعشر دقايق. يعني الساعة أربعة وعشر دقائق.

يبقى أمّا عقرب الدقايق يبصّ عَ الاتنين ده معناه إن الساعة وعشر دقايق، لكن أمّا عقرب الدقايق يبصّ عَ العشرة ده معناه إن هي لسه إلّا عشر دقايق. وإحنا السؤال عندنا أربعة وعشر دقايق. يبقى من هنا نقول: إن هي دي الساعة الصحّ، اللي عقرب الدقايق بيبصّ فيها على الاتنين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.