فيديو: معرفة أن الأقسام المتساوية للشكل الكلي يمكن أن تحتوي على أشكال مختلفة

اختر المستطيل الذي ربع مساحته مظلل. اختر طريقة أخرى لتظليل ربع المستطيل. [أ] شكل أ [ب] شكل ب [ج] شكل ج [د] شكل د

٠٤:٠٧

‏نسخة الفيديو النصية

اختر المستطيل الذي ربع مساحته مظلّل.

عاوزين نختار المستطيل من الأربع مستطيلات اللي قدّامنا دول، واللي ربع مساحته مظلّل. يعني الجزء الأزرق المظلّل فيه بيمثّل ربعه. فلو جينا نبصّ على أول مستطيل، اللي هو ده. هنلاقي إن الجزء الأزرق ده هو بس اللي مظلّل. طب هل الجزء ده بيمثّل ربع المستطيل؟ لأ. ليه قلنا لأ؟ لأننا علشان نجيب ربع المستطيل، لازم تكون الأجزاء متساوية. يعني إيه الأجزاء متساوية؟

يعني المستطيل متقسّم لأربع أجزاء زيّ بعض وقّد بعض بالظبط، وجزء واحد بس منهم هو اللي مظلّل. لو بصّينا على المستطيل بتاعنا، هنلاقي إن الجزء ده كبير، وده صغير، وده صغير، وده كبير. يعني الأربع أجزاء مش قدّ بعض. فده معناه إن كده مش ده هو الاختيار الصح. نشوف اللي بعده، واللي هو ده. هنلاقي فيه نفس المشكلة، إن برضو الأجزاء كلها مش قدّ بعض، وجزء واحد منهم مظلّل. فيبقى هو برضو اختيار غلط.

نييجي للاختيار ده، هنلاقيه فعلًا متقسّم لأربع أجزاء متساوية؛ الجزء ده قدّ ده، قدّ ده، قدّ ده. بس كام جزء مظلّل؟ جزئين؛ واحد، اتنين. يبقى كده معناه إن نُصّ الشكل مظلّل، مش ربعه؛ لأن جزئين مظلّلين من أربع أجزاء. وده معناه إن الاختيار ده مش صح. نييجي لآخر اختيار. لو بصّينا عليه، هنلاقي المستطيل متقسّم لأربع أجزاء متساوية؛ هم دول. تمام، يبقى إحنا كده حقّقنا أول شرط؛ وهو إن الشكل يكون متقسّم لأجزاء متساوية. تاني حاجة هنلاقي إن جزء واحد بس مظلّل. يعني إيه؟ يعني جزء واحد مظلّل، وهُم كلهم أربع أجزاء، يعني ربع الشكل مظلّل. تبقى هي دي الإجابة الصح. ده بالنسبة لأول جزء في السؤال. طيّب تاني جزء؟

اختر طريقة أخرى لتظليل ربع المستطيل.

عاوزين نختار طريقة تانية نظلّل بيها برضو ربع المستطيل. فلو جينا نبصّ على أول اختيار، اللي هو ده. هنلاقي الاختيار ده كان موجود في الجزء الأول من السؤال. ورفضناه؛ لأن المستطيل متقسّم لأربع أجزاء مش متساوية. فما ينفعش نقول إن الجزء المظلّل ده هو ربع المستطيل، فبالتالي نستبعد الاختيار ده. نييجي للاختيار اللي بعده. هنلاقي إن برضو نفس المستطيل، ونفس التقسيمة الغلط اللي هي متقسّمة لأربع أجزاء مش قدّ بعض. بس كمان متظلّل فيه جزئين اتنين، مش جزء واحد. فده معناه إن برضو الاختيار ده مش هو اللي صح.

أمّا تالت اختيار، اللي هو ده. هنلاقي إن المستطيل متقسّم فيه لأربع أجزاء متساوية. هم إيه؟ بصّوا؛ المثلث ده هو أول جزء، والمثلث ده تاني جزء، قدّ بعض. المثلث ده تالت جزء، والمثلث ده رابع جزء. يبقى كده المستطيل اللي قدّامنا ده متقسّم لأربع أجزاء متساوية فعلًا. طيّب وكام جزء مظلّل؟ جزئين اتنين؛ الجزء ده، والجزء ده. فده معناه إن نُصّ المستطيل مظلّل، مش ربعه. فده يخلّينا نقول إن الاختيار ده مش هو اللي صح.

نييجي لآخر اختيار، واللي هو ده. هنلاقي إن برضو المستطيل متقسّم لأربع مثلثات متساوية. يبقى هو كده مقسّم لأربع أجزاء متساوية. وجزء واحد بس هو اللي مظلّل. يعني إيه جزء واحد هو اللي مظلّل؟ يعني ربع الشكل مظلّل. فتبقى هي دي الإجابة الصح، وهو ده المستطيل اللي ربعه مظلّل.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.