نسخة الفيديو النصية
الهرم ذو خمس أوجُه. كم وجهًا بهذا المكعب؟ تلميح: هناك أوجُه لا يمكنك رؤيتها في الصورة.
في السؤال ده، مدّينا المكعب، وعاوزين نعرف هو له كام وجه، أو عدد أوجُهه تساوي إيه؟ طيب علشان نعرف الأول إيه هو الوجه، هنبصّ على الهرم اللي عندنا هنا. الوجه هو الجزء المسطّح أو المستوي في المجسّم. يعني الهرم اللي عندنا ده، الجزء الأصفر المظلّل ده، اسمه وجه. وبرضو في الهرم اللي عندنا ده، هو نفسه، عندنا الجزء ده، المسطّح ده، اسمه وجه. يبقى الوجه هي الأجزاء المسطّحة اللي بتكوّن الشكل.
وعندنا الهرم بتاعنا له خمس أوجُه. بالمثل بقى، عاوزين نعرف المكعب اللي عندنا ده، له كام وجه. وبيقولنا تلميح، أو ملحوظة صغيرة ناخد بالنا منها، إن شكل المكعب اللي قدامنا ده، فيه أوجُه إحنا مش هنقدر نشوفها في الصورة دي؛ لأنها موجودة ورا، أو مستخبية.
طيب إحنا دلوقتي عاوزين نعرف المكعب له كام وجه. هنعمل إيه؟ هنجيب المكعب ده، هو زي المكعب الأزرق اللي قدامنا. بعدين هنحاول نفتحه، ونحوّله من مجسّم لشكل ثنائي الأبعاد. بعدين هنفتحه كده، ويبقى ده هو الشكل النهائي للمكعب لمّا فتحناه. حوّلناه من شكل ثلاثي الأبعاد؛ بعد ما كان مكعب زي ده كده، خليناه بالشكل الثنائي الأبعاد ده.
طيب مش كل وجه من أوجُه المكعب على شكل مربع؟ يبقى في الشكل اللي عندنا ده، كل مربع مِ المربعات اللي قدامنا، عبارة عن وجه. يعني عندنا هنا، ده كده مربع، اللي هو الجزء ده. فده كده يعتبر وجه. وده التاني زيّه. وده التالت. وده الرابع. وده الخامس. وده السادس.
فده معناه إن المكعب له ست أوجُه. لمّا بنركّب الست أوجُه اللي قدامنا دول، أو بنقفلهم على بعض، بيكونوا لنا شكل المكعب. يعني كده تَنِينا أول وجه، اللي هو ده، وقّفناه. والوجه رقم أربعة ده، كمان تَنِيناه. بعدين تَنِينا الوجه الخامس ده، والوجه السادس ده؛ وقفناهم.
ولمّا نقفل الوجهين، الأول والتاني دول. يعني نرفعهم ونوصّل الوجه الأول، الجزء ده، لحدّ الوجه الرابع هنا. هيبقى المكعب عندنا بالشكل ده. ولمّا نقفل كل الأوجُه، هيتكوّن لنا شكل المكعب. وبكده هنكون فهمنا ليه قلنا إن المكعب له ست أوجُه. ونقدر نردّ على السؤال اللي بيقول لنا: «كم وجهًا بهذا المكعب؟»، ونقول له الإجابة هي: ستة. وتبقى هي دي الإجابة الصح؛ ستة.
