فيديو: مقارنة الأعداد العشرية وترتيبها

يوضح الفيديو كيفية مقارنة الأعداد العشرية لمعرفة أيها أكبر أو أصغر أو متساوٍ، وترتيبها بناءً على ذلك، وأمثلة عليها.

٠٤:١٩

‏نسخة الفيديو النصية

مقارنة الأعداد العشرية وترتيبها.

في الفيديو ده هنتكلم عن مقارنة الأعداد العشرية؛ لمعرفة أيها أكبر أو أصغر أو متساوي. وترتيبها بناءً على ذلك. مقارنة الأعداد العشرية شبيهة بمقارنة الأعداد الطبيعية. نقدر نعبر عنها إنها متساوية أو غير متساوية، سواء كانت أكبر من بالعلامة دي، أو أصغر من بالعلامة دي. والشكل ده من التعبير عن عدم التساوي بنسميه متباينة.

إزاي بنقارن الأعداد العشرية؟ هنشوف المثال ده. لو قلنا إن أحمد طوله متر وتلاتة وأربعين من مية. وحسن طوله متر وواحد وأربعين من مية. يبقى مين فيهم أطول؟

أول حاجة نكتب العددين المعبّرين عن طول أحمد وطول حسن فوق بعض بالشكل ده. بعدين نبدأ نقارن الأرقام اللي في القيم المكانية المتناظرة من الشمال. يعني أقارن الآحاد بالآحاد، والأجزاء من عشرة ببعضها، وهكذا. فهنلاقي في الآحاد الواحد بيساوي الواحد. وفي الأجزاء من عشرة الأربعة بتساوي الأربعة. وفي الأجزاء من مية عند أحمد فيه تلاتة، وعند حسن فيه واحد. وبما إن تلاتة أكبر من واحد، يبقى طول أحمد أكبر من طول حسن. يعني واحد وتلاتة وأربعين من مية أكبر من واحد وواحد وأربعين من مية.

لو حبينا نمثّل العددين على خط الأعداد للتأكد، هيبقى بالشكل ده. وهنلاحظ إن طول أحمد على يمين طول حسن. وده بيؤكد إنه أكبر من طول حسن.

نتنقل لصفحة تانية. لمّا بيكون فيه عددين عشريين ليهم نفس القيمة وشكلهم مختلف. زي مثلًا سبعة من عشرة وسبعين من مية. بنقول عليهم أعداد عشرية متكافئة؛ لأن إضافة صفر أو أكتر على يمين آخر قيمة مكانية عشرية، ما بيغيرش من قيمة العدد. طيب إيه اللي بيخلينا نضيف الأصفار أصلًا؟ إضافة الأصفار للأعداد العشرية بالشكل ده بيساعد على ترتيبها. وهنوضح إزاي في المثال الجاي.

لو عاوزين نرتّب الأعداد العشرية: خمستاشر، أربعتاشر وخمسة وتسعين من مية، وخمستاشر وتمنية من عشرة، وخمستاشر وواحد من مية؛ تصاعديًّا. بنعمل ده إزاي؟

أول حاجة بنرتب الأعداد بشكل عمودي بالشكل ده. بعدين بنضيف أصفار على يمين آخر قيمة مكانية عشرية؛ بحيث إن الأعداد كلها تبقى متساوية في عدد القيم المكانية العشرية، بالشكل ده. بعدين بنقارنها ببعضها من الشمال لليمين. فهيبقى الترتيب بالشكل ده. يبقى الترتيب التصاعدي للأعداد العشرية دي هيبقى: أربعتاشر وخمسة وتسعين من مية، خمستاشر، خمستاشر وواحد من مية، خمستاشر وتمنية من عشرة.

وبكده نبقى خلّصنا الفيديو ده اللي اتكلمنا فيه عن مقارنة الأعداد العشرية، وترتيبها بناءً على المقارنة دي.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.