فيديو السؤال: تحويل الزمن من ساعات إلى أيام والعكس الرياضيات

نسخة الفيديو النصية

كم يومًا وساعة في ستمية خمسة وتسعين ساعة؟

اليوم الواحد موجود فيه أربعة وعشرين ساعة. يعني عند التحويل من الأيام للساعات، بنضرب في أربعة وعشرين. وعند التحويل من الساعات للأيام، بنقسم على أربعة وعشرين.

هنا في السؤال عايزين نعرف الستمية خمسة وتسعين ساعة، موجود فيهم كام يوم وساعة. يعني هنقسم الستمية خمسة وتسعين ساعة على الأربعة وعشرين، باستخدام القسمة المطوّلة. يعني عايزين نعرف إيه العدد اللي لو ضربناه في أربعة وعشرين، هيدي لنا أقرب ناتج للستمية خمسة وتسعين. ممكن يبقى أقل من الستمية خمسة وتسعين، بس ما ينفعش يبقى أزيد.

العدد اللي بنقسم عليه الأربعة وعشرين مكوّن من رقمين. يبقي هناخد قصاده من هنا رقمين. دلوقتي عايزين نعرف التسعة وستين على أربعة وعشرين بيساوي كام؟ هي هي لو قلنا الأربعة وعشرين في كام يدّي لنا عدد يكون قريب من التسعة وستين، وأصغر منه.

هنلاقي إن الأربعة وعشرين في اتنين بيساوي تمنية وأربعين. والأربعة وعشرين في تلاتة بيساوي اتنين وسبعين. يبقى هنختار العلاقة دي؛ لأنها بتحقق الشرط. والتمنية وأربعين أصغر من التسعة وستين. يبقى تسعة وستين على أربعة وعشرين فيها الاتنين. الاتنين في أربعة وعشرين بتمنية وأربعين.

دلوقتي هنطرح التسعة وستين ناقص التمنية وأربعين. تسعة ناقص تمنية بيساوي واحد. وستة ناقص أربعة بيساوي اتنين. هنلاحظ إن الواحد وعشرين أصغر من الأربعة وعشرين. يبقى هننزّل الخمسة دي. دلوقتي هنقسم الميتين وخمستاشر على أربعة وعشرين. يعني الأربعة وعشرين في كام بيساوي ميتين وخمستاشر، أو أقرب رقم للميتين وخمستاشر وأصغر منه. الأربعة وعشرين في عشرة بميتين وأربعين، محتاجين نقلل عن كده شويّة. يبقى الأربعة وعشرين في تسعة بميتين وستاشر. برضو لسه أكبر من ميتين وخمستاشر. يبقى هنختار الأربعة وعشرين في تمنية. وبتساوي مية اتنين وتسعين. وبكده الميتين وخمستاشر على أربعة وعشرين، هتدي لنا التمنية. التمنية في أربعة وعشرين بمية اتنين وتسعين.

دلوقتي هنطرح الميتين وخمستاشر ناقص مية اتنين وتسعين. خمسة ناقص اتنين تلاتة. وواحد ناقص تسعة، مش هنعرف نطرح واحد ناقص تسعة. هنستلف من الاتنين واحد. الاتنين هتبقى بواحد، والواحد هيبقى بحداشر. حداشر ناقص تسعة باتنين. وواحد ناقص واحد بصفر. ناتج القسمة هنا تمنية وعشرين، وده بيمثّل عدد الأيام. وباقي القسمة هنا تلاتة وعشرين، وده بيمثّل باقي عدد الساعات..

وبكده إجابة السؤال «كم يومًا وساعة في ستمية خمسة وتسعين ساعة؟» هتكون تمنية وعشرين يومًا وتلاتة وعشرين ساعة.