فيديو: الضرب في ۱۰

يوضح الفيديو كيفية الضرب في العدد ۱۰ باستخدام الأنماط وطريقة العد المتقطع، مع أمثلة توضيحية.

٠٧:١١

‏نسخة الفيديو النصية

في الفيديو ده، هنتكلّم عن الضرب في العدد عشرة. وهنحلّ بعض الأمثلة.

شاهد كريم أثناء سيره على الشاطئ آثار أقدام. فلمّا عدَّ الأصابع، كانت عشر أصابع في كل زوج من آثار الأقدام. فهيبقى فيه كام إصبع في أربع أزواج؟

يعني زيّ اللي في الصورة قدامنا، عندنا أربع أزواج من آثار الأقدام، زي اللي في الشكل. وكل زوج من آثار الأقدام فيه عشر أصابع. فلو عايزين نعرف فيه كام إصبع في الأربع أزواج، يبقى محتاجين نوجد حاصل ضرب عشرة في أربعة. وعشرة هو عدد الأصابع في كل زوج من آثار الأقدام. وأربعة هو عدد الأزواج اللي عندنا. فعلشان نوجد حاصل ضرب عشرة في أربعة، بنستخدم طريقة الأنماط. فلمّا نشوف حاصل ضرب عشرة في واحد، يعني عدد الأصابع في الزوج الواحد، فهيبقوا عشر أصابع.

طيب لمّا نيجي نشوف عدد الأصابع في زوجين من الأقدام، يعني عشرة في اتنين، فهتبقى بتساوي عشرين. وهكذا عدد الأصابع في تلات أزواج يعني عشرة في تلاتة. فيبقى بيساوي تلاتين إصبع. وعشرة في أربعة بتساوي أربعين. ولو كمّلنا، عشرة في خمسة هتساوي خمسين. ومن هنا بنلاحظ إن فيه نمط عند الضرب في عشرة. فهنلاحظ إن العدد اللي بنضربه في عشرة، زيّ مثلًا هنا عشرة في تلاتة، فهنلاحظ إن الإجابة بتبقى تلاتين. يعني التلاتة هنا هي هي التلاتة هنا. ونفس الطريقة، لمّا ضربنا في أربعة كانت الإجابة أربعين. يعني أربعة هنا وأربعة هنا. وخمسة هنا وخمسة هنا، وهكذا.

وفيه ملحوظة تانية هناخد بالنا منها؛ إن دايمًا رقم الآحاد في جميع النواتج هو الصفر. يعني هنا عشرة، رقم الآحاد صفر. وعشرين، رقم الآحاد صفر، وهكذا. فهنلاحظ إننا لمّا بنضرب أيّ عدد في عشرة، النواتج دايمًا لازم يبقى رقم الآحاد فيها صفر.

فبنفس الطريقة، لو جينا نكمّل النمط، فبعد عشرة في خمسة، هنجرب مثلًا عشرة في ستة. يبقى هتساوي … هيبقى نفس العدد هنا اللي هو ستة، فيبقى ستين. ودايمًا لازم رقم الآحاد يكون صفر. وبرضو لو كمّلنا، عشرة في سبعة بتساوي سبعين، وهكذا. وبرضو ممكن نستخدم العدّ المتقطّع على خطّ الأعداد. فهنرسم خطّ الأعداد بالشكل ده. وعشان نوجد حاصل ضرب عشرة في أربعة، يبقى هنعِدّ أربع قفزات متساوية، ومقدار كل واحدة منها عشرة. وهنبدأ من الصفر. فهتبقى دي أول قفزة عندنا؛ من صفر لعشرة. ودي تاني قفزة. وهنكمّل لحدّ ما نعمل أربع قفزات. وكل قفزة مقدارها عشرة. فلمّا نيجي نقرا الأعداد، هيبقى عندنا أول قفزة عشرة، بعد كده عشرين، تلاتين، أربعين. فهتبقى أربعين هي الإجابة.

وبرضو من النمط، عندنا عشرة في أربعة بتساوي أربعين. وبالتالي هيبقى عدد الإصبع اللي كريم عدّها في الأربع أزواج أربعين إصبع. وقدرنا نوصل للإجابة عن طريق استخدام الأنماط، زيّ هنا. أو باستخدام طريقة العدّ المتقطّع على خطّ الأعداد.

ونشوف مثال آخر. مع فريد خمس ورقات نقدية من فئة عشرة جنيهات. فكم جنيهًا معه؟

يعني فريد معاه خمس ورقات نقدية، وكل ورقة من فئة عشرة جنيهات. وعشان نعرف فريد معاه كام جنيه، يبقى محتاجين نعرف حاصل ضرب خمسة في عشرة. وعشان نوجد حاصل ضرب خمسة في عشرة، يبقى هنعدّ بالعشرات. أول ورقة قيمتها عشرة، وبعد كده لو جمعنا عليها الورقة النقدية اللي بعدها، فهيبقوا عشرين. وبعد كده تالت ورقة، فهيبقى عندنا تلاتين. بعد كده أربعين. وبعد كده خمسين.

وهنلاحظ هنا برضو النمط في النواتج. فلمّا كان عندنا ورقة واحدة كانت بعشرة. ورقتين، عشرين. تلات ورقات، تلاتين. أربع ورقات، أربعين. وخمس ورقات، خمسين. وبالتالي هيبقى حاصل ضرب خمسة في عشرة بيساوي خمسين. إذن مع فريد خمسين جنيهًا.

ونشوف آخر مثال. اشترى حسام ملابس بتسعين جنيهًا. فكم ورقة نقدية من فئة عشر جنيهات ثمن الملابس؟

يعني حسام اشترى ملابس بتسعين جنيه. فعايزين نعرف كام ورقة نقدية من فئة عشر جنيهات تمن الملابس. يعني الموضوع هنا مختلف. إحنا عارفين تمن الملابس اللي اشتراها حسام، اللي هي تسعين جنيه. فمعنى كده إن تمن الملابس اللي اشتراها حسام بتساوي عدد معيّن من الأوراق النقدية فئة عشر جنيهات. فمعنى كده إننا عايزين نعرف عشرة هنضربها في كام علشان يبقى حاصل الضرب تسعين.

فزيّ ما عرفنا إن لمّا بنضرب في عشرة بيبقى فيه نمط للنواتج. فزيّ ما عرفنا إن عشرة في واحد بتساوي عشرة. وعشرة في اتنين بعشرين. وعشرة في تلاتة بتساوي تلاتين. وعشرة في أربعة بتساوي أربعين. وقلنا برضو: إن دايمًا بيبقى نفس العدد هنا هو نفس العدد هنا. يعني أمّا كان هنا واحد كانت دي واحد. وهنا اتنين، فهنا اتنين، وهكذا. وبما إن إحنا عندنا هنا العدد تسعين، يعني رقم العشرات تسعة. فيبقى برضو هنا العدد نفسه. يعني هيبقى تسعة. إذن عشرة في تسعة بتساوي تسعين. فمعنى كده إن تمن الملابس، اللي هو تسعين جنيه، هو تسع ورقات نقدية من فئة عشر جنيهات. اللي هي عشرة في تسعة.

وبكده نكون عرفنا الضرب في العدد عشرة، وحلّينا بعض الأمثلة المختلفة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.