فيديو: إيجاد خارج القسمة وباقيها

يوضح الفيديو كيفية القسمة باستخدام القسمة المطوَّلة في حال وجود باقٍ أو عدم وجود باقٍ، وكيفية التحقق من خارج القسمة باستخدام قطع العد.

٠٥:٢٥

‏نسخة الفيديو النصية

إيجاد خارج القسمة وباقيها.

في الفيديو ده هنتعلّم إزاي بنقسم باستخدام القسمة المطولة. وإزاي بنقسم في حالة وجود باقي للقسمة. في أكتر من طريقة للقسمة، ومنها القسمة المطولة. فمثلًا ذهب طلاب أحد الفصول في رحلة مدرسية إلى المتحف بالحافلة. وكان عدد الطلاب ثمانيةً وعشرين طالبًا. وعدد المدرسين المرافقين ثمانية مدرسين. فإذا كان كل مقعد في الحافلة، يستوعب شخصين. فما عدد المقاعد المطلوبة في الحافلة؟

في المثال ده، المطلوب هو معرفة عدد المقاعد، اللي كل الأشخاص هتستخدمها في رحلتهم إلى المتحف. فأول حاجة، عاوزين نعرف عدد الأشخاص الكلي. وده هيساوي عدد الطلاب، زائد عدد المدرسين. اللي بيساوي … عدد الطلاب بيساوي تمنية وعشرين. زائد … عدد المدرسين هو تمن مدرسين. فتمنية وعشرين زائد تمنية، هيساوي ستة وتلاتين.

يبقى عدد المقاعد المطلوبة … يبقى عدد المقاعد المطلوبة بيساوي ستة وتلاتين، اللي هو عدد الأشخاص. على اتنين، اللي هو عدد الأشخاص في كل مقعد. وبنكتب السؤال باستخدام القسمة المطوَّلة، بالشكل ده. فالمقسوم، اللي هو ستة وتلاتين، بنكتبه في الجزء ده. والمقسوم عليه، اللي هو اتنين، بنكتبه في الجزء ده. بعدين نبدأ القسمة.

فأول حاجة بنقسم الرقم الموجودة في أكبر قيمة مكانية، المقسوم. اللي هو في الحالة دي، العشرات؛ يعني تلاتة. على المقسوم عليه. وبما إن تلاتة ما بتقبلش القسمة على اتنين، فهنكتب أقرب ناتج صحيح. بشرط إننا لو ضربناه في المقسوم عليه، ما يكونش الناتج أكبر من تلاتة.

ففي الحالة دي بنقول إن تلاتة على اتنين، بيساوي تقريبًا واحد. بعدين نضرب واحد في اتنين، فيبقى ناتج الضرب بيساوي اتنين. فنكتبه تحت التلاتة في العشرات. بعدين نطرح تلاتة ناقص اتنين، بيساوي واحد. فنتأكد إن الواحد أصغر مِ الاتنين. وبما إن ده صحيح، فنكمّل. ونكتب الستة في الآحاد.

بعدين نقسم ستاشر على المقسوم عليه، اللي هو اتنين. فيبقى ستاشر على اتنين، بيساوي تمنية. بعدين نضرب تمنية في اتنين، فالناتج هيبقى ستاشر. فنكتب ستاشر. وبعدين نطرح ستاشر ناقص ستاشر، بيساوي صفر. وبما إن الناتج النهائي للطرح هو صفر، وما فيش أرقام إضافية، يبقى عملية القسمة انتهت. يبقى ستة وتلاتين على اتنين بيساوي تمنتاشر. يعني محتاجين في الرحلة، إن تكون الحافلة فيها على الأقل تمنتاشر مقعد.

في حالة القسمة بباقي، فده معناه إن اتبقّى قيمة أو كمية أقلّ من المقسوم عليه. وفي الحالة دي، بنوقّف عملية القسمة. نحلّ مثال. أراد نادر شراء أربعة قصص مصوّرة لها نفس السعر. فإذا كان السعر الكلي للقصص هو أربعة وسبعون جنيهًا، فكم سعر القصة المصوّرة الواحدة؟

عشان نعرف سعر القصة المصوّرة الواحدة، محتاجين نقسم سعرهم الكلي، اللي هو أربعة وسبعين جنيه. على عددهم، اللي هو أربع قصص مصوّرة. فنكتب المثال باستخدام القسمة المطوَّلة. بعدين نبدأ القسمة. فأول حاجة هنقسم الرقم اللي في العشرات، على المقسوم عليه. يعني نقسم سبعة على أربعة.

وبما إن سبعة ما بتقبلش القسمة على أربعة، فهنكتب أقرب عدد. بحيث إننا لو ضربناه في المقسوم عليه، يكون الناتج أقل من سبعة. فهيبقى الناتج تقريبًا بيساوي واحد. بعدين نضرب واحد في أربعة، فالناتج هيبقى أربعة. فنكتب أربعة تحت سبعة في العشرات. بعدين نطرح، فسبعة ناقص أربعة، بيساوي تلاتة. وبما إن تلاتة أصغر من أربعة، يبقى نكمّل وننزّل الأربعة في الآحاد.

بعدين نقسم أربعة وتلاتين على أربعة. فهيبقى أقرب ناتج للقسمة هو تمنية. بعدين نضرب تمنية في أربعة، فالناتج هيبقى اتنين وتلاتين. بعدين نطرح، فأربعة وتلاتين ناقص اتنين وتلاتين، هيساوي اتنين. وبما إن اتنين أصغر من أربعة، وما فيش أرقام تانية في المقسوم. فده معناه إن عملية القسمة انتهت، والباقي هو اتنين. وده معناه إن سعر القصة المصوّرة الواحدة أكتر بشويّة من تمنتاشر جنيه.

ممكن نتحقق من الإجابة باستخدام قطع العدّ. فلو قدامنا أربعة وسبعين قطعة عدّ. وقسمناهم إلى أربع مجموعات. فهنلاقي إنهم اتقسّموا لأربع مجموعات متساوية. كل مجموعة فيها تمنتاشر قطعة عدّ. وكان الباقي قطعتين.

يبقى في الفيديو ده اتعلمنا إزاي بنستخدم عملية القسمة المطوَّلة؛ في حالة وجود باقي، وفي حالة عدم وجود باقي. وإزاي بنتحقّق من الناتج، باستخدام قطع العدّ.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.