فيديو: قياس الأطوال بالسنتيمترات

يوضِّح الفيديو كيفية استخدام النماذج لقياس أطوال الأجسام الصغيرة والتعبير عن أطوالها التقريبية بالسنتيمترات.

٠٤:٠١

‏نسخة الفيديو النصية

قياس الأطوال بالسنتيمترات.

هنتكلّم في الدرس ده عن إزاي نقدر نستخدم النماذج؛ عشان نقيس الأطوال بتاعة الأجسام أو الأشياء القصيرة بالسنتيمترات. لو بصّينا على المكعب اللي عندنا ده، هنلاقي إن طوله واحد سنتيمتر. طب يا ترى طول المقص اللي عندنا ده هيبقى تقريبًا كام سنتيمتر؟ هنعمل خط عند بداية المقص، وخط عند نهاية المقص. ونشوف المسافة دي هنقدر نحطّ فيها كام مكعب. هنعدّ مع بعض: واحد، اتنين، تلاتة، أربعة، خمسة. ستة، سبعة، تمنية، تسعة، عشرة. يعني المسافة دي أخدت عشر مكعبات. وطول المكعب الواحد منهم واحد سنتيمتر. يبقى العشر مكعبات طولهم عبارة عن عشرة سنتيمتر تقريبًا. يبقى طول المقص هو عشرة سنتيمتر تقريبًا. في صفحة جديدة هنشوف أمثلة تانية.

لو بصّينا على صورة الحذاء الرياضي اللي قدّامنا ده. عايزين نعرف طوله تقريبًا كام. هنعمل علامة عند بداية الحذاء، وعلامة تانية عند نهاية الحذاء. وهنشوف كام مكعب ممكن نستخدمه ونحطّه؛ عشان يبقى طولهم طول الحذاء الرياضي ده. هنعدّ مع بعض أخدنا كام مكعب. هنلاقي: واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر، تلتاشر، أربعتاشر، خمستاشر. يعني الطول أخد خمستاشر مكعب. طول المكعب الواحد واحد سنتيمتر. يعني نقدر نقول إن الطول خمستاشر سنتيمتر تقريبًا.

لو بصّينا على الدبوس اللي قدّامنا ده، هنحطّ خط عند بداية ونهاية الدبوس بتاع الورق. وهنشوف المسافة دي هتاخد كام مكعب. هنلاقي إن المسافة دي أخدت: واحد، اتنين؛ عدد اتنين مكعب. طول الواحد منهم واحد سنتيمتر. فنقدر نقول إن طول الدبوس بتاع الورق ده هيبقى تقريبًا اتنين سنتيمتر. في صفحة جديدة هنشوف أمثلة تانية.

لو جينا نقيس أطوال الأشكال اللي قدّامنا في الصورة دي. هنبدأ أول حاجة بالقلم الرصاص اللي قدّامنا. هنعمل خط على بداية ونهاية القلم، ونشوف المسافة دي نقدر نحطّ فيها كام مكعب. إحنا عارفين إن المكعب طوله واحد سنتيمتر. فلو عدّينا عدد المكعبات اللي هنحطّها، هنقدر نوصل لطول القلم ده قدّ إيه. هنلاقي إن إحنا قدِرنا نحطّ في المسافة دي أربعتاشر مكعب. يبقى طول القلم تقريبًا أربعتاشر سنتيمتر.

بالنسبة للأستيكة، بنفس الخطوات هنحطّ مجموعة من المكعبات بنفس طول الأستيكة، ونعدّ المكعبات. هنلاقي عندنا خمس مكعبات، طول الواحد واحد سنتيمتر. يبقى طول الأستيكة اللي عندنا خمسة سنتيمتر تقريبًا.

اتعلّمنا في الدرس ده إزاي نقدر نستخدم النماذج؛ عشان نقيس أطوال الأشياء القصيرة بالسنتيمتر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.