تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مقارنة وترتيب الكسور والأعداد العشرية والنسب المئوية

أحمد لطفي

يوضح الفيديو كيفية مقارنة الكسور والأعداد العشرية والنسب المئوية وترتيبها من خلال تحويل الكسور والأعداد العشرية إلى نسب مئوية.

٠٦:٠٨

‏نسخة الفيديو النصية

هنتكلم عن مقارنة وترتيب الكسور والأعداد العشرية والنسب المئوية من خلال تحويل الكسور والأعداد العشرية إلى نسب مئوية.

في البداية لو عايزين نشوف إزاي هنقدر نقارن بين الكسور والأعداد العشرية والنسب المئوية من خلال مثال، لو عندنا مثال بالشكل ده، لو عندنا طلاب الصف الأول الإعدادي بالشكل ده، وخمسة من عشرة من طلاب الصف الأول الإعدادي بيقضوا على الأقل تلاتين دقيقة يوميًّا لحل واجب الرياضيات. ولو عندنا طلاب الصف الثاني الإعدادي بالشكل ده، وسبعة وخمسين في المية من طلاب الصف الثاني الإعدادي بيقضوا على الأقل تلاتين دقيقة يوميًّا لحل واجب الرياضيات. محتاجين نوجد في أيٍّ من الصفين كانت نسبة الطلاب أكبر اللي بيقضوا على الأقل تلاتين دقيقة يوميًّا لحل واجب رياضيات. وبالتالي محتاجين نقارن بين خمسة من عشرة وسبعة وخمسين في المية.

عشان نقدر نقارن، محتاجين نحول العدد العشري اللي هو خمسة من عشرة إلى نسبة مئوية، وبالتالي خمسة من عشرة هتساوي خمسين في المية. يبقى عندنا خمسين في المية من طلاب الصف الأول الإعدادي بيقضوا على الأقل تلاتين دقيقة يوميًّا لحل واجب الرياضيات، ويبقى هنقارن بين خمسين في المية وسبعة وخمسين في المية. وبما إن خمسين في المية أصغر من سبعة وخمسين في المية؛ يبقى هنقول، يبقى نسبة طلاب الصف الثاني الإعدادي الذين يقضوا على الأقل تلاتين دقيقة يوميًّا لحل واجب الرياضيات أكبر من نسبة طلاب الصف الأول الإعدادي الذين يقضوا على الأقل تلاتين دقيقة يوميًّا لحل واجب الرياضيات. ويبقى كده عرفنا إزاي نقدر نقارن بين أعداد عشرية ونسب مئوية، عن طريق إننا حوّلنا العدد العشري إلى نسبة مئوية عشان نقدر نقارن بين نسبتين مئويتين.

ولو عايزين نقارن بين كسور ونسب مئوية، محتاجين نحول الكسور إلى نسب مئوية عشان نقدر نقارن بين نسب مئوية. لو عايزين نشوف إزاي هنقدر نرتب الكسور والأعداد العشرية والنسب المئوية من خلال مثال، لو عندنا مثال بالشكل ده، مطلوب نرتب تلاتين في المية، وتلاتة على مية، وسبعة على عشرين، وتلاتة وتلاتين من مية، من الأصغر إلى الأكبر. في البداية عشان نقدر نرتبهم، محتاجين نحول الكسور والأعداد العشرية إلى نسب مئوية.

أول حاجة بالنسبة للكسر تلاتة على مية، فعشان نحول من أي كسر إلى نسبة مئوية محتاجين نخلي مقام الكسر بيساوي مية، ونكتب البسط زي ما هو، ونضيف علامة النسبة المئوية. هنلاحظ إن الكسر تلاتة على مية المقام بيساوي مية، وبالتالي هنكتب البسط زي ما هو وهنضيف علامة النسبة المئوية، ويبقى تلاتة على مية هيساوي تلاتة في المية.

بالنسبة لتاني كسر سبعة على عشرين، فعشان نحول من أي كسر إلى نسبة مئوية، محتاجين نكتب الكسر في صورة كسر آخر مقامه بيساوي مية، وبالتالي عايزين نشوف سبعة على عشرين هتساوي كام على مية، هنلاحظ إن عشرين ضربناها في خمسة عشان تساوي مية، وبالتالي محتاجين نضرب البسط في خمسة أيضًا، يعني سبعة في خمسة هيساوي خمسة وتلاتين، يعني قدرنا نكتب الكسر سبعة على عشرين في صورة كسر آخر بيساوي خمسة وتلاتين على مية. هنلاحظ إن خمسة وتلاتين على مية هو كسر مقامه مية، وبالتالي نقدر نكتبه في صورة نسبة مئوية، هنكتب البسط زي ما هو خمسة وتلاتين، وهنضيف علامة النسبة المئوية، ويبقى سبعة على عشرين هيساوي خمسة وتلاتين على مية هيساوي خمسة وتلاتين في المية.

بالنسبة للعدد العشري تلاتة وتلاتين من مية، أول حاجة عشان نقدر نحول عدد عشري إلى نسبة مئوية، محتاجين نضرب في مية ونضيف علامة النسبة المئوية. عشان نضرب في مية، يعني هنحرك العلامة العشرية خطوتين إلى اليمين، وبالتالي هيساوي تلاتة وتلاتين، ونضيف علامة النسبة المئوية، يعني تلاتة وتلاتين من مية هيساوي تلاتة وتلاتين في المية. وبالتالي هيكون عندنا أربع نسب مئوية محتاجين نرتبهم: تلاتين في مية، وتلاتة في مية، وخمسة وتلاتين في مية، وتلاتة وتلاتين في المية. وبالتالي الترتيب من الأصغر للأكبر؛ أصغر نسبة مئوية عندنا هي تلاتة في مية، النسبة المئوية الأكبر منها هي تلاتين في المية، والنسبة المئوية الأكبر منها هي تلاتة وتلاتين في مية، وآخر نسبة مئوية عندنا هي خمسة وتلاتين في مية. هنكتب النسب المئوية في صورتها الأصلية المعطاة في المثال، تلاتة في المية كانت بتساوي تلاتة على مية، تلاتين في المية بتساوي تلاتين في المية زي ما هي، تلاتة وتلاتين في المية بتساوي تلاتة وتلاتين من مية، وآخر حاجة خمسة وتلاتين في المية سبعة على عشرين. وبالتالي الترتيب من الأصغر للأكبر تلاتة على مية، تلاتين في المية، تلاتة وتلاتين من مية، سبعة على عشرين.

ويبقى كده عرفنا إزاي نقدر نرتب الكسور والأعداد العشرية والنسب المئوية. وفي النهاية نكون عرفنا إزاي نقدر نقارن ونرتب الكسور والأعداد العشرية والنسب المئوية من خلال كتابة الكسور والأعداد العشرية على صورة نسب مئوية.