تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: مساحة المستطيل

أحمد مدحت

يوضح الفيديو مفهوم مساحة المستطيل، والصيغة الرياضية (القاعدة) المستخدمة لإيجاد مساحة المستطيل، مع أمثلة توضيحية.

٠٥:٢١

‏نسخة الفيديو النصية

هنتكلّم عن مساحة المستطيل. في الفيديو ده هنعرف يعني إيه مساحة المستطيل. وكمان هنعرف إيه هي الصيغة الرياضية، أو القانون اللي هنستخدمه، علشان نجيب مساحة مستطيل. هيظهر لنا مستطيل. المقصود بمساحة المستطيل، هي عبارة عن مساحة السطح المحصورة بين أضلاع المستطيل. فبالنسبة للمستطيل اللي عندنا، لو ظلّلنا السطح اللي موجود جوّه المستطيل، زيّ ما هيظهر لنا. المنطقة المظلّلة دي بقى، هي مساحة المستطيل.

فبالنسبة للمستطيل اللي عندنا. لو فرضنا إن مساحته هي م، وطول المستطيل س، وعرضه ص. مساحة المستطيل ده واللي هي م، هتساوي حاصل ضرب طوله اللي هو س، في عرضه اللي هو ص. يعني مساحة المستطيل، واللي هي م، تساوي س في ص. يعني م تساوي س ص. معنى كده إن إحنا نقدر نوجد مساحة المستطيل، لو معانا طوله، ومعانا عرضه.

هنشوف مثال على إيجاد مساحة المستطيل، بس في الصفحة اللي جايّة. هنقلب الصفحة. هيظهر لنا المثال. عندنا في المثال ملعب كرة قدم على شكل مستطيل. طوله مية متر، وعرضه ستين متر. وعايزين نوجد مساحة الملعب.

الملعب اللي عندنا على شكل مستطيل. وعلشان نوجد مساحته، فإحنا كأننا بنوجد مساحة مستطيل. ومساحة المستطيل بتساوي حاصل ضرب طوله في عرضه. وبالتالي مساحة الملعب هتساوي طول الملعب، في عرض الملعب. معنى كده إن مساحة الملعب، واللي هنرمز لها بالرمز م، تساوي مية في ستين. يعني م تساوي ست آلاف. يعني هتبقى مساحة الملعب اللي عندنا هي ست آلاف متر مربع.

فيه عندنا ملحوظة، وهي وإحنا بنوجد المساحة، بنضرب كمان الوحدات. وعلشان كده، وحدة المساحة بتكون عبارة عن وحدات مربعة. ففي المثال اللي عندنا، لمّا جِبنا مساحة الملعب، ضربنا طول الملعب في عرضه. وكان طول الملعب عبارة عن مية متر، وعرضه عبارة عن ستين متر. فلمّا ضربنا مية في ستين، كان الناتج ست آلاف. ومتر في متر، بمتر مربع. وبالتالي هنلاقي إن مساحة الملعب كانت وحدتها متر مربع، يعني وحدة مربعة.

بعد كده هنشوف مثال، نعرف بيه إزاي نقدر نستخدم مساحة المستطيل، علشان نوجد طول المستطيل، أو عرضه. هنقلب الصفحة. هيظهر لنا المثال. عندنا في المثال إن مساحة مستطيل هي تلاتين سنتيمتر مربع، وطوله هو ستة سنتيمتر. وعايزين نوجد عرضه.

بالنسبة للمثال اللي عندنا، فإحنا هنحلّه بطريقتين. الطريقة الأولى: هنكتب المعادلة، بعد كده نعوّض، وبعد كده نحلّ المعادلة. والطريقة التانية: هنكتب المعادلة، وهنحلّها الأول، وبعد كده نعوّض. هنبدأ بالطريقة الأولى. بالنسبة لمساحة المستطيل، فهي بتساوي حاصل ضرب طول المستطيل، في عرضه. هنرمز لمساحة المستطيل بالرمز م، وطول المستطيل بالرمز س، وعرضه بالرمز ص. معنى كده إن م تساوي س ص.

وإحنا عايزين نوجد عرض مستطيل، يعني عايزين نوجد قيمة ص. بالنسبة لمساحة المستطيل، واللي هي م، فهي بتساوي تلاتين سنتيمتر مربع. وبالنسبة لطول المستطيل، واللي هو س، فهو بيساوي ستة سنتيمتر. فهنعوّض بتلاتين مكان م، وبستة مكان س. فهيبقى عندنا تلاتين تساوي ستة ص. بعد كده هنحلّ المعادلة دي، علشان نوجد قيمة ص، واللي بتمثّل عرض المستطيل. فهنقسم طرفَي المعادلة على ستة. فهنلاقي ص تساوي خمسة. كده في الطريقة الأولى كتبنا المعادلة، وبعد كده عوّضنا فيها، وبعد كده حلّينا المعادلة.

هنشوف الطريقة التانية. هنكتب المعادلة، وهي: م تساوي س ص. وإحنا عايزين نوجد عرض المستطيل، اللي هو ص. وبالتالي عايزين نعزل ص، ونخلّيها في طرف واحد من الطرفين بتوع المعادلة. فهنقسم طرفَي المعادلة على س. فهنلاقي ص تساوي م على س.

بالنسبة لِـ م، واللي هي مساحة المستطيل، فهي بتساوي تلاتين سنتيمتر مربع. وبالنسبة لِـ س، واللي هي طول المستطيل، فهي بتساوي ستة سنتيمتر. فهنعوّض في المعادلة اللي عندنا بتلاتين، بدلًا من م. وبستة بدلًا من س. فهنلاقي ص تساوي تلاتين على ستة، يعني هتساوي خمسة.

هنلاحظ إن قيمة ص، من خلال الطريقتين اللي إحنا استخدمناهم، هي خمسة. وبالنسبة لِـ ص، فهي بترمز لعرض المستطيل. بالتالي عرض المستطيل هو خمسة سنتيمتر. وبكده يبقى إحنا أوجدنا عرض المستطيل.

بكده يبقى إحنا في الفيديو ده، عرفنا يعني إيه مساحة المستطيل. وكمان عرفنا إيه هي الصيغة الرياضية، أو القانون اللي بنستخدمه علشان نوجد مساحة المستطيل. وعرفنا إن إحنا علشان نوجد مساحة المستطيل، محتاجين نعرف طول المستطيل، وعرضه. وده لأن مساحة المستطيل تساوي حاصل ضرب طوله وعرضه.