فيديو: إيجاد الاحتمال التجريبي لحدث ما بمعلومية جدول يمثِّل نتائج تجربة مكعب أعداد

نرد له ستة أوجه عليها الأرقام من ١ إلى ٦. رُمي النرد ٢٦ مرة وسُجِّل عدد مرات ظهور كل عدد في الجدول. أوجد الاحتمال العملي لرمي النرد والحصول على العدد ٤.

٠٢:٤١

‏نسخة الفيديو النصية

نرد له ستة أوجه عليها الأرقام من واحد إلى ستة. رُمي النرد ستة وعشرين مرة، وسُجّل عدد مرات ظهور كل عدد في الجدول، أوجد الاحتمال العملي لرمي النرد والحصول على العدد أربعة.

ومُعطى عندنا الجدول اللي قدامنا، والجدول ده بيوضح إننا لمّا رمينا النرد ستة وعشرين مرة، كل وجه من أوجه النرد الستة ظهرت كام مرة، فيعني لمّا كان عندنا القيمة واحد، يعني لمّا رمينا النرد وطلع قيمته واحد، أو طلع الوجه اللي هو مكتوب عليه واحد؛ اتكررت تمَن مرات، ولمّا رمينا النرد وطلع الوجه اللي مكتوب عليه اتنين؛ فالعملية دي اتكررت أربع مرات، وهكذا.

فالمطلوب مننا في السؤال إننا نوجد الاحتمال العملي لرمي النرد والحصول على العدد أربعة. والاحتمال العملي هنا معناها الاحتمال التجريبي، وهو الاحتمال اللي مبني على التجربة؛ يعني لمّا عملنا تجربة إننا رمينا النرد ستة وعشرين مرة، حصل إنه كام مرة حصلنا على العدد أربعة.

وفي الأول خلينا نفتكر إن الاحتمال التجريبي لحدث ما بيساوي عدد مرات الحصول على الحدث على عدد المحاولات الكلي؛ فبالتالي عشان نوجد الاحتمال العملي إننا نحصل على العدد أربعة، فمعنى كده إن الاحتمال ده هيبقى بيساوي … بيساوي عدد مرات الحصول على الحدث؛ يعني حصلنا على العدد أربعة كام مرة لمّا رمينا حجر النرد. فمن الجدول هنلاحظ إننا لمّا رمينا حجر النرد وظهر الوجه اللي مكتوب عليه أربعة، العملية دي اتكررت مرتين؛ فبالتالي هتبقى عدد مرات الحصول على الحدث بتساوي اتنين اللي هو عدد مرات الحصول على العدد أربعة، على عدد المحاولات الكلي. ومُعطى عندنا في السؤال إن النرد اترمى ستة وعشرين مرة، فهو ده عدد المحاولات الكلي؛ فبالتالي هيبقى عدد المحاولات الكلي هو ستة وعشرين، فبالتالي هيبقى احتمال الحصول على العدد أربعة بيساوي اتنين على ستة وعشرين، ونقدر نختصر الكسر عن طريق إننا نقسم البسط والمقام على اتنين، فلمّا نقسم في البسط اتنين على اتنين هتساوي واحد، وأما في المقام هنقسم ستة وعشرين على اتنين واللي هتساوي تلتاشر.

فيبقى الاحتمال عندنا واحد على تلتاشر؛ وبالتالي هيبقى الاحتمال العملي لرمي النرد والحصول على العدد أربعة هو واحد على تلتاشر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.