فيديو: تحديد المربعات

أيٌّ من الأشكال الآتية مربع؟ [أ] الشكل (١) فقط. [ب] الأشكال (١)، (٢). [ج] الأشكال (١)، (٣)، (٤). [د] الأشكال (٢)، (٣)، (٤). [ﻫ] الأشكال (١)، (٢)، (٤).

٠٢:٣٠

‏نسخة الفيديو النصية

أيُّ من الأشكال الآتية مربع؟ أ: الشكل واحد فقط. ب: الأشكال واحد، واتنين. ج: الأشكال واحد، وتلاتة، وأربعة. د: الأشكال اتنين، وتلاتة، وأربعة. ﻫ: الأشكال واحد، واتنين، وأربعة.

عاوزين نعرف من الأربع أشكال اللي قدامنا دول، مين فيهم اللي على شكل مربع. علشان نعرف نحل السؤال ده، هنفتكر الأول خواصّ المربع. المربع شكل رباعي الأضلاع. أضلاعه متساوية في الطول. قياس كل زاوية من زواياه تسعين درجة. فتعالوا بقى نشوف الخواصّ دي، تنطبق على الشكل رقم واحد ولّا لأة.

الشكل الأول شكل فعلًا مكوّن من أربع أضلاع. وأضلاعه الأربعة متساوية في الطول. وقياس كل زاوية من زواياه فعلًا تسعين درجة. فده معناه إن الشكل الأول ده فعلًا مربع. نعمل عليه صح.

نيجي للشكل التاني. الشكل التاني فعلًا شكل رباعي الأضلاع. مكوّن من أربع أضلاع. وأضلاعه كلها متساوية في الطول. بس زواياه مش قائمة، أو مش بتساوي تسعين درجة. فده معناه إن الشكل ده، ما ينفعش نقول عليه مربع.

نيجي للشكل التالت. الشكل التالت شكل رباعي. أضلاعه كلها متساوية في الطول. وكمان قياس كل زاوية من زواياه، فعلًا تسعين درجة. يبقى نقدر نقول على الشكل التالت ده، هو كمان مربع.

نيجي للشكل الرابع. الشكل الرابع شكل رباعي الأضلاع فعلًا. له أربع أضلاع. والأربع أضلاع بتوعه كلهم بيساووا بعض. يعني متساويين في الطول. وكل زاوية من زواياه قياسها تسعين درجة. فبالتالي نقدر نعتبر إن الشكل الرابع كمان، عبارة عن مربع.

يبقى كده بقى إيه الأشكال اللي إحنا اخترناها؟ الشكل الأول، والتالت، والرابع. ولو جينا نبصّ على الاختيارات، هنلاقي إن الاختيار ج، هو الاختيار الصح.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.