فيديو: إيجاد المنوال لمجموعة بيانات

يوضح الفيديو البيانات، والمنوال؛ وهو العدد أو الأعداد الأكثر تكرارًا في مجموعة من البيانات، وكيفية إيجاد المنوال.

٠٢:٣٤

‏نسخة الفيديو النصية

إيجاد المنوال لمجموعة من البيانات.

في الفيديو ده هنعرف إيه هو المنوال، وإزاي بنوجده. البيانات هي مجموعة من المعلومات العددية اللي ليها علاقة بموضوع معيّن. وفيه أكتر من طريقة لوصف المعلومات دي، ومنها المنوال.

المنوال هو العدد أو الأعداد الأكثر تكرارًا لمجموعة من البيانات. يعني لو مثلًا مجموعة من البيانات بالشكل ده. فهنلاقي إن العدد اتنين متكرر تلات مرات. بينما باقي الأعداد يا إما متكرر مرتين، أو ظهر مرة واحدة.

طيب لو كان فيه أكتر من عدد متكررين بنفس عدد المرات؟ يعني لو مثلًا مجموعة البيانات بالشكل ده. فهنلاقي إن العدد اتنين اتكرر مرتين، والعدد أربعة اتكرر مرتين برضو. ففي الحالة دي المنوال هيكون العددين. يعني المنوال هيساوي اتنين وأربعة.

في امتحان لمادة الرياضيات كانت درجات ثمانية طلاب كالتالي: ستة، سبعة وخمسة من عشرة، سبعة وخمسة من عشرة، ثمانية، ثمانية، ثمانية وخمسة من عشرة، تسعة، عشرة. أوجد المنوال.

بالنظر للبيانات، نقدر نلاحظ إن العدد سبعة وخمسة من عشرة متكرر مرتين. وبرضو العدد تمنية متكرر مرتين. وبالتالي المنوال هيساوي: سبعة وخمسة من عشرة، وتمنية.

أعمار مجموعة من الطلاب هي: اثنا عشر، عشرة، ثلاثة عشر، أربعة عشر، أحد عشر، ثلاثة عشر، تسعة. أوجد المنوال، ثم صِف البيانات.

بالنظر للبيانات، هنلاقي إن العدد تلتاشر اتكرر مرتين، وباقي البيانات موجودة مرة واحدة. وبالتالي المنوال هيساوي تلتاشر.

ولو عاوزين نوصف البيانات، هنشوف إيه أكبر قيمة وأصغر قيمة. فنقدر نلاحظ إن أكبر قيمة هي أربعتاشر، وأصغر قيمة هي تسعة. ده معناه إن أكبر طالب عمره أربعتاشر سنة، وأصغر طالب عمره تسع سنوات.

يبقى في الفيديو ده اتكلّمنا عن البيانات. وعرفنا إيه هو المنوال، وهو العدد أو الأعداد الأكثر تكرارًا لمجموعة من البيانات. وعرفنا إزاي بنوجده.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.