فيديو: قسمة الأعداد العشرية على أعداد طبيعية

يوضح الفيديو كيفية قسمة الأعداد العشرية على الأعداد الطبيعية، وكيفية التحقق من الإجابة باستخدام التقدير، وأمثلة عليها.

٠٦:٥٧

‏نسخة الفيديو النصية

قسمة الأعداد العشرية على أعداد طبيعية.

في الفيديو ده هنتكلّم عن عملية القسمة للأعداد العشرية على الأعداد الطبيعية. قسمة الأعداد العشرية ما بتختلفش كتير عن قسمة الأعداد الطبيعية. والاختلاف بيبقى في مكان العلامة العشرية في الناتج. يعني مثلًا لو عاوزين نقسم ستة وتمنية من عشرة على اتنين. فباستخدام التقدير، هنعتبر إن ستة وتمنية من عشرة بتساوي تقريبًا ستة. فهنقول ستة على اتنين هتساوي تلاتة.

بعدين هنحل باستخدام القسمة المطولة زي ما هيظهر. هنلاحظ إن بعد ستة فيه علامة عشرية. فهنحطها في الناتج بمجرد ما نوصل لها في المقسوم. وبعدين نكمل قسمة. يبقى ستة وتمنية من عشرة على اتنين يساوي تلاتة وأربعة من عشرة. وبمقارنة الناتج ده بناتج التقدير هنلاقي الإجابة منطقية.

طيب لو عاوزين نقسم عدد عشري على عدد طبيعي مكوّن من رقمين. برضو هنحل بنفس الطريقة.

نتنقل لصفحة تانية. مثلًا لو عاوزين نقسم سبعة وسبعة من عشرة على أربعتاشر. فباستخدام التقدير، هنعتبر إن سبعة وسبعة من عشرة يساوي تقريبًا عشرة على … هنعتبر إن أربعتاشر بتساوي تقريبًا عشرة. يبقى عشرة على عشرة بيساووا واحد.

بعد كده نحل باستخدام القسمة المطوّلة. بما إن العلامة العشرية بعد رقم واحد من الشمال. والمقسوم عليه مكوّن من رقمين. يبقى هنحط العلامة العشرية في الناتج، ونكمل حل بإننا نقسم الرقمين على الرقمين. بما إننا على يمين العلامة العشرية في المقسوم، فممكن نضيف أصفار عشان نكمل العملية. فهنحط صفر على يمين السبعة بالشكل ده، ونكمل حل. يبقى سبعة وسبعة من عشرة على أربعتاشر بتساوي خمسة وخمسين من مية.

لو عاوزين نتأكد من الناتج ممكن نضربه في المقسوم عليه. فلو طلع الناتج هو المقسوم اللي هو سبعة وسبعة من عشرة. يبقى إحنا حلّينا بشكل صحيح. وبمقارنة الناتج بناتج التقدير هنلاقي إجابتنا منطقية.

نتنقل لصفحة تانية. إذا لقينا عملية القسمة مستمرّة يبقى هنقرّب الناتج للقيمة المكانية المطلوبة. يعني مثلًا اشترى أحمد اتناشر قطعة حلويات بأربعتاشر واتنين وتسعين من مية جنيه. إذا كان سعر القطع كلها متساوي أوجد سعر القطعة الواحدة بالجنيه.

يبقى السؤال المطلوب حله هو أربعتاشر واتنين وتسعين من مية، اللي هو تمن الحلويات، على اتناشر اللي هو عددها. عشان نعرف سعر القطعة الواحدة. باستخدام التقدير ممكن نقول إن العملية هتبقى خمستاشر على اتناشر. فهنستخدم القسمة المطوّلة، بعدين نحط العلامة العشرية ونكمل حَلّ. بما إن إحنا بنحل على يمين العلامة العشرية في المقسوم والأرقام خلصت، فهنزوّد صفر ونكمل حل.

بما إن المطلوب السعر بالجنيه، والجنيه مكوّن من مية قرش. يبقى هنقرّب الإجابة لأقرب جزء من مية ونوقف حل. وبما إننا وصلنا في الناتج لأجزاء من ألف، يبقى هنوقّف حل ونقرب الناتج اللي وصلنا له، اللي هو واحد وميتين تلاتة وأربعين من ألف، لأقرب جزء من مية. فهيبقى تقريبًا واحد وأربعة وعشرين من مية. يبقى سعر قطعة الحلويات الواحدة بيساوي واحد وأربعة وعشرين من مية جنيه. أو جنيه وأربعة وعشرين قرش.

وبكده نبقى خلّصنا الفيديو ده اللي اتكلمنا فيه عن قسمة الأعداد العشرية على أعداد طبيعية مكوّنة من رقم واحد ومن رقمين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.