تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد مساحة مثلث باستخدام العلاقة بين الخطوط المستقيمة المتوازية والمثلثات التي تتشارك في نفس القاعدة

سوزان فائق

إذا كان ﺃﺏﺟﺩ مربعًا محيطه ٢٣٢ سم. فأوجد طولَي ﺃﺏ، ﺟﻫ، ثم أوجد مساحة ∆ﻫﺩﺏ.

٠٢:٤٦

‏نسخة الفيديو النصية

إذا كان أ ب ﺟ د مربعًا محيطه ميتين اتنين وتلاتين سنتيمتر. فأوجد طولَي أ ب وَ ﺟ ﻫ، ثم أوجد مساحة المثلث ﻫ د ب.

محيط المربع بيساوي طول الضلع في أربعة. ومُعطى محيط المربع بميتين اتنين وتلاتين سنتيمتر؛ يعني ده هيساوي طول الضلع في أربعة. علشان نوجد طول الضلع، هنقسم الطرفين على أربعة. يبقى طول ضلع المربع لمّا هنختصر الأربعة مع الأربعة، يبقى ميتين اتنين وتلاتين على أربعة، هيساوي تمنية وخمسين سنتيمتر.

يبقى أ ب ده إحدى أطوال أضلاع المربع اللي هو هيساوي تمنية وخمسين سنتيمتر. ودي أول جزئية في السؤال.

بعد كده عاوزين نوجد طول ﺟ ﻫ. فبما إن ب ﻫ هيساوي ﻫ ﺟ؛ يبقى ﻫ ﺟ هيبقى نص طول ﺟ ب. وَ ﺟ ب ده إحدى أطوال أضلاع المربع، يبقى هيبقى طوله تمنية وخمسين سنتيمتر. يبقى ﺟ ﻫ هيساوي تمنية وخمسين على الاتنين، هيساوي تسعة وعشرين سنتيمتر. وده المطلوب التاني في السؤال.

المطلوب التالت عايزين نوجد مساحة المثلث ﻫ د ب. مساحة المثلث بتساوي نصف طول القاعدة في الارتفاع. والارتفاع ده بيبقى المسافة العمودية ما بين رأس المثلث وقاعدته. فبما إن الشكل أ ب ﺟ د ده مربع. يبقى د ﺟ ده هو المسافة العمودية ما بين رأس المثلث اللي هو الـ د، والـ ب ﻫ اللي هي قاعدة المثلث.

يبقى مساحة المثلث ﻫ د ب نص في القاعدة اللي هي ب ﻫ في د ﺟ. هتساوي نص في … ب ﻫ طولها تسعة وعشرين سنتيمتر زيها زي ﺟ ﻫ، يبقى نص في تسعة وعشرين، في د ﺟ اللي هو أحد أطوال أضلاع المربع، اللي هو هيساوي تمنية وخمسين سنتيمتر، هيساوي تمنمية واحد وأربعين سنتيمتر مربع. يبقى هي دي مساحة المثلث ﻫ د ب المطلوبة.