فيديو: إيجاد العدد المضاف المجهول في عبارة جمع تتضمَّن أعدادًا حتَّى ٢٠‎

أوجد القيمة المجهولة: ٥ + _ = ١٣.

٠٢:٠٦

‏نسخة الفيديو النصية

أوجد القيمة المجهولة: خمسة زائد نقط يساوي تلتاشر.

عاوزين نعرف خمسة نزوّد عليها كام علشان يكون الناتج تلتاشر. فهناخد مثلًا خمس تفاحات. واحد، اتنين، تلاتة، أربعة، خمسة. ونفضل نزوّد عليهم تفاحة تفاحة، لحدّ ما نوصل للتلتاشر، ونشوف في الآخر إحنا زوّدنا كام.

فهنزوّد على الخمسة تفاحة، يبقوا … ونزوّد كمان واحدة، فيبقوا سبعة. وبالمثل: تمنية، تسعة، عشرة، حداشر، اتناشر، تلتاشر. ما دام وصلنا لحدّ التلتاشر، يبقى ما نزوّدش تفاح تاني، خلاص.

تعالوا بقى نشوف إحنا زوّدنا كام تفاحة على الخمس تفاحات دول. هنلاقينا زوّدنا واحد، اتنين، تلاتة، أربعة، خمسة، ستة، سبعة، تمنية. يبقى إحنا زوّدنا على الخمسة، تمنية؛ علشان يكون الناتج كله تلتاشر.

دي طريقة علشان نعرف بيها القيمة المجهولة في السؤال اللي عندنا. فيه طريقة تانية ممكن نستخدمها. وهو إننا نطرح تلتاشر ناقص خمسة. تلتاشر ناقص خمسة هتساوي تمنية. وهي بتكون نفس الناتج المطلوب.

يبقى إمّا إننا نحسب بدماغنا، ونشوف كمّلنا كام عَ الخمسة لحدّ ما نوصل للتلتاشر ونكتب الناتج. أو إننا نطرح على طول خمسة من التلتاشر. يعني برضو هنعدّ بعد الخمسة، لحدّ ما نوصل للتلتاشر، ونشوف عدّينا كام.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.