فيديو: ضرب الأعداد الصحيحة

يوضِّح الفيديو كيفية إيجاد ناتج ضرب عدد صحيح في عدد صحيح آخر.

٠٦:٣٨

‏نسخة الفيديو النصية

دلوقتي هنتكلّم عن ضرب الأعداد الصحيحة. هنتعلّم إزّاي نجيب ناتج ضرب أعداد صحيحة.

هيظهر قدامي دلوقتي نشاط. في النشاط ده هنستخدم قطع العَدّ السالبة في ضرب الأعداد الصحيحة. هلاحظ إن عندي أربع مجموعات، في كل منها تلات قطع سالبة. ولمّا هحط الأربع مجموعات مع بعض، هحصل على ناتج اتناشر قطعة سالبة أو سالب اتناشر. وبكده أقدر أقول إن الضرب هو عملية جمع متكررة. يعني أقدر أقول إنه أربعة في سالب تلاتة تساوي: سالب تلاتة، زائد سالب تلاتة، زائد سالب تلاتة، زائد سالب تلاتة. يعني جمعنا سالب تلاتة أربع مرات؛ يعني هيساوي سالب اتناشر.

للتوضيح أكتر باستخدام خط الأعداد، هنلاحظ إنه لمّا نبتدي من الصفر ونجمع سالب تلاتة أربع مرات، هنوصل لحدّ سالب اتناشر. وبكده أقدر أقول إنه فعلًا ناتج ضرب أربعة في سالب تلاتة هيساوي سالب اتناشر.

هنكمّل في الصفحة اللي جاية.

باستعمال خاصية الإبدال هنلاحظ إنه أربعة في سالب تلاتة هيساوي سالب تلاتة في أربعة. ودي اسمها خاصية الإبدال.

دلوقتي هيظهر قدامي القاعدة الأولى: ناتج ضرب عددين صحيحين مختلفي الإشارة هو سالب. يعني مثلًا ستة في سالب أربعة هيساوي سالب أربعة وعشرين. سالب خمسة في سبعة هيساوي سالب خمسة وتلاتين.

هناخد دلوقتي مثال: احسب كل من؛ أ: تلاتة في سالب خمسة.

بما إن العددان الصحيحان مختلفان في الإشارة فالناتج هيكون سالب. يعني أقدر أقول إن تلاتة في سالب خمسة هيساوي سالب خمستاشر.

سالب ستة في تمنية.

بما إن العددان الصحيحان مختلفان في الإشارة؛ فالناتج برضو هيكون سالب. يعني أقدر أقول إنه سالب ستة في تمنية هيساوي سالب تمنية وأربعين.

هنكمّل في الصفحة اللي جاية.

دلوقتي عشان أجيب ناتج ضرب عددين سالبين، هنستعمل النمط التالي: اتنين في سالب تلاتة هيساوي سالب ستة. واحد في سالب تلاتة هيساوي سالب تلاتة. صفر في سالب تلاتة هيساوي صفر. يعني هنلاحظ إنه في النمط ده كل مرة بجمع تلاتة.

يعني لمّا هاجي على خط الأعداد وهبتدي من سالب ستة وهجمع تلاتة، هوصل لسالب تلاتة. وبعدين من سالب تلاتة هجمع تلاتة هوصل للصفر. وبعدين عشان أجيب ناتج ضرب سالب واحد في سالب تلاتة، هجمع تلاتة على الصفر. يعني زي ما هو موضح على خط الأعداد هوصل لتلاتة. يعني ناتج الضرب هيكون تلاتة. وعشان أجيب ناتج ضرب سالب اتنين في سالب تلاتة هكمّل النمط، وهجمع تلاتة. يعني تلاتة زائد تلاتة هوصل لستة. وبكده أقدر أقول إنه ناتج الضرب سالب اتنين في سالب تلاتة هيساوي ستة.

وبكده هنستنتج إنه ناتج ضرب عدد موجب في عدد سالب هيساوي عدد سالب. وناتج ضرب عدد سالب في عدد سالب هيساوي عدد موجب. وناتج ضرب صفر في أي عدد هيساوي صفر.

وبالتالي هنوصل لتاني قاعدة: ناتج ضرب عددين صحيحين لهما الإشارة نفسها هو عدد موجب. يعني اتنين في ستة هيساوي اتناشر. وسالب عشرة في سالب ستة هيساوي ستين.

دلوقتي هناخد مثال في الصفحة اللي جاية.

احسب كل من؛ أ: سالب حداشر في سالب تسعة.

هنلاحظ إنه العددان الصحيحان لهما نفس الإشارة. وبالتالي أقدر أقول إنه ناتج الضرب هيكون موجب. يعني سالب حداشر في سالب تسعة هيساوي تسعة وتسعين.

ب: سالب أربعة الكل تربيع.

سالب أربعة الكل تربيع يعني سالب أربعة في سالب أربعة. هنلاحظ إنه العددان الصحيحان لهما نفس الإشارة. وبكده أقدر أقول إنه ناتج الضرب هيكون موجب. يعني هيساوي ستاشر.

ج: سالب تلاتة في سالب أربعة في سالب اتنين.

في البداية هنستخدم خاصية التجميع. يعني هحسب سالب تلاتة في سالب أربعة. وبعدين هضرب الناتج في سالب اتنين. سالب تلاتة في سالب أربعة هيساوي اتناشر. يعني هيساوي اتناشر في سالب اتنين. هنلاحظ إنه العددان الصحيحان مختلفان في الإشارة؛ وبكده أقدر أقول إنه ناتج الضرب هيكون سالب. يعني اتناشر في سالب اتنين هيساوي سالب أربعة وعشرين.

هنكمّل في الصفحة اللي جاية.

بكده هنكون اتعلّمنا إنه ناتج ضرب عدد موجب في عدد موجب هيكون عدد موجب. وناتج ضرب عدد سالب في عدد سالب هيساوي برضو عدد موجب؛ لأنه ناتج ضرب عددين صحيحين لهما الإشارة نفسها هو عدد موجب. وناتج ضرب عدد موجب في عدد سالب هيساوي عدد سالب. وناتج ضرب عدد سالب في عدد موجب برضو هيساوي عدد سالب؛ لأنه ناتج ضرب عددين صحيحين مختلفي الإشارة هيكون هو عدد سالب.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.