تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ضرب عددين مكوَّنين من رقمين

سوزان فائق

يوضح الفيديو كيفية ضرب عددين مكوَّنين من رقمين، وأمثلة من حياتنا.

٠٧:٣٠

‏نسخة الفيديو النصية

هنتكلّم في الفيديو ده عن ضرب عددين مكونين من رقمين. هنعرف إزّاي نضرب عددين بالشكل اللي قدامنا ده، فيهم آحاد وعشرات، وآحاد وعشرات، كل عدد مكوّن من رقمين.

لمّا بنيجي نفكر إزّاي نضرب العددين دول. فبنيجي نقول مثلًا التمنية وأربعين دي مضروبة في الواحد وتلاتين. والواحد وتلاتين دي عبارة عن واحد زائد تلاتين. يعني كأني بضرب التمنية وأربعين في الواحد. وبعد كده التمنية وأربعين في التلاتين. وأجمعهم على بعض. وممكن نعمل العكس بإن إحنا نقول إن تمنية وأربعين عبارة عن تمنية زائد أربعين. وبعدين نضربهم في الواحد وتلاتين. الواحد وتلاتين دي نضربها لوحدها في التمنية. وبعد كده نضربها في الأربعين.

الطريقة دي علشان نستخدمها فالأسهل إن إحنا نحط العددين فوق بعض بالشكل ده. تمنية وأربعين، وبعدين تحتها الواحد وتلاتين، ونضربهم في بعض. أول حاجة هنضرب خانة الآحاد اللي في الواحد وتلاتين في التمنية وأربعين. هنضرب الواحد في التمنية هيبقى تمنية. وبعدين الواحد في الأربعة هتبقى أربعة. وهنجمعهم على … التلاتة اللي مضروبة في التمنية وأربعين. بس ناخد بالنا إن دي مش تلاتة دي تلاتين؛ لأنها تلات عشرات. هي في خانة العشرات. فالمفروض بنحط الصفر هنا لإنها في خانة العشرات. وبعد كده نضرب التلاتة في التمنية وأربعين. هناخدها في الجنب كده. تمنية وأربعين في تلاتة. تلاتة في تمنية بأربعة وعشرين. أربعة ومعانا الاتنين. أربعة في تلاتة باتناشر، والاتنين آدي أربعتاشر. يبقى الناتج تمنية وأربعين في تلاتة هيساوي مية أربعة وأربعين.

هنجمع الناتجين دول بتاع ضرب الآحاد وضرب العشرات. يبقى تمنية زائد الصفر هيبقى تمنية. وأربعة زائد أربعة هيبقى تمنية. وهنا صفر وهنا صفر يبقى صفر زائد الأربعة أربعة. والواحد زائد الصفر آدي واحد. يبقى حاصل ضرب التمنية وأربعين في الواحد وتلاتين هو ألف ربعمية تمنية وتمانين.

في مثال مدرسة ابتدائية بها أربعة وستين فصلًا. في كل فصل تمنية وخمسين تلميذًا. احسب العدد الكلي للتلاميذ.

يعني عايزين نضرب الأربعة وستين في التمنية وخمسين. هنرتّب العددين فوق بعض؛ بحيث إن كل خانة تحتها الخانة اللي زيها. يعني خانة الآحاد تحتها خانة الآحاد. وخانة العشرات تحتها خانة العشرات. وهنضربهم في بعض. أول حاجة خانة الآحاد في العدد التاني تمنية، هنضربها في الأربعة وستين. وبعد كده بنضرب خانة العشرات الخمسة في الأربعة وستين. ونجمعهم على بعض.

التمنية وخمسين زي ما قلنا أكنها عبارة عن تمنية زائد الخمسين. علشان ناخد بالنا إن دايمًا فيه صفر معانا طالع من عند الخمسة اللي في خانة العشرات. لمّا هنضرب التمنية في الأربعة وستين، هناخدها في الجنب كده. تمنية في أربعة باتنين وتلاتين. اتنين ومعانا التلاتة. ستة في تمنية بتمنية وأربعين. وتلاتة، واحد وخمسين. يبقى حاصل ضرب التمنية في الأربعة وستين هو خمسمية واتناشر. هنجمع عليه ناتج ضرب الخمسة أعشار في الأربعة وستين، اللي إحنا قلنا عليها خمسين في أربعة وستين. يبقى هننزّل الصفر الأول بتاع خمسة اللي في خانة العشرات. وبعد كده نضرب الخمسة في الأربعة وستين. يبقى أربعة وستين في الخمسة. خمسة في أربعة بعشرين. صفر ومعانا اتنين. اتنين هنجمعها على حاصل ضرب الخمسة في الستة، اللي همّ تلاتين. يبقى اتنين وتلاتين. يبقى هنبدأ من عند خانة العشرات. نرتب التلتمية وعشرين.

وبعد كده هنجمع. الاتنين زائد الصفر باتنين. الواحد زائد صفر بواحد. خمسة زائد اتنين بالسبعة. وما فيش حاجة في خانة الآلاف في الخمسمية واتناشر، يبقى صفر زائد تلاتة بتلاتة. يبقى العدد الكلي للتلاميذ في المدرسة هو تلات آلاف سبعمية واتناشر تلميذًا.

مثال كمان من حياتنا العملية: يقطع الذئب تلاتة وأربعين كيلو مترًا في الساعة. فكم يقطع في اتناشر ساعة؟

يعني عايزين نضرب التلاتة وأربعين في الاتناشر. التلاتة في الاتنين يبقى ستة. اتنين في أربعة دي تمنية. يبقى ضربنا اللي في خانة الآحاد في العدد التاني، في التلاتة وأربعين. وبعد كده هنضرب الواحد اللي في خانة العشرات اللي في الاتناشر. هنبدأ من عند خانة العشرات يبقى واحد في تلاتة وأربعين بتلاتة وأربعين..

وبعدين نجمع. ستة زائد صفر هتبقى ستة. تمنية زائد تلاتة آدي حداشر، ومعانا الواحد. يبقى أربعة زائد الواحد يبقى خمسة. إذن يقطع الذئب خمسمية وستاشر كيلومترًا في اتناشر ساعة.

يبيع متجر ساعات خمسة وتلاتين ساعة بسعر الواحدة أربعة وتسعين جنيه، كعرض بمناسبه الأعياد. اوجد الثمن الإجمالي للساعات.

يعني عايزين نضرب خمسة وتلاتين ساعة في أربعة وتسعين جنيه؛ عشان نوجد الثمن الإجمالي. هنضرب خمسة وتلاتين في أربعة وتسعين. بضرب الآحاد الأول، اللي هو خمسة وتلاتين في الأربعة. يبقى أربعة في خمسة بعشرين. صفر، ومعانا الاتنين. تلاتة في أربعة باتناشر، واتنين آدي أربعتاشر. يبقى ناتج ضرب الأربعة في الخمسة وتلاتين، هو مية وأربعين. وهنجمعهم على ناتج ضرب التسعة في الخمسة وتلاتين. يبقى خمسة وتلاتين في تسعة. خمسة في تسعة بخمسة وأربعين. تلاتة في تسعة بسبعة وعشرين، وأربعة؛ واحد وتلاتين.

وبعد كده هنضيف الصفر بتاع التسع عشرات، ونكتب باقي الأرقام. خمسة واحد تلاتة؛ بحيث إن إحنا بنبدأ من عند خانة العشرات. وبعدين نجمع العددين. صفر مع صفر يبقى صفر. أربعة زائد خمسة آدي تسعة. واحد زائد واحد اتنين. وهننزل التلاتة؛ لأن ما فيش حاجة مجموعة عليها. إذن الثمن الإجمالي للساعات هو تلات آلاف ميتين وتسعين جنيه.

اتكلمنا في الفيديو ده إزّاي هنضرب عددين مكوّنين من رقمين. كل عدد فيه خانات آحاد وعشرات، بنرتبهم فوق بعض؛ بحيث إن كل خانة تحتها الخانة اللي زيها بالظبط. وبعد كده نبدأ بخانة الآحاد اللي موجودة في العدد التاني. نضربها في العدد الأولاني كله. وبعد كده العدد التاني ناخد منه العشرات، نحط منها الصفر بتاع العشرات، ونبدأ في ضرب الرقم اللي موجود في خانة العشرات في العدد الأولاني كله. ولمّا هنجمعهم على بعض هيطلع لنا حاصل ضرب العددين المكوّنين من رقمين.