فيديو: قسمة الأعداد الصحيحة

أحمد لطفي

يوضح الفيديو كيفية قسمة الأعداد الصحيحة بطريقتين: استخدام الضرب، واستخدام قطع العد الموجبة والسالبة.

٠٦:١٥

‏نسخة الفيديو النصية

هتكلم عن قسمة الأعداد الصحيحة، وهنعرف إزاي نقدر نقسّم الأعداد الصحيحة باستخدام طريقتين: أول طريقة باستخدام الضرب، تاني طريقة استخدام قطع العدّ الموجبة والسالبة.

في البداية لو عايزين نوجِد ناتج سالب اتناشر على تلاتة باستخدام قطع العَدّ الموجبة والسالبة، أول خطوة هنمثّل سالب اتناشر عن طريق اتناشر قطعة سالبة، تاني خطوة نقسّم الاتناشر قطعة عَدّ سالبة إلى تلات مجموعات متساوية العدد، هنلاحظ إن عندنا تلات مجموعات كل مجموعة بداخلها أربع قطع عَدّ سالبة؛ وبالتالي لما يكون عندنا اتناشر قطعة عَدّ سالبة وقسّمناهم على تلات مجموعات كل مجموعة كان فيها أربع قطع عد سالبة، يعني نقدر نقول سالب اتناشر على تلاتة هيساوي سالب أربعة، وبكده نكون قدرنا نوجِد ناتج سالب اتناشر على تلاتة.

لو عندنا مثال آخر بالشكل ده، مطلوب نوجد ناتج سالب تمنية على أربعة باستخدام قطع العَدّ الموجبة والسالبة، في البداية هنمثّل سالب تمنية عن طريق تمن قطع عَدّ سالبة، تاني خطوة هنقسّمهم لأربع مجموعة متساوية العدد؛ وبالتالي هيكون عندنا في كل مجموعة قطعتين عَدّ سالبتين فقط، يعني نقدر نقول إن سالب تمنية على أربعة هيساوي سالب اتنين، وبكده نكون قدرنا نوجد ناتج سالب تمنية على الأربعة.

لو عندنا مثال آخر بالشكل ده، مطلوب نوجد ناتج خمستاشر على تلاتة باستخدام قطع العَدّ الموجبة والسالبة، في البداية هنمثّل خمستاشر عن طريق خمستاشر قطعة عَدّ موجبة، تاني خطوة هنقسّمهم لتلات مجموعات متساوية العدد بالشكل ده، هنلاحظ إن كل مجموعة فيها خمس قطع عَدّ موجبة؛ وبالتالي خمستاشر على تلاتة هيساوي خمسة، وبكده نكون قدرنا نوجِد ناتج خمستاشر على تلاتة.

لو عايزين نشوف إزاي هنستخدم الضرب في إيجاد ناتج قسمة الأعداد الصحيحة، لو عندنا مثال بالشكل ده مطلوب نوجد ناتج سالب عشرة على اتنين، عايزين نشوف إيه هو العدد اللي هنضربه في اتنين الناتج هيكون بيساوي سالب عشرة، بما إن سالب خمسة في اتنين هيساوي سالب عشرة، إذن سالب عشرة على اتنين هيساوي سالب خمسة، هنلاحظ إن ناتج عملية الضرب كان هو المقسوم، وإننا كنا بندور على عدد نضربه في المقسوم عليه؛ عشان يكون العدد ده اللي هو سالب خمسة ناتج القسمة، وهنلاحظ أيضًا بما إن المقسوم والمقسوم عليه كانت إشارتهم مختلفة؛ فناتج القسمة كان عدد سالب.

لو عندنا مثال آخر بالشكل ده، مطلوب نوجد ناتج أربعتاشر على سالب سبعة، محتاجين نشوف إيه العدد اللي هنضربه في سالب سبعة الناتج هيساوي أربعتاشر، فهنلاحظ بما إن سالب اتنين في سالب سبعة هيساوي أربعتاشر؛ إذن أربعتاشر علي سالب سبعة هيساوي سالب اتنين، وبنفس الطريقة هنلاحظ إن ناتج عملية الضرب كان هو المقسوم، وإننا كنا بندور على عدد نضربه في المقسوم عليه؛ عشان العدد ده هو يكون ناتج القسمة، وهنلاحظ أيضًا إن المقسوم والمقسوم عليه إشارتهم مختلفة؛ وبالتالي ناتج القسمة كان عدد سالب.

لو عندنا مثال آخر بالشكل ده، مطلوب نوجد ناتج سالب أربعة وعشرين على سالب ستة، محتاجين نشوف إيه العدد الي هنضربه في سالب ستة عشان الناتج يكون بيساوي سالب أربعة وعشرين، بما إن أربعة في سالب ستة هيساوي سالب أربعة وعشرين؛ إذن سالب أربعة وعشرين على سالب ستة هيساوي أربعة، هنلاحظ إن ناتج عملية الضرب هو المقسوم، وإننا كنا بندور على عدد يضّرب في المقسوم عليه؛ عشان العدد يكون ناتج القسمة، وهنلاحظ أيضًا إن المقسوم والمقسوم عليه كانت إشاراتهم متشابهة؛ وبالتالي ناتج القسمة هيكون عدد موجب؛ وبالتالي نقدر نستنج إن ناتج قسمة عددين صحيحين مختلفي الإشارة يكون سالبًا، زي تمنية على سالب اتنين هيساوي سالب أربعة، أو سالب تمنية على اتنين هيساوي سالب أربعة. ونقدر أيضًا نستنج إن ناتج قسمة عددين صحيحين متشابهين في الإشارة يكون موجبًا، زي مثلًا تمنية على اتنين هيساوي أربعة، أو سالب تمنية على سالب اتنين هيساوي أربعة،

في النهاية نكون عرفنا إزاي نقدر نقسّم الأعداد الصحيحة باستخدام قطع العَد الموجبة والسالبة أو باستخدام الضرب، وعرفنا أيضًا إن ناتج قسمة عددين صحيحين مختلفي الإشارة يكون سالبًا، وإن ناتج قسمة عددين صحيحين متشابهين في الإشارة يكون موجبًا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.