تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: تحديد وتكوين الأنماط

نهال عصمت

يتناول الفيديو مفهوم النمط، وطريقة تحديده، وتكوينه، ويوضِّح ذلك بالأمثلة.

٠٥:٣٧

‏نسخة الفيديو النصية

تحديد وتكوين الأنماط.

هنعرف يعني إيه نمط، وإزاي نحدّده وإزاي نعرف نكوّنه.

لو عندنا مجموعة من الأشكال بالشكل ده. نقدر نقول إن مجموعة الأشكال دي كوّنت نمط. ونقدر نقول على أول شكلين إنهم وحدة النمط. ومعنى إن وحدة النمط تبدأ تتكرر؛ آدي أول مرة، ودي تاني مرة، ممكن تتكرر بعد كده. نقدر نقول إن الأشكال دي كوّنت نمط. وإن أول شكلين عشان اتكرّروا بنفس الترتيب، إن هما دول وحدة النمط.

يبقى لمّا تتكرر وحدة النمط كذا مرة ورا بعض بنفس الترتيب. نقدر نقول إن الأشكال دي كوّنت نمط. يبقى كده فهمنا يعني إيه نمط، وإيه هي وحدة النمط.

هنبدأ نجيب صفحة جديدة، ونشوف أمثلة توضّح أكتر.

معطى النمط الآتي، والمطلوب هو نحدّد وحدة النمط.

عايزين نحدد وحدة النمط للنمط اللي موجود قدامنا. معنى كلمة وحدة النمط يبقى عندنا شكل أو شكلين أو أكتر، بيتكرروا بانتظام كذا مرة عشان يكونوا النمط. هنلاحظ إن أول شكلين بيتكرروا كل مرة عشان يكوّنوا النمط. يبقى نقدر نقول إن أول شكلين همّ وحدة النمط. يبقى كده قدرنا نحدد وحدة النمط.

نبدأ نشوف نمط تاني. ونبدأ نحاول نحدد وحدة النمط. عايزين نحدد وحدة النمط. قلنا وحدة النمط هي الوحدة اللي بتتكرّر عشان تكوّن النمط. هنلاحظ إن أول تلات تفاحات الحمرا والخضرا والخضرا، بيتكرروا كذا مرة عشان يكوّنوا النمط. يبقى نقدر نقول في الحالة دي إن أول تلات تفاحات هي وحدة النمط. يبقى كده عرفنا إزاي نحدد وحدة النمط.

هنبدأ نجيب صفحة جديدة، ونشوف أمثلة، إزاي لو عندنا نمط نقدر نكمّله.

المطلوب هو: أكمل النمط الآتي.

عشان نقدر نكمل النمط اللي موجود قدامنا، محتاجين في البداية نحدّد وحدة النمط، ونبدأ نكرّرها عشان نقدر نكمل النمط. هنلاحظ إن أول مثلثين همّ اللي بيتكرروا بانتظام عشان يكوّنوا النمط. يبقى عشان نقدر نكمل النمط محتاجين نزود وحدة النمط اللي هي المثلثين اللي في البداية. وبالتالي لمّا نكمّلهم هيبقى عندنا النمط بالشكل ده. يبقى كملنا النمط بإننا زوّدنا وحدة النمط.

نشوف مثال آخر. عايزين نكمل النمط الآتي.

نفس الكلام، عشان نقدر نكمل النمط محتاجين نحدّد وحدة النمط. هنلاقي إن وحدة النمط اللي بتتكرّر كل مرة عشان تكوّن النمط هي أول تلات مربعات. يبقى عشان نقدر نكمل النمط محتاجين نزوّد وحدة النمط اللي هي أول تلات مربعات. وبالتالي لمّا نكمل النمط هيبقى بالشكل ده.

يبقى كده قدرنا نكمّل النمط، بإننا زوّدنا وحدة النمط في الآخر.

يبقى كده عرفنا إزاي لو عندنا نمط نحدّد وحدة النمط. وإزاي لو عندنا نمط نقدر نكمّل النمط.

بعد كده هنبدأ نجيب صفحة جديدة، ونشوف لو عندنا وحدة النمط، إزاي نقدر نكوّن نمط.

لو عندنا وحدة نمط متكوّنة من التلات أشكال الآتية، وعايزين نكوّن منهم نمط. هنعمل إيه؟

عشان نقدر نكوّن نمط من وحدة النمط اللي موجودة قدامنا، اللي هي متكونة من تلات أشكال. هنبدأ نكررها بانتظام كذا مرة، بالشكل ده. يبقى خدنا وحدة النمط وبدأنا نكرّرها مرة واتنين وتلاتة وهكذا.

يبقى كده قدرنا نكوّن نمط من وحدة النمط اللي موجودة عندنا. يبقى كده اتكلمنا عن النمط، وعرفنا إزاي نحدّد وحدة النمط، وإزاي لو عندنا نمط نقدر نكمله، وإزاي كمان نقدر نكون النمط.