فيديو: امتحان الفيزياء • ٢٠١٧/٢٠١٦ • السؤال السادس والثلاثون

امتحان الفيزياء • ٢٠١٧/٢٠١٦ • السؤال السادس والثلاثون

٠٢:٣٢

‏نسخة الفيديو النصية

أوميتر مقاومة دائرته تلات آلاف سبعمية وخمسين أوم، وأقصى تيار يمكن أن يمر به ربعمية ميكرو أمبير. احسب قيمة المقاومة الخارجية التي تجعل مؤشره ينحرف إلى منتصف التدريج.

جهاز الأوميتر بيبقى مكون من جلفانومتر مقاومته الداخلية 𝑅 𝑔، ومقاومة ثابتة 𝑅 𝑐، ومقاومة متغيرة 𝑅 𝑣، وبطارية قوتها الدافعة الكهربية 𝑉 𝐵، ومقاومتها الداخلية 𝑟. وجهاز الأوميتر بيقيس قيمة المقاومات الأومية اللي بتتوصَّل بين الطرفين دول. ومُعطى إن مقاومة دايرة الأوميتر بتساوي تلات آلاف سبعمية وخمسين أوم. ومقاومة دايرة الأوميتر هي المقاوَمة المكافئة للمقاومة الداخلية للجلفانومتر، والمقاومة الثابتة، والمقاومة المتغيرة، والمقاومة الداخلية للبطارية. وبما إن الأربع مقاومات متوصَّلين على التوالي؛ فده معناه إن المقاومة المكافئة هي حاصل جمع الأربع مقاومات.

ومعطى إن اقصى تيار بيمُرّ بالأوميتر هو ربعمية ميكرو أمبير. وأقصى تيار بيمُرّ بالأوميتر لمّا بنوصَّل بين النقطتين سلك مقاومته بصفر. وبنرمز لأقصى تيار بـ 𝐼 𝑔. ومطلوب مننا نحسب قيمة المقاومة الخارجية اللي هتخلِّي مؤشِّر الأوميتر ينحرف لمنتصف التدريج. وده معناه إن في الحالة دي التيار اللي هيبقى ماشي في الأوميتر، هيبقى بيساوي نص التيار 𝐼 𝑔. وطبقًا لقانون أوم، ففرق الجهد على أي مقاومة بيساوي التيار اللي ماشي في المقاومة في قيمتها. وده معناه إن التيار اللي ماشي في المقاومة بيساوي فرق الجهد اللي عليها، مقسوم على قيمة المقاومة.

فلو طبَّقنا قانون أوم على دايرة الأوميتر لمّا بتكون المقاومة الخارجية متوصَّلة، هنلاقي إن التيار 𝐼 بيساوي القوة الدافعة الكهربية للبطارية، مقسوم على المقاومة الكلية للأوميتر، زائد المقاومة الخارجية. وزي ما قلنا التيار في الحالة دي بيساوي نص التيار 𝐼 𝑔. وعلشان نجيب قمية التيار 𝐼 𝑔، هنطبق قانون أوم على دايرة الأوميتر، ولكن لمّا تكون المقاومة الخارجية المتوصلة بصفر. فساعتها التيار اللي ماشي هيبقى أقصى قيمة للتيار اللي هو 𝐼 𝑔. وهيبقى بيساوي القوة الدافعة الكهربية للبطارية مقسوم على المقاومة الكلية للأوميتر. ونقدر كده نعوَّض بقيمة التيار 𝐼 𝑔 فالمعادلة هتبقى بالشكل ده. ونقدر نختصر 𝑉 𝐵 مع 𝑉 𝐵، ونطلَّع إن اتنين في المقاومة الكلية للأوميتر بتساوي المقاومة الكلية للأوميتر، زائد المقاومة الخارجية. ولمّا نطرح من طرفين المعادلة المقاومة الكلية للأوميتر، هنطلَّع إن المقاومة الخارجية بتساوي المقاومة الكلية للأوميتر. يعني المقاومة الخارجية في الحالة دي بتساوي تلات آلاف وسبعمية وخمسين أوم. وبكده نبقى عرفنا نطلَّع إن قيمة المقاومة الخارجية للأوميتر اللي بتخلي مؤشره ينحرف لمنتصف التدريج، بتساوي المقاومة الكلية للأوميتر.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.