فيديو: إيجاد الأعداد المجهولة في حقائق الضرب والقسمة المترابطة المرتبطة بشبكة مصفوفة

أماني يوسف

استخدِم الشبكة المصفوفة لتعبئة كل الأعداد المجهولة في هذه الحقائق ذات الصلة. [أ] ٦ × ٤ = _. [ب] ٤ × _ = ٢٤. [ج] ٢٤ ÷ ٦ = _. [د] _ ÷ ٦ = ٤.

٠٤:٤٤

‏نسخة الفيديو النصية

استخدم الشبكة المصفوفة لتعبئة كل الأعداد المجهولة في هذه الحقائق ذات الصلة. ستة في أربعة تساوي نقط. أربعة في نقط تساوي أربعة وعشرين. أربعة وعشرين على ستة تساوي نقط. نقط على ستة تساوي أربعة.

عاوزين نستخدم الشبكة المصفوفة اللي قدامنا دي؛ علشان نحل الحقائق اللي عندنا في السؤال. طيب هي الشبكة المصفوفة دي عبارة عن إيه؟ عبارة عن صفوف وأعمدة. فيها كام صف؟ ده كده صف واحد. وده التاني. وده التالت. وده الرابع. وفيها كام عمود؟ ده الأول. التاني. التالت. الرابع. الخامس. السادس.

يبقى كده الشبكة المصفوفة بتاعتنا فيها أربع صفوف وست أعمدة. ولو جينا نضرب عدد الصفوف في عدد الأعمدة، هينتج لنا عدد المربعات اللي في الشكل كلها. يعني إيه؟

يعني لو جينا نقول أربعة في ستة، أو ستة في أربعة. هي هيّاها. هينتج لنا إيه؟ واحد، اتنين، تلاتة، أربعة، خمسة، ستة، سبعة، تمنية، تسعة، عشرة، حداشر، اتناشر، تلتاشر، أربعتاشر، خمستاشر، ستاشر، سبعتاشر، تمنتاشر، تسعتاشر، عشرين، واحد وعشرين، اتنين وعشرين، تلاتة وعشرين، أربعة وعشرين. هينتج لنا أربعة وعشرين مربع. وهو ده حاصل ضرب الصفوف في الأعمدة، أو الأعمدة في الصفوف، هي هيّاها. فده معناه إن إيه؟ إن ستة في أربعة هتساوي أربعة وعشرين.

طيب تاني جزء. أربعة في نقط تساوي أربعة وعشرين. لمّا نيجي نضرب الأربعة دي في نقط، هيبقى الناتج أربعة وعشرين. النقط دي المفروض نحط مكانها إيه؟ مش الأربعة دي هي عدد الصفوف؟ وإحنا قلنا عدد الصفوف في عدد الأعمدة بتساوي أربعة وعشرين؟ يبقى ده معناه إن إحنا هنضربه في عدد الأعمدة. عدد الأعمدة اللي هي إيه؟ ستة. فده معناه أربعة في ستة بتساوي أربعة وعشرين. وإحنا لسه قايلينها. ستة في أربعة هي أربعة في ستة.

نيجي لتالت جزء في السؤال. أربعة وعشرين على ستة تساوي نقط. الأربعة وعشرين مربع دول كلهم لمّا نقسمهم على ستة، اللي هو عدد الأعمدة، هينتج لنا إيه؟ هينتجلنا عدد الصفوف، اللي هي أربعة. فيبقى كده أربعة وعشرين على ستة تساوي أربعة.

طب ليه قلنا أربعة؟ طيب إحنا ليه قلنا أربعة؟ علشان إحنا عندنا هنا أهو الأربعة وعشرين مربع الموجودين في الشبكة المصفوفة. عاوزين نقسمهم على ستة؛ يعني نخلّي كل ست مربعات مع بعض. آدي دول ستة مع بعض. ودول ستة مع بعض. ودول ستة مع بعض. ودول ستة مع بعض. كونّا كام ستة؟ واحد، اتنين، تلاتة، أربعة. أربع مجموعات كل مجموعة فيها ستة. فده معنى أربعة وعشرين على ستة تساوي أربعة. وده لأن الصف الواحد فيه ست مربعات. وهمّ أربع صفوف.

طيب نيجي للجزء الأخير. نقط على ستة تساوي أربعة. إيه بقى العدد اللي لمّا قسمناه على ستة بقى الناتج أربعة؟ ما هو عدد المربعات في الشبكة المصفوفة كلها، اللي لو قسمناه على عدد الأعمدة هينتج لنا عدد الصفوف. طب هو عدد المربعات في المصفوفة كلها كام؟ أربعة وعشرين مربع. فده معناه إن الإجابة أربعة وعشرين. وبكده باستخدام الشبكة المصفوفة اللي عندنا قدرنا نحل الحقائق دي كلها. واللي كانت أول إجابة عندنا هي أربعة وعشرين. والتانية ستة. والتالتة أربعة. والأخيرة أربعة وعشرين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.