فيديو: طرح الأعداد المكونة من رقمين بدون استخدام إعادة التسمية

يوضح الفيديو طرح العدد المكوَّن من رقمين، ويوضح مفهوم الفرق، وكيفية حل مسائل من حياتنا.

٠٣:٤٩

‏نسخة الفيديو النصية

هنتكلّم في الفيديو ده عن طرح الأعداد المكوّنة من رقمين بدون استخدام إعادة التسمية. وهنعرف مواقف من حياتنا العملية اللي بنستخدم فيها طرح الأعداد المكونة من رقمين.

الأعداد المكوّنة من رقمين دي اللي بيبقى فيها خانات آحاد وعشرات بس. يعني هنا فيه آحاد وهنا فيه عشرات. لما بنطرح عددين زي دول، أول خطوة بنعملها إن إحنا نرتب العددين فوق بعض بالشكل ده. بحيث إن خانة الآحاد بتاعة العدد الأول يبقى تحتها خانة الآحاد بتاعة العدد التاني. وخانة العشرات في العدد الأول تحتها خانة العشرات في العدد التاني. وبعدين نكتب علامة الطرح اللي هي قدامنا دي علامة الناقص، وخط كبير كده، ونبتدي نطرح.

عملية الطرح دي معناها إن أنا بنقص العدد اللي هو اتناشر من الخمستاشر. العدد خمستاشر لو مثّلناه بالمربعات زي ما هو قدامنا كده. الخمسة موجودة في الآحاد خمس مربعات. والعشرات عبارة عن عشر مربعات. أول حاجة بننقّص الآحاد من الآحاد. يعني الاتنين هننقّصها من الخمسة. هنشيل من خمسة اتنين بالشكل ده. يبقى هيبقى باقي عندنا تلاتة. هنكتب التلاتة هي ناتج الطرح.

بعد كده هنروح على خانة العشرات اللي هي الواحد. هننقّص منها واحد. فالواحد دي عبارة عن عشرة مربعات. يعني هننقّص العشر مربعات كلهم مرة واحدة. يعني كأننا نقصنا واحد من واحد بقى صفر. يبقى الخمستاشر ناقص الاتناشر تلاتة.

نشوف مثال كمان. اوجد ناتج تسعة وسبعين ناقص تمنتاشر.

هنرتب العددين فوق بعض؛ بحيث إن كل خانة تحتها الخانة اللي زيها. يعني تسعة وسبعين خانة التسعة اللي هي الآحاد، تحتها التمنية في الآحاد. والسبعة في العشرات تبقى تحتها الواحد في العشرات. وبعدين نطرحهم من بعض.

أول حاجة هنطرح الآحاد. يبقى التسعة ناقص التمنية هتبقى الواحد. والسبعة ناقص الواحد بستة. يبقى الناتج هيبقى واحد وستين.

الطريقة دي فيها دايمًا العدد اللي بنطرح منه خاناته أكبر من العدد التاني. يعني التسعة أكبر من التمنية. والسبعة أكبر من الواحد. لأن لو العدد أصغر فبنستخدم طريقة تانية اسمها إعادة التسمية. ودي إن أنا بستلف من الخانة اللي بعدها عشرات.

ناخد مثال من حياتنا العملية اللي بيبقى فيه الطرح بدون استخدام إعادة التسمية. لدى إبراهيم ستة وتلاتين كرة زجاجية. ولدى رامي خمستاشر كرة زجاجية. اوجد الفرق بينهما.

الفرق ده معناه إن إحنا نطرح العددين من بعض. هنحط العدد الكبير الأول اللي هو ستة وتلاتين. ناقص العدد الصغير اللي هو الخمستاشر. الستة ناقص الخمسة هتبقى واحد. والتلاتة ناقص الواحد هتبقى اتنين. إذن الفرق بينهما واحد وعشرين كرة.

اتكلمنا في الفيديو ده عن طرح الأعداد المكوّنة من رقمين بدون استخدام إعادة التسمية. وعرفنا إن معنى كلمة الفرق كأنه بيقول لنا بالضبط نطرح الأعداد. وعرفنا أمثلة من حياتنا العملية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.