فيديو السؤال: قسمة عدد عشري على آخَر

نسخة الفيديو النصية

احسب تلاتة وتمنية وأربعين من مية، على أربعة من عشرة.

عندنا عدد عشري، ومطلوب إننا نقسمه على عدد عشري آخر. عشان نعرف نقوم بعملية القسمة هنحوّل المقسوم عليه إلى عدد صحيح. أربعة من عشرة عشان تبقى عدد صحيح هضرب المقسوم عليه في عشرة. وعشان ما أغيَّرش عملية القسمة أو ناتج عملية القسمة، هضرب المقسوم برضو في عشرة. لما هنضرب العدد العشري في عشرة، هنحرّك الفصلة العشرية في اتجاه اليمين عدد أرقام هيساوي عدد الأصفار؛ يعني هنحركها رقم واحد. إذن عملية القسمة بالشكل الجديد هتبقى أربعة وتلاتين وتمنية من عشرة، على أربعة. بكده هنكون ما غيّرناش ناتج القسمة.

هنقوم بالقسمة المطوّلة. هبتدي أقسم أربعة وتلاتين على أربعة. هنفكّر الأربعة وتلاتين فيها كام أربعة. هنفتكر جدول ضرب أربعة. إيه العدد اللي هضربه في أربعة، هيدّينا ناتج ضرب قريب جدًّا من أربعة وتلاتين. لما نفتكر جدول ضرب أربعة، هنلاقي إنه أربعة في تمنية هيساوي اتنين وتلاتين. واتنين وتلاتين قريبة جدًّا من أربعة وتلاتين. إذن … إذن خارج القسمة هيكون تمنية. وبعد كده هضرب تمنية في أربعة هيساوي اتنين وتلاتين. هقوم بعملية الطرح. هطرح أربعة ناقص اتنين هيساوي اتنين. وتلاتة ناقص تلاتة هيساوي صفر.

بعد كده هتقابلني العلامة العشرية. هحطها في نفس المكان في خارج القسمة. يعني بعد التمنية. وبعد كده أنزّل الرقم التاني اللي هو تمنية. بقى عندي تمنية وعشرين. هقسم تمنية وعشرين على أربعة. لما نفتكر جدول ضرب أربعة، هنلاقي إنه أربعة في سبعة هيساوي تمنية وعشرين. إذن خارج القسمة هيكون سبعة. سبعة في أربعة تمنية وعشرين. هنطرح تمنية وعشرين ناقص تمنية وعشرين، هيساوي صفر. وبكده أربعة وتلاتين وتمنية من عشرة، على أربعة، هيساوي تمنية وسبعة من عشرة.