نسخة الفيديو النصية
يوضح الجدول اللاعبين في لعبة الورق ونتائجهم. رتّب النتائج ترتيبًا تنازليًّا. ومُعطى عندنا الجدول اللي قدامنا، وعايزين نرتب النتائج ترتيبًا تنازليًّا؛ يعني من الأكبر للأصغر.
وهنلاحظ في الجدول عندنا إن فيه أعداد موجبة وأعداد سالبة. وخلّينا نفتكر إن الأعداد الموجبة هي أعداد صحيحة أكبر من صفر، وأما الأعداد السالبة، فهي الأعداد الصحيحة اللي أقل من صفر.
فمثلًا؛ لو جينا نمثّلهم على خط الأعداد بالشكل ده، فهيبقى عندنا، على يمين الصفر، هيبقى عندنا الأعداد الموجبة؛ يعني بعد الصفر هيبقى عندنا واحد، اتنين، تلاتة، أربعة، خمسة، وهكذا.
وأما في الجهة الأخرى، اللي هي على يسار الصفر، هيبقى عندنا الأعداد السالبة. فعلى يسار الصفر، هيبقى عندنا سالب واحد، وسالب اتنين، وسالب تلاتة، وسالب أربعة، وسالب خمسة، وهكذا.
ونلاحظ إن في الأعداد الموجبة قيمة العدد بتزيد كل ما نمشي جهة اليمين؛ يعني مثلًا عندنا العدد خمسة أكبر من العدد تلاتة. لكن في الأعداد السالبة بتبقى قيمة العدد أكبر كل ما يقرّب من الصفر، فمثلًا سالب واحد هتبقى قيمتها أكبر من سالب خمسة؛ لأن سالب واحد هي الأقرب للصفر.
وبالتالي لمّا نيجي نرتب النتائج اللي عندنا في الجدول ترتيبًا تنازليًّا؛ يعني من الأكبر للأصغر، فهنرتّب الأول أكبر أعداد موجبة، وبعد كده … وييجي بعدها على طول أصغر أعداد سالبة؛ لأن هي الأكبر قيمة. وآخر حاجة هتبقى أكبر أعداد سالبة؛ لأن هي الأقل قيمة.
ففي الأول هنلاحظ في جدول النتائج الأعداد الموجبة اللي عندنا؛ عندنا ستّاشر، واتنين، وستة، وتمنتاشر. فلمّا نرتب الأعداد دي من الأكبر للأصغر، هيبقوا بالشكل ده: موجب تمنتاشر، وموجب ستّاشر، وموجب ستة، وموجب اتنين.
بعد كده هنشوف من الجدول الأعداد السالبة اللي عندنا، فهنلاحظ إن عندنا سالب حداشر، وسالب تمنية، وسالب اتنين، وسالب تسعتاشر. وزي ما عرفنا إن الأعداد السالبة بتبقى عكس الأعداد الموجبة، فأكبر عدد قيمة هو أقل عدد سالب؛ فمعنى كده إننا هنرتب الأعداد السالبة اللي عندنا من الأصغر للأكبر، فهيبقى عندنا الترتيب بالشكل ده: سالب اتنين، وسالب تمنية، وسالب حداشر، وسالب تسعتاشر؛ لأن زي ما قلنا إن أكبر قيمة للعدد السالب كل ما بنقرّب للصفر؛ فمعنى كده إن سالب اتنين أكبر من سالب تسعتاشر.
فبالتالي هيبقى الترتيب التنازلي هو موجب تمنتاشر، وموجب ستّاشر، وموجب ستة، وموجب اتنين، وسالب اتنين، وسالب تمنية، وسالب حداشر، وسالب تسعتاشر.
