تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: ترتيب الأعداد: عشرات الآلاف

نهال عصمت

يتناول الفيديو كيفية ترتيب الأعداد ضمن عشرات الآلاف، عن طريق المقارنة بينها أولًا باستخدام خط الأعداد، أو جدول القيم المكانية.

٠٩:١٤

‏نسخة الفيديو النصية

ترتيب الأعداد.

هنتعلم إزاي نرتب الأعداد ضمن عشرات الآلاف. يعني الأعداد المكونة من خمس خانات، أو أقل. عشان نقدر نرتّب الأعداد، محتاجين الأول نقارن بينهم؛ لأن المقارنة هتساعدنا على الترتيب. ممكن نستخدم خط الأعداد أو القيمة المكانية؛ عشان نرتب الأعداد. هنبدأ نشوف مثال يوضح إزاي نرتّب الأعداد من الأصغر إلى الأكبر.

معطى الجدول الآتي. الجدول يوضح أطوال تلات حيتان بالسنتيمترات. مطلوب: رتّب أطوال الحيتان من الأصغر إلى الأكبر.

أول طريقة هنبدأ نستخدم خط الأعداد. هنبدأ نرسم خط الأعداد بالشكل الآتي. بعد ما رسمنا خط الأعداد، هنبدأ نحدّد أطوال الحيتان التلاتة على خط الأعداد. الأول: تسعمية وأربعتاشر، هيبقى في المكان ده تقريبًا. والتاني: ألف ربعمية تلاتة وستين، هيبقى في المكان ده تقريبًا. وآخِر واحد: ألف تلتمية اتنين وسبعين، هيبقى في المكان ده تقريبًا.

هنلاحظ على خط الأعداد، عند الانتقال من اليسار إلى اليمين، هنلاقي إن الأعداد بتزيد. معنى كده إن تسعمية وأربعتاشر هو أصغر عدد. وألف ربعمية تلاتة وستين هو أكبر عدد. وألف تلتمية اتنين وسبعين هو محصور بين العددين. يبقى بالنظر إلى خط الأعداد، هنلاحظ إن تسعمية وأربعتاشر، أقل من ألف تلتمية اتنين وسبعين، أقل من ألف ربعمية تلاتة وستين.

وبالتالي نقدر نقول إن أطوال الحيتان بالترتيب من الأصغر إلى الأكبر، هو: تسعمية وأربعتاشر، اللي هو القاتل. ثم ألف تلتمية اتنين وسبعين، اللي هو الأحدب. وأكبر واحد هو الرمادي، الذي يبلغ طوله ألف ربعمية تلاتة وستين. يبقى كده قدرنا نرتب الأعداد من الأصغر إلى الأكبر، باستخدام خط الأعداد.

فيه طريقة تانية ممكن نستخدمها في الترتيب، وهي جدول القيم المكانية. هنبدأ صفحة جديدة، ونشوف إزاي نعرف نرتّب الأطوال باستخدام القيم المكانية.

هنبدأ نرسم جدول بالشكل الآتي. هنلاحظ إن أطوال الحيتان اللي موجودة في الجدول: واحد مكوّن من تلات أرقام. واتنين مكوّنين من أربع أرقام. معنى كده إن جدول القيم المكانية هيتكوّن من أربع خانات. أول خانة هي خانة الآحاد. وتاني خانة هي خانة العشرات. وتالت خانة هي خانة المئات. ورابع خانة هي خانة الآلاف.

هبدأ نكتب أطوال الحيتان. الأول: تسعمية وأربعتاشر. والتاني: ألف ربعمية تلاتة وستين. أمّا التالت: ألف تلتمية اتنين وسبعين. بعد كده هنبدأ نقارن بين التلات أعداد. هنبدأ نشوف أكبر خانة، اللي هي الخانة ذات أكبر قيمة مكانية، وهي الآلاف. هنلاقي إن في العدد الأول خانة الآلاف فاضية، يعني فيها صفر. وفي العدد التاني خانة الآلاف واحد. وفي العدد التالت خانة الآلاف واحد.

عندنا الصفر آلاف أصغر من واحد آلاف. معنى كده إن أصغر عدد هو تسعمية وأربعتاشر؛ عشان خانة الآلاف صفر.

بعد كده هنبدأ نقارن بين العددين التانيين. عندنا خانة الآلاف متساوية. وبالتالي هنبدأ نبصّ على الخانة اللي أصغر منها، وهي خانة المئات. في العدد الأول، خانة المئات فيها أربعة. وفي العدد التاني، خانة المئات فيها تلاتة. وعندنا تلاتة مئات أصغر من أربعة مئات. يبقى معنى كده إن أكبر عدد هو ألف ربعمية تلاتة وستين.

يبقى نقدر نقول إن الأعداد بالترتيب هي: تسعمية وأربعتاشر، أصغر من ألف تلتمية اتنين وسبعين، أصغر من ألف ربعمية تلاتة وستين. وبالتالي أطوال الحيتان من الأصغر إلى الأكبر هي: تسعمية وأربعتاشر. ثم ألف تلتمية اتنين وسبعين. ثم ألف ربعمية تلاتة وستين.

يبقى كده قدرنا نرتّب الأعداد باستخدام خط الأعداد، وباستخدام جدول القيم المكانية. وعرفنا كمان إزاي نرتّب الأعداد من الأصغر إلى الأكبر. هنبدأ نجيب صفحة جديدة، ونشوف مثال آخر، إزاي نرتب الأعداد من الأكبر إلى الأصغر.

يوضح الجدول التالي المسافات التي تقطعها الحيتان، بحثًا عن الطعام في موسم الهجرة. المطلوب: رتّب هذه المسافات من الأكبر إلى الأصغر.

هنبدأ نستخدم جدول القيم المكانية. هنرسم الجدول بالشكل الآتي. هنلاحظ إن عندنا تلات أعداد: عدد مكون من أربع أرقام. وعدد مكوّن من خمس أرقام. وعدد تاني مكوّن من تلات أرقام. يبقى معنى كده إن إحنا هنرسم الجدول مكوّن من خمس خانات. أول خانة هي خانة الآحاد. وتاني خانة هي خانة العشرات. وتالت خانة هي خانة المئات. أمّا رابع خانة هي خانة الآلاف. وآخر خانة اللي هي خامس خانة هي خانة عشرات الآلاف.

بعد كده هنبدأ نكتب الأعداد. العدد الأول: خمسة آلاف ستمية واحد وتلاتين. العدد التاني: تسعتاشر ألف تلتمية وتمنية. العدد التالت: تسعمية تمنية وأربعين. هنبدأ نشوف أكبر قيمة مكانية. هنلاقي إن أكبر قيمة هي عشرات الآلاف. في العدد الأول عشرات الآلاف فاضية؛ يعني بصفر. وفي العدد التاني عشرات الآلاف بواحد. وفي العدد التالت عشرات الآلاف فاضية؛ يعني برضو بصفر. يبقى نقدر نقول إن أكبر عدد هو: تسعتاشر ألف تسعمية، عفوًا تسعتاشر ألف تلتمية وتمنية.

بعد كده هنبدأ نبصّ على الخانة الأصغر، وهي خانة الآلاف. هنلاقي في العدد الأول، الآلاف فيها خمسة. وفي العدد الأخير، الآلاف فاضية؛ يبقى معنى كده إن الآلاف فيها صفر. يبقى نقدر نقول إن أصغر عدد، اللي هو آخر عدد، اللي هو: تسعمية تمنية وأربعين. والعدد اللي موجود بينهم هو: خمسة آلاف ستمية واحد وتلاتين.

يبقى نقدر نقول إن أطوال الحيتان مرتّبة من الأكبر إلى الأصغر، هي: ألف عفوًا تسعتاشر ألف تلتمية وتمنية. ثم خمسة آلاف ستمية واحد وتلاتين. ثم تسعمية تمنية وأربعين.

يبقى كده اتكلمنا عن ترتيب الأعداد ضمن عشرات الآلاف. وعرفنا إزاي نرتّب الأعداد من الأكبر إلى الأصغر، ومن الأصغر إلى الأكبر، باستخدام خط الأعداد، وباستخدام جدول القيم المكانية.