نسخة الفيديو النصية
قوتان متوازيتان مقداراهما عشرة نيوتن وعشرين نيوتن. والمسافة بين خطَّي عملهما تساوي تلاتين سنتيمتر. إذا كانت القوتان تؤثّران في نفس الاتجاه؛ فأوجد محصلتهما ح، والمسافة س بين خط عملها، والنقطة أ.
واضح من السؤال إن القوتين متوازيتين، وفي اتجاه واحد. وفي الحالة دي، هنتّبع القاعدة الرياضية الآتية: المحصلة في هذه الحالة معيارها يساوي مجموع معيارَي القوتين. أيْ أن ح تساوي ق واحد زائد ق اتنين. أمّا اتجاه المحصلة، فهو نفس اتجاه القوتين؛ حيث المتجه ح يوازي المتجه ق واحد والمتجه ق اتنين. أمّا نقطة تأثير المحصلة، فتقسم المسافة بين نقطتَي تأثير القوتين من الداخل، بنسبة عكسية لمعيارَي القوتين. أيْ أن ق واحد على ق اتنين تساوي ل اتنين على ل واحد.
وفي المسألة هو وضّح إن المسافة بين القوتين هو تلاتين سنتيمتر. وبالتالي تكون المسافة دي هي تلاتين سنتيمتر. ومن النتيجة رقم اتنين وتلاتة، هجِد إن المحصلة اتجاهها هو نفس اتجاه القوتين؛ عشرة وعشرين نيوتن. وقيمتها هي مجموعهم مِ النتيجة رقم واحد. أيْ أن ح تساوي تلاتين نيوتن. أمّا نقطة تأثيرها، فهي أقرب إلى القوة الأكبر، وتقسم المسافة بنسبة عكسية لمعيارَي القوتين.
وهو قال في المسألة إن المسافة بين خط عمل المحصلة، والنقطة أ، هو س. إذن المسافة دي هسمّيها س. وبالتالي تكون المسافة ما بين المحصلة، والنقطة ب، هي الباقي اللي هو تلاتين ناقص س. لأن المسافة بين أ وَ ب هي تلاتين سنتيمتر. وبالتالي مِ الملاحظة رقم واحد، هتكون ح بتساوي مجموع القوتين، عشرة نيوتن زائد عشرين نيوتن. هتساوي تلاتين نيوتن، زيّ ما وضّحنا على الرسم.
أمّا بالنسبة لنقطة التأثير، فهنبصّ على ملاحظة تلاتة. هنجِد إن ق واحد اللي هي عشرة، على ق اتنين اللي هي عشرين. تساوي ل اتنين، اللي هي المسافة بين المحصلة والقوة التانية؛ اللي هي تلاتين ناقص س. على ل واحد، اللي هي المسافة بين المحصلة والقوة الأولى؛ اللي هي س. وبضرب الطرفين والوسطين، إذن عشرة س يساوي ستمية ناقص عشرين س. إذن تلاتين س تساوي ستمية. إذن س تساوي عشرين سنتيمتر. وبالتالي ينتج إن ح تساوي تلاتين نيوتن، وَ س تساوي عشرين سنتيمتر.
