فيديو: إيجاد مجموعة حل متباينات خطية ذات خطوتين في مجموعة الأعداد الطبيعية

أوجد مجموعة حل ٣ﺱ − ٧< −٤، إذا كان ﺱ ∈ ﻃ.

٠١:١٦

‏نسخة الفيديو النصية

أوجد مجموعة حلّ: تلاتة س ناقص سبعة أقلّ من سالب أربعة، إذا كان س ينتمي إلى ط.

يبقى دلوقتي عايزين نوجد مجموعة حلّ المتباينة اللي قدامنا دي. ولازم ناخد بالنا إن مجموعة الحلّ دي هتبقى بتنتمي إلى ط، اللي هي مجموعة الأعداد الطبيعية. اللي هي بتساوي المجموعة صفر، وواحد، واتنين، وتلاتة، وهكذا.

طب إزاي بنقدر نوجد مجموعة الحلّ لأيّ متباينة؟ عايزين نخلّي المتغيّر س في أحد أطراف المتباينة لوحده. أول حاجة هنجمع سبعة على طرفَي المتباينة اللي عندنا. فهيصبح عندنا تلاتة س أصغر من تلاتة. بعد كده هنقسم طرفَي المتباينة على تلاتة؛ عشان نخلّي المتغيّر س في طرف لوحده بالشكل ده. وبكده هيصبح عندنا س أصغر من واحد.

وبما إن س بتنتمي إلى ط، طب إيه الأعداد اللي في مجموعة الأعداد الطبيعية بتحقّق لنا الشرط إن س تبقى أصغر من الواحد. هنلاقي إن ما فيش غير صفر. يعني مجموعة الحلّ هتصبح المجموعة اللي بتحتوي على العدد صفر فقط.

وده معناه إن ما فيش غير العدد صفر اللي هيمثّل حلّ للمتباينة اللي عندنا، حيث س بتنتمي إلى ط.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.