تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: إيجاد قيمة مجهول لتكوين مقدار ثلاثي في صورة مربع كامل‎

أحمد مدحت

ما قيم ﻙ في ١٦ﺱ^٢ + ﻙﺱ + ٨١ لتكون مربعًا كاملًا؟

٠٢:٠٥

‏نسخة الفيديو النصية

ما قيم ك في ستاشر س تربيع زائد ك س زائد واحد وتمانين، لتكون مربعًا كاملًا؟

علشان يبقى المقدار الثلاثي: ستاشر س تربيع زائد ك س زائد واحد وتمانين، مربع كامل. لازم يكون الحدّين الأول والأخير مربعين كاملين موجبين. والحدّ الأوسط يساوي ضعف حاصل ضرب الجذرين التربيعيين بتوع الحدّين الأول والأخير. والحدّ الأوسط ممكن يكون موجب أو سالب.

معنى كده إن الحدّ الأوسط في المقدار الثلاثي المربع الكامل يساوي موجب أو سالب اتنين. في الجذر التربيعي للحدّ الأول. في الجذر التربيعي للحدّ التالت. وفي المقدار الثلاثي اللي عندنا، الحدّ الأول هو ستاشر س تربيع. أمّا الحدّ التالت، فهو واحد وتمانين.

بكده هيبقى الحدّ الأوسط للمقدار الثلاثي اللي عندنا، يساوي موجب أو سالب اتنين. في الجذر التربيعي لستاشر س تربيع. في الجذر التربيعي لواحد وتمانين. والجذر التربيعي لستاشر س تربيع يساوي أربعة س. أمّا الجذر التربيعي لواحد وتمانين، فهو يساوي تسعة. معنى كده إن الحدّ الأوسط يساوي موجب أو سالب اتنين، في أربعة س، في تسعة. يعني هيساوي موجب أو سالب اتنين وسبعين س.

ولمّا هنقارن قيمة الحدّ الأوسط اللي إحنا أوجدناها، وهي موجب أو سالب اتنين وسبعين س. بالحدّ الأوسط في المقدار الثلاثي المعطى، واللي هو ك س. هيبقى عندنا ك س يساوي موجب أو سالب اتنين وسبعين س. وده معناه إن ك تساوي موجب أو سالب اتنين وسبعين. بالتالي هتبقى قيم ك، اللي هتخلّي المقدار: ستاشر س تربيع زائد ك س زائد واحد وتمانين، مربع كامل. هي: اتنين وسبعين، وسالب اتنين وسبعين.