فيديو: إيجاد ثلاثة أعداد بمعلومية المضاعف المشترك الأصغر لها

اكتب ثلاثة أعداد لها م. م. أ. يساوي ٢١٠. [أ] ٢، ١٥، ٥ [ب] ٢، ٧، ٢١ [ج] ٢، ١٥، ٢١ [د] ٥، ١٥، ٢١ [ﻫ] ٢، ٥، ٧

٠٧:٤٠

‏نسخة الفيديو النصية

اكتب ثلاثة أعداد لها مضاعف مشترك أصغر يساوي ميتين وعشرة. ومعطى عندنا الاختيارات؛ أ: اتنين، وخمستاشر، وخمسة. ب: اتنين، وسبعة، وواحد وعشرين. ج: اتنين، وخمستاشر، وواحد وعشرين. د: خمسة، وخمستاشر، وواحد وعشرين. هـ: اتنين، وخمسة، وسبعة.

يعني معطى عندنا الاختيارات دي، وعايزين نشوف أنهي تلات أعداد فيهم هيبقى المضاعف المشترك الأصغر ليهم بيساوي ميتين وعشرة. وخلّينا في الأول نفتكر إن المضاعف المشترك الأصغر لمجموعة من الأعداد هو أصغر عدد موجود من ضمن مضاعفات الأعداد دي. فعشان نشوف أنهي تلات أعداد من الاختيارات اللي عندنا المضاعف المشترك الأصغر ليهم هو ميتين وعشرة، يبقى هنبدأ نجرّب كل اختيار لوحده، وهنكتب التلات أعداد اللي موجودين في الاختيار، ونشوف المضاعف المشترك الأصغر ليهم.

فهنبدأ الأول بالاختيار أ: اللي هو اتنين، وخمستاشر، وخمسة. وعشان نوجد المضاعف المشترك الأصغر ليهم، يبقى هنكتب مضاعفات كل عدد، وهنبدأ الأول نكتب مضاعفات العدد اتنين. ومضاعفات العدد اتنين هي: اتنين، وأربعة، وستة، وتمنية، وعشرة، واتناشر، وأربعتاشر، وستاشر، وتمنتاشر، وعشرين، وهكذا.

وبنفس الطريقة هنوجد مضاعفات العدد خمستاشر. ومضاعفات العدد خمستاشر يعني خمستاشر في واحد، وخمستاشر في اتنين، وخمستاشر في تلاتة، وهكذا. فتبقى المضاعفات هي: خمستاشر، وتلاتين، وخمسة وأربعين، وستين، وخمسة وسبعين، وتسعين، ومية وخمسة، وهكذا.

وبنفس الطريقة هنوجد مضاعفات العدد خمسة. يعني خمسة في واحد، وخمسة في اتنين، وخمسة في تلاتة، وهكذا. فهتبقى مضاعفات العدد خمسة هي: خمسة، وعشرة، وخمستاشر، وعشرين، وخمسة وعشرين، وتلاتين، وخمسة وتلاتين، [وأربعين،] وخمسة وأربعين، وهكذا.

بعد كده هندوّر على الأعداد المشتركة بين مضاعفات التلات أعداد. فلو جينا مثلًا نلاحظ هنا العدد عشرة هنلاقيه موجود هنا، لكن مش موجود في مضاعفات العدد خمستاشر؛ وبالتالي العدد عشرة مش هيبقى مضاعف مشترك. وبنفس الطريقة هنلاحظ هنا العدد خمستاشر، والعدد خمستاشر. لكن بما إن العدد خمستاشر عدد فردي فبالتالي هو مش من مضاعفات العدد اتنين؛ لأن عندنا هنا أربعتاشر وبعدها ستاشر، فمعنى كده إن العدد خمستاشر مش هيبقى مضاعف مشترك.

بعد كده هنلاحظ عندنا هنا العدد تلاتين، والعدد تلاتين. وبما إن العدد تلاتين هو عدد زوجي فمعنى كده إنه هيبقى موجود من مضاعفات العدد اتنين؛ لأن إحنا ما كتبناش كل مضاعفات العدد اتنين، فكان فيه بعد عشرين اتنين وعشرين، وأربعة وعشرين، وستة وعشرين، وهكذا لحدّ ما نوصل تلاتين. فبالتالي هيبقى العدد تلاتين هو مضاعف مشترك بين مضاعفات التلات أعداد، وفي نفس الوقت هو أصغر مضاعف مشترك؛ فبالتالي هيبقى المضاعف المشترك الأصغر للأعداد اتنين وخمستاشر وخمسة هو تلاتين. لكن المطلوب في السؤال إننا نكتب تلات أعداد ليهم المضاعف المشترك الأصغر بيساوي ميتين وعشرة؛ فبالتالي هيبقى الاختيار أ اختيار خاطئ؛ لأن المضاعف المشترك الأصغر لاتنين، وخمستاشر، وخمسة هو تلاتين مش ميتين وعشرة.

بعد كده هنشوف الاختيار ب، فهنلاحظ إننا عندنا الأعداد اتنين، وسبعة، وواحد وعشرين. فبنفس الطريقة هنكتب مضاعفات كل عدد من التلات أعداد؛ علشان نوجد المضاعف المشترك الأصغر ليهم. وهنبدأ بمضاعفات العدد اتنين؛ اللي هي اتنين في واحد، واتنين في اتنين، واتنين في تلاتة، وهكذا. فهتبقى مضاعفات العدد اتنين هي اتنين، وأربعة، وستة، وتمنية، وعشرة، واتناشر، وأربعتاشر، وهكذا.

وبنفس الطريقة هتبقى مضاعفات العدد سبعة هي سبعة، وأربعتاشر، وواحد وعشرين، وتمنية وعشرين، وخمسة وتلاتين، واتنين وأربعين، وهكذا. وأمّا مضاعفات العدد واحد وعشرين، اللي هي واحد وعشرين في واحد، وواحد وعشرين في اتنين، وواحد وعشرين في تلاتة، وهكذا؛ فتبقى مضاعفات العدد واحد وعشرين هي واحد وعشرين، واتنين وأربعين، وتلاتة وستين، وأربعة وتمانين، وهكذا.

فلمّا نيجي نشوف الأعداد المشتركة، هنلاحظ عندنا هنا واحد وعشرين وهنا واحد وعشرين، لكن واحد وعشرين عدد فردي، فبالتالي مش هتبقى موجودة من مضاعفات العدد اتنين، فمعنى كده إن واحد وعشرين ما ينفعش يبقى مضاعف مشترك. فلمّا نيجي ندوّر بعد كده على مضاعف مشترك تاني، هنلاحظ إن عندنا هنا اتنين وأربعين وهنا اتنين وأربعين. وبما إن العدد اتنين وأربعين هو عدد زوجي؛ فبالتالي هيبقى موجود من مضاعفات العدد اتنين. لكن طبعًا إحنا ما كتبناش كل مضاعفات العدد اتنين؛ فبالتالي هيبقى العدد اتنين وأربعين هو مضاعف مشترك بين مضاعفات التلات أعداد، وفي نفس الوقت هو المضاعف المشترك الأصغر. وبما إن المضاعف المشترك الأصغر للتلات أعداد، اللي هما اتنين، وسبعة، وواحد وعشرين، هو اتنين وأربعين مش ميتين وعشرة؛ فبالتالي هيبقى الاختيار ب اختيار خاطئ.

وبنفس الطريقة هنجرّب في الاختيار ج؛ يعني هنكتب مضاعفات الأعداد اتنين، وخمستاشر، وواحد وعشرين. فبنفس الطريقة هتبقى مضاعفات العدد اتنين هي اتنين، وأربعة، وستة، وتمنية، وعشرة، واتناشر، وأربعتاشر، وهكذا. وأمّا مضاعفات العدد خمستاشر، فهتبقى خمستاشر، وتلاتين، وخمسة وأربعين، وستين، وخمسة وسبعين، وتسعين، ومية وخمسة، ومية وعشرين، وهكذا. بعد كده هنوجد مضاعفات العدد واحد وعشرين، فهتبقى مضاعفات واحد وعشرين هي واحد وعشرين، واتنين وأربعين، وتلاتة وستين، وأربعة وتمانين، ومية وخمسة، ومية ستة وعشرين، وهكذا.

بعد كده لمّا نيجي نشوف إيه هي المضاعفات المشتركة بين مضاعفات التلات أعداد، لو جينا نلاحظ هنا هنلاحظ إن العدد مية وخمسة موجود في مضاعفات العدد خمستاشر وموجود في مضاعفات العدد واحد وعشرين، لكن مية وخمسة هو عدد فردي؛ فبالتالي مش هيبقى موجود في مضاعفات العدد اتنين، وبالتالي ما ينفعش يكون مضاعف مشترك. فالمضاعفات اللي إحنا كتبناها للتلات أعداد هنلاحظ إن ما فيش فيها أيّ مضاعف مشترك؛ فمعنى كده إننا محتاجين نكتب مضاعفات أكتر لكل عدد؛ علشان نوجد مضاعف مشترك. فهنكتب مضاعفات بعد مية وعشرين من مضاعفات العدد خمستاشر، فهيبقى عندنا مية خمسة وتلاتين، ومية وخمسين، ومية خمسة وستين، ومية وتمانين، ومية خمسة وتسعين، وميتين وعشرة، وميتين خمسة وعشرين، وميتين وأربعين، وهكذا.

وبنفس الطريقة هنكتب مضاعفات أكتر لمضاعفات العدد واحد وعشرين، فهنكتب مضاعفات تاني للعدد واحد وعشرين؛ فبعد مية ستة وعشرين هيبقى عندنا مية سبعة وأربعين، ومية تمنية وستين، ومية تسعة وتمانين، وميتين وعشرة، وميتين واحد وتلاتين، وميتين اتنين وخمسين، وهكذا.

وأمّا مضاعفات العدد اتنين، فمش هنحتاج إننا نكتب كل المضاعفات على حدّ ما نوصل للأعداد الكبيرة اللي تحت؛ فبالتالي هيبقى حاطّين في دماغنا إن أيّ عدد زوجي هو هيبقى من مضاعفات العدد اتنين. فهنبدأ ندوّر في مضاعفات العدد خمستاشر وواحد وعشرين على مضاعف مشترك يكون زوجي، فهنلاحظ إن عندنا هنا العدد ميتين وعشرة، وعندنا ميتين وعشرة، وبما إن العدد ميتين وعشرة هو عدد زوجي، يعني بيقبل القسمة على اتنين، فبالتالي هيبقى العدد ميتين وعشرة موجود ضمن مضاعفات العدد اتنين، فبالتالي هيبقى هو مضاعف مشترك؛ لأنه موجود فيه مضاعفات التلات أعداد، وفي نفس الوقت هو المضاعف المشترك الأصغر.

فبالتالي هيبقى الأعداد اتنين، وخمستاشر، وواحد وعشرين، المضاعف المشترك الأصغر ليها بيساوي ميتين وعشرة، وهو المطلوب في السؤال؛ فبالتالي هيبقى الاختيار ج هو الاختيار الصحيح: اتنين، وخمستاشر، وواحد وعشرين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.