تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: قياسات الزمن

أحمد لطفي

يوضح الفيديو الوحدات الزمنية المستخدمة لقياس الزمن، وكيفية جمع أو طرح قياسات الزمن في ثلاث خطوات.

٠٦:٥٣

‏نسخة الفيديو النصية

هنتكلّم عن قياسات الزمن. وهنعرف إيه هي الوحدات الزمنية المستخدَمة لقياس الزمن. وإزَّاي هنقدر نجمع أو نطرح قياسات الزمن .

في البداية، أول وحدة من الوحدات المستخدمة لقياس الزمن هي الثانية. ولو عايزين نعبّر عن واحد ثانية، فهنقول إنه بيكافئ الوقت اللازم لنطق العدد ألف وواحد.

وتاني وحدة من الوحدات المستخدمة لقياس الزمن هي الدقيقة. ولو عايزين نعبّر عن واحد دقيقة، فهنقول إنها هتكافئ متوسط الوقت اللازم لمشاهدة اتنين إعلان تلفزيوني.

وتالت وحدة مستخدمة لقياس الزمن هي الساعة. ولو عايزين نعبر عن واحد ساعة، فهنقول إنها هتكافئ متوسط الوقت اللازم لمشاهدة اتنين مسلسل تلفزيوني.

يبقى كده عرفنا إن الوحدات الزمنية المستخدَمة لقياس الزمن هي: الثانية، والدقيقة، والساعة.

لو عايزين نشوف إزَّاي هنقدر نجمع أو نطرح قياسات الزمن، فهيكون عندنا تلات خطوات. الخطوة الأولى هي جمع أو طرح الثواني. والخطوة التانية هي جمع أو طرح الدقايق. والخطوة التالتة هي جمع أو طرح الساعات. يبقى عشان نجمع أو نطرح قياسات الزمن، لازم أول خطوة تكون جمع أو طرح الثواني. وتاني خطوة تكون جمع أو طرح الدقايق. وتالت خطوة تكون جمع أو طرح الساعات.

لو عايزين نحوّل من وحدة زمنية إلى أخرى، فهنقول إن الدقيقة الواحدة هتساوي ستين ثانية. وإن الساعة الوحدة هتساوي ستين دقيقة.

لو عايزين ناخد مثال ونشوف إزَّاي هنقدر نجمع أو نطرح قياسات الزمن. فمثلًا لو عندنا مثال بالشكل ده: مطلوب نوجد مجموع أربع ساعات وعشرين دقيقة، وساعتين وخمسين دقيقة، ونقدر الناتج.

في البداية هنشوف التقدير. عندنا أربع ساعات وعشرين دقيقة؛ يعني ممكن نقدّرها ونقول إنها هتساوي أربع ساعات. مجموع عليها ساعتين وخمسين دقيقة، يبقى ممكن ساعتين وخمسين دقيقة نقدّرها بتلات ساعات. وبالتالي أربع ساعات زائد تلات ساعات هيساوي سبع ساعات. يبقى التقدير كان سبع ساعات.

عشان نقدر نوجد مجموع أربع ساعات وعشرين دقيقة وساعتين وخمسين دقيقة، محتاجين الأول نجمع الدقايق وبعدين نجمع الساعات. في البداية هنكتب الدقايق والساعات بالشكل ده. عندنا أربع ساعات وعشرين دقيقة، زائد ساعتين وخمسين دقيقة. هنجمع الدقايق … عشرين زائد خمسين هيساوي سبعين. وهنجمع الساعات … أربعة زائد اتنين هيساوي ستة. وبالتالي المجموع هيساوي ست ساعات وسبعين دقيقة.

وبما إن الستين دقيقة هتساوي ساعة، يبقى ممكن نكتب سبعين دقيقة في صورة ساعة وعشر دقايق. يعني هيكون عندنا سبع ساعات وعشر دقايق. ويبقى هيكون عندنا المجموع سبع ساعات وعشر دقايق. وهنلاحظ إن التقدير كان سبع ساعات. وبالتالي التقدير مقبول. يبقى كده قدرنا نوجد مجموع أربع ساعات وعشرين دقيقة، وساعتين وخمسين دقيقة، ونقدّر الناتج.

لو عايزين نشوف مثال آخر. مثلًا عندنا مثال بالشكل ده. عايزين نوجد ناتج طرح تلات ساعات وخمسة وأربعين دقيقة وتلاتين ثانية، من تمن ساعات وعشرين دقيقة وخمسة وتلاتين ثانية. في البداية هنكتب الثواني والدقايق والساعات بالشكل ده. هيكون عندنا تمن ساعات وعشرين دقيقة وخمسة وتلاتين ثانية، ناقص تلات ساعات وخمسة وأربعين دقيقة وتلاتين ثانية.

أول خطوة هنطرح الثواني. خمسة وتلاتين ناقص تلاتين هيساوي خمسة. تاني خطوة هنطرح الدقايق. عشرين ناقص خمسة وأربعين، مش هنعرف نطرح خمسة وأربعين من عشرين. وبالتالي هنستلف واحد من الساعات؛ يعني هيكون عندنا سبع ساعات. وبما إن الساعة بتساوي ستين دقيقة؛ يبقى في الدقايق عندنا زاد ستين. يعني عشرين زائد ستين هيساوي تمانين دقيقة. يبقى عندنا في الدقايق تمانين ناقص خمسة وأربعين، هيساوي خمسة وتلاتين. وفي الساعات سبعة ناقص تلاتة هيساوي أربعة. وبالتالي هيكون عندنا ناتج الطرح أربع ساعات وخمسة وتلاتين دقيقة وخمس ثواني.

لو عايزين نشوف مثال آخر. عندنا مثال بالشكل ده. مُعطى جدول بيوضح دوران بعض الكواكب بالنسبة للشمس. ومطلوب إيجاد الفرق بين طول اليوم على المريخ وطول اليوم على زحل.

هنكتب الثواني والدقايق والساعات بالشكل ده. هنلاحظ إن اليوم على المريخ أكبر من اليوم على زحل. وبالتالي هنقول اليوم على المريخ أربعة وعشرين ساعة وتسعة وتلاتين دقيقة وخمسة وتلاتين ثانية. ناقص … اليوم على زحل عشر ساعات وتسعة وتلاتين دقيقة وتلاتة وعشرين ثانية.

أول خطوة هنطرح الثواني. خمسة وتلاتين ناقص تلاتة وعشرين هيساوي اتناشر. تاني خطوة هنطرح الدقايق تسعة وتلاتين ناقص تسعة وتلاتين هيساوي صفر. تالت خطوة هنطرح الساعات أربعة وعشرين ناقص عشرة هيساوي أربعتاشر. وبالتالي نقدر نقول إن الفرق بين طول اليوم على المريخ وطول اليوم على زحل هيساوي أربعتاشر ساعة واتناشر ثانية.

ويبقى في النهاية عرفنا إيه هي الوحدات الزمنية المستخدمة لقياس الزمن، وهي الثانية والدقيقة والساعة. وعرفنا إزَّاي نقدر نجمع أو نطرح قياسات الزمن عن طريق تلات خطوات. أول خطوة جمع أو طرح الثواني. تاني خطوة جمع أو طرح الدقايق. وتالت خطوة جمع أو طرح الساعات.