فيديو: حل معادلات الجمع والطرح عقليًّا

أحمد مدحت

يوضح الفيديو كيفية حل معادلات الجمع والطرح عقليًّا، مع أمثلة توضيحية.

٠٣:٤٠

‏نسخة الفيديو النصية

هنتكلم عن حل معادلات الجمع والطرح عقليًّا.

في الفيديو ده هدفنا إن إحنا نعرف نحل معادلات الجمع والطرح عقليًّا. وده هيكون من خلال أمثلة. في الأول هنبدأ بحل معادلات الجمع. فهنشوف المثال الأول.

في المثال الأول عايزين نحل المعادلة: س زائد تلاتة يساوي سبعة. يعني عايزين نوجد قيمة س.

المعادلة اللي عندنا هي س زائد تلاتة يساوي سبعة. وعلشان نوجد قيمة س، هنفكر إيه هو العدد اللي لو أضفنا ليه تلاتة هيبقى الناتج سبعة. فهنلاقي العدد ده هو أربعة؛ وده لأن أربعة زائد تلاتة يساوي سبعة. معنى كده إن س تساوي أربعة. وبكده يبقى إحنا حلّينا المعادلة. هنشوف مثال كمان.

في المثال التاني عايزين نحل المعادلة أربعة زائد س يساوي تسعة.

علشان نحل المعادلة، فإحنا هنوجد قيمة س. فهنفكر إيه هو العدد اللي هنضيفه للأربعة ويكون الناتج هو تسعة. هنلاقي إن العدد ده هو خمسة؛ وده لأن أربعة زائد خمسة يساوي تسعة. معنى كده إن س تساوي خمسة. وبكده يبقى إحنا أوجدنا قيمة س؛ يعني حلينا المعادلة. هنشوف مثال تالت.

في المثال التالت عايزين نوجد قيمة أ، إذا كان تلتاشر زائد أ يساوي عشرين.

بالنسبة للمعادلة اللي عندنا هي تلتاشر زائد أ يساوي عشرين. وإحنا عايزين نوجد قيمة أ. فهنفكر إيه هو العدد اللي لو أضفناه للتلتاشر هيكون الناتج هو عشرين. هنلاقي العدد ده هو سبعة؛ وده لأن تلتاشر زائد سبعة يساوي عشرين. معنى كده أ تساوي سبعة. وهو ده المطلوب.

كده إحنا عرفنا إزاي نحل معادلات الجمع عقليًّا. بعد كده هنشوف إزاي نحل معادلات الطرح عقليًّا. وده هنشوفه من خلال المثال الرابع.

في المثال الرابع عايزين نوجد قيمة ع، إذا كان ع ناقص تلاتة يساوي ستة.

بالنسبة للمعادلة اللي عندنا هي ع ناقص تلاتة يساوي ستة. وإحنا عايزين نوجد قيمة ع. بالتالي هنفكّر إيه هو العدد اللي لو طرحنا منه تلاتة هيكون الناتج ستة. هنلاقي العدد ده هو تسعة؛ وده لأن تسعة ناقص تلاتة يساوي ستة. معنى كده إن ع تساوي تسعة. وبكده يبقى إحنا أوجدنا قيمة ع. هنشوف مثال كمان.

في المثال الخامس عايزين نحل المعادلة تمنتاشر ناقص ص يساوي تلتاشر.

يعني عايزين نوجد قيمة ص. فهنكتب المعادلة اللي عندنا مرة كمان، والمعادلة هي تمنتاشر ناقص ص يساوي تلتاشر. علشان نوجد قيمة ص هنفكر إيه هو العدد اللي هنطرحه من تمنتاشر يكون الناتج تلتاشر. هنلاقي العدد ده هو خمسة؛ وده لأن تمنتاشر ناقص خمسة يساوي تلتاشر. معنى كده إن ص تساوي خمسة. وكده يبقى إحنا جِبنا قيمة ص؛ يعني حلينا المعادلة. بعد كده هنشوف المثال السادس.

في المثال السادس عايزين نوجد قيمة هـ، إذا كان تمنية ناقص هـ يساوي أربعة.

هنكتب المعادلة اللي عندنا مرة كمان. المعادلة هي تمنية ناقص هـ يساوي أربعة. عايزين نوجد قيمة هـ. فهنفكر إيه هو العدد اللي لو طرحناه من تمنية هيكون الناتج هو أربعة. هنلاقي العدد ده هو أربعة؛ وده لأن تمنية ناقص أربعة يساوي أربعة. معنى كده إن هـ تساوي أربعة. وبكده يبقى إحنا أوجدنا قيمة هـ.

بكده يبقى إحنا في الفيديو ده عرفنا إزاي نحل معادلات الجمع والطرح عقليًّا.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.