تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: كتابة النسبة المئوية على صورة كسر وعدد عشري والعكس

أحمد لطفي

يوضح الفيديو كيفية كتابة النسبة المئوية على صورة كسر وعدد عشري والعكس.

١٠:١١

‏نسخة الفيديو النصية

هنتكلم عن كتابة النسبة المئوية على صورة كسر وعدد عشري والعكس، وهنعرف إزاي هنقدر نكتب النسبة المئوية على صورة عدد عشري والعكس، وإزاي هنقدر نكتب الكسر على صورة نسبة مئوية. في البداية الكسر والعدد العشري والنسبة المئوية هي طرق مختلفة لتمثيل نفس النسبة، والنسبة المئوية معناها لكل مية؛ يعني خمسة وأربعين في المية معناها خمسة وأربعين لكل مية. ونقدر نحول من النسبة المئوية للكسر عن طريق خمسة وأربعين في المية هنكتبها في صورة خمسة وأربعين على مية؛ يعني كتبنا نفس العدد في البسط وكتبنا في المقام مية، وهنستخدم نفس الطريقة عشان نقدر نحول من النسبة المئوية للعدد العشري أو العكس.

في البداية هنشوف إزاي هنقدر نكتب النسبة المئوية على صورة عدد عشري، هنقسم على مية ونحذف علامة النسبة المئوية؛ يعني لو عندنا خمسة وأربعين في المية عايزين نكتبها على صورة عدد عشري، أول خطوة هنقسم على مية؛ يعني هنحرك العلامة العشرية خطوتين إلى اليسار، وهنحذف علامة النسبة المئوية، فهيكون عندنا خمسة وأربعين في المية بتساوي خمسة وأربعين من مية. يبقي كده قدرنا نكتب النسبة المئوية على صورة عدد عشري.

لو عندنا مثال بالشكل ده، مطلوب نكتب النسبة المئوية على صورة عدد عشري، عندنا خمسة وتلاتين في المية، فـ خمسة وتلاتين في المية في البداية هنقسمها على مية؛ يعني هنحرك العلامة العشرية خطوتين إلى اليسار، وهنحذف علامة النسبة المئوية، فهيكون عندنا خمسة وتلاتين في المية هتساوي خمسة وتلاتين من مية.

لو عندنا مثال آخر، عايزين نكتب النسبة المئوية مية وخمستاشر في المية على صورة عدد عشري. في البداية عندنا مية وخمستاشر في المية هنقسمها على مية؛ يعني هنحرك العلامة العشرية خطوتين إلى اليسار، وهنحذف علامة النسبة المئوية؛ يعني هيكون عندنا مية وخمستاشر في المية هتساوي واحد وخمستاشر من مية.

يبقي كده عرفنا إزاي نقدر نكتب النسبة المئوية على صورة عدد عشري. لو عايزين نشوف إزاي هنقدر نكتب العدد العشري على صورة نسبة مئوية، هنضرب في مية ونضيف علامة النسبة المئوية؛ يعني لو عندنا خمسة وأربعين من مية وعايزين نكتبها على صورة نسبة مئوية، أول خطوة هنضرب في مية، يعني هنحرك العلامة العشرية خطوتين إلى اليمين، يعني هيساوي خمسة وأربعين، وهنضيف علامة النسبة المئوية، يبقى خمسة وأربعين في المية؛ وبالتالي قدرنا نكتب العدد العشري على صورة نسبة مئوية.

لو عندنا مثال بالشكل ده، مطلوب نكتب العدد العشري على صورة نسبة مئوية. عندنا اتنين من عشرة، عشان نقدر نكتب اتنين من عشرة على صورة نسبة مئوية هنضرب في مية، يعني هنحرك العلامة العشرية خطوتين إلى اليمين، يعني هتساوي عشرين، وهنضع علامة النسبة المئوية، يعني هتساوي عشرين في المية؛ وبالتالي اتنين من عشرة هتساوي عشرين في المية.

لو عندنا مثال آخر بالشكل ده، مطلوب نكتب العدد العشري واحد وستة وستين من مية على صورة نسبة مئوية. أول خطوة هنضرب في مية، يعني هنحرك العلامة العشرية خطوتين إلى اليمين، يعني هيكون عندنا مية ستة وستين، وهنضيف علامة النسبة المئوية، يعني هيكون عندنا مية ستة وستين في المية، ويبقى كده قدرنا نكتب واحد وستة وستين من مية في صورة نسبة مئوية، وكانت بتساوي مية ستة وستين في المية. هنلاحظ إن العدد العشري واحد وستة وستين من مية كان عدد أكبر من واحد؛ وبالتالي هيكافئ نسبة مئوية هتكون أكبر من مية، وهي مية ستة وستين في المية، يبقى لما يكون عندنا العدد العشري أكبر من واحد هيكافئ نسبة مئوية أكبر من مية.

لو عايزين نشوف إزاي هنقدر نكتب الكسر على صورة نسبة مئوية، لو عندنا مثال بالشكل ده، مطلوب نكتب تلاتة على تمنية على صورة نسبة مئوية، نقدر نكتب الكسر على صورة نسبة مئوية بسهولة لو كان المقام عامل من عوامل المية؛ يعني مثلًا لو كان عندنا خمسة وأربعين على مية، نقدر نكتبها في صورة نسبة مئوية عن طريق إننا بنكتب البسط زي ما هو خمسة وأربعين، وبنضيف علامة النسبة المئوية في المية، أو لو كان عندنا اتنين على عشرة هنحولها لكسر مقامه مية، يعني هنضرب في عشرة في البسط والمقام، فهيكون عندنا اتنين في عشرة يساوي عشرين، وعشرة في عشرة هيساوي مية؛ يعني عشرين على مية هتساوي، هنكتب البسط زي ما هو عشرين ونضيف علامة النسبة المئوية، يعني عشرين على مية هتساوي عشرين في المية.

دي الطريقة اللي نقدر نستخدمها لو كان الكسر مقامه عامل من عوامل مية، لكن لو عندنا كسر تلاتة على تمنية، زي اللي مُعطى في السؤال، فمش هنقدر نستخدم نفس الطريقة عشان نكتبه على صورة نسبة مئوية. وعشان نكتبه على صورة نسبة مئوية ممكن نقدر نستخدم طريقة من طريقتين؛ الطريقة الأولى هي استخدام التناسب؛ يعني تلاتة على تمنية عايزين نشوف هيساوي كام على مية، هنرمز للعدد الناقص بالرمز س، هنضرب تلاتة في مية وتمنية في س، فهيكون عندنا تلاتة في مية هيساوي تمنية في س؛ يعني تلتمية هيساوي تمنية س، هنقسم الطرفين على تمنية، يعني سبعة وتلاتين وخمسة من عشرة هتساوي س، وبالتالي بقى عندنا تلاتة على تمنية هيساوي سبعة وتلاتين وخمسة من عشرة على مية، هنكتب سبعة وتلاتين وخمسة من عشرة على مية في صورة نسبة مئوية، يعني هنكتب البسط زي ما هو وهنضيف علامة النسبة المئوية؛ وبالتالي تلاتة على تمنية هتساوي سبعة وتلاتين وخمسة من عشرة في المية، ويبقى قدرنا نستخدم الطريقة الأولى اللي هي طريقة التناسب في كتابة الكسر تلاتة على تمنية على صورة نسبة مئوية.

بالنسبة للطريقة التانية هنكتب الكسر على صورة عدد عشري، وبعدين نكتب العدد العشري على صورة نسبة مئوية، وبالتالي تلاتة على تمنية هيساوي تلتمية خمسة وسبعين من ألف. هنكتب تلتمية خمسة وسبعين من ألف على صورة نسبة مئوية، أول خطوة هنضرب في مية، يعني هنحرك العلامة العشرية خطوتين إلى اليمين، يعني هتساوي سبعة وتلاتين وخمسة من عشرة. تاني خطوة هنضيف علامة النسبة المئوية؛ وبالتالي تلاتة على تمنية هيساوي سبعة وتلاتين وخمسة من عشرة في المية. ويبقى كده قدرنا نحصل على النسبة المئوية للكسر تلاتة على تمنية باستخدام طريقتين؛ أول طريقة هي طريقة التناسب، وتاني طريقة هي عبارة عن كتابة الكسر على صورة عدد عشري، وبعدين كتابة العدد العشري على صورة نسبة مئوية.

لو عندنا مثال آخر بالشكل ده، مطلوب نكتب الكسر اتنين على تلاتة على صورة نسبة مئوية، هنستخدم الطريقة التانية، وهي كتابة الكسر على صورة عدد عشري، وبعدين كتابة العدد العشري على صورة نسبة مئوية. فـ اتنين على تلاتة هتساوي، هنلاحظ إن الكسر اتنين على تلاتة هيساوي عدد عشري غير منتهي؛ وبالتالي هنكتبه على صورة ستمية ستة وستين من ألف، وهنضع دائرة بتعبّر عن عدم انتهاء العدد فوق الستة بالشكل ده. ولو عايزين نكتب العدد العشري على صورة نسبة مئوية، أول خطوة هنضرب في مية، يعني هنحرك العلامة العشرية خطوتين إلى اليمين، يعني هيساوي ستة وستين وستة من عشرة، وهنضع دائرة فوق الستة بالشكل ده، وهنضيف علامة النسبة المئوية؛ وبالتالي العدد اتنين على تلاتة هيساوي ستة وستين وستة من عشرة في المية، والستة غير منتهية، وفي مواقف الحياة اليومية عادةً بتُقرّب النسبة المئوية، وبتكتب في صورة سبعة وستين في المية، أو ستة وستين وسبعة من عشرة في المية. وفي النهاية نكون عرفنا نكتب النسبة المئوية على صورة عدد عشري أو العكس، وعرفنا نكتب الكسر على صورة نسبة مئوية.