فيديو: تحويل الزمن من الثواني إلى الساعات والدقائق

عبِّر بالساعات والدقائق والثواني عن وقت انتهاء أحد الفائزين بسباق الجري والذي أنهى السباق في ٨٥٦‎٩ ثانية.

٠٤:٠٠

‏نسخة الفيديو النصية

عبِّر بالساعات والدقائق والثواني، عن وقت انتهاء أحد الفائزين بسباق الجري. والذي أنهى السباق في تمن آلاف وخمسمية تسعة وستين ثانية.

عارفين إنه الساعة الواحدة بتساوي ستين دقيقة. والدقيقة الواحدة بتساوي ستين ثانية. يبقى علشان نعرف الساعة الواحدة فيها كام ثانية، هنضرب ستين في ستين. هننزّل الصفرين، وبعدين نضرب ستة في ستة، بيساوي ستة وتلاتين. معنى كده إن الساعة الواحدة بتساوي تلات آلاف وستمية ثانية.

ودلوقتي علشان نعرف التمن آلاف خمسمية تسعة وستين ثانية، فيها كام ساعة. هنبدأ نطرح تلات آلاف وستمية منها. تسعة ناقص صفر، تسعة. وستة ناقص صفر، بستة. وخمسة ناقص ستة، مش هينفع. فهنخلّيها خمستاشر، وناخد من التمنية واحد، والتمنية تبقى سبعة. خمستاشر ناقص ستة، بيساوي تسعة. وسبعة ناقص تلاتة، يساوي أربعة. يبقى كده عندنا ساعة واحدة.

طيب لو جرّبنا نطرح منها تلات آلاف وستمية تاني، هل هينفع؟ آه هينفع؛ لأن الأربع آلاف تسعمية تسعة وستين أكبر. فهنطرح دلوقتي أربع آلاف تسعمية تسعة وستين، ناقص تلات آلاف وستمية تاني. تسعة ناقص صفر، بتسعة. وستة ناقص صفر، بستة. وتسعة ناقص ستة، بتلاتة. أربعة ناقص تلاتة، بواحد. كده عندنا ساعتين.

هنقدر نطرح تلات آلاف وستمية من العدد المتبقي تاني؟ لأ مش هينفع؛ لأن العدد المتبقّي أصغر. وهو ألف وتلتمية تسعة وستين. دلوقتي هنبدأ هنطرح منها دقايق. والدقيقة بتساوي ستين ثانية. هنخمّن ممكن نطرح كام دقيقة. ممكن مثلًا نطرح عشر دقايق. عشر دقايق يعني عشرة في ستين، واللي بتساوي … هننزّل الصفرين، وبعدين نضرب واحد في ستة. عشر دقايق بتساوي ستمية ثانية. هنطرح دلوقتي ستمية ثانية.

العدد المتبقي اللي هو ألف تلتمية تسعة وستين، ناقص ستمية. تسعة ناقص صفر، بتسعة. وستة ناقص صفر، بستة. وتلاتة ناقص ستة، مش هينفع. فهناخد الواحد اللي جنبها، وهنطرح تلتاشر ناقص ستة، واللي بتساوي سبعة. وبكده هيكون عندنا عشر دقائق. طب يا ترى هنقدر نطرح من العدد المتبقّي ده، ستمية تانيين؟ آه هنقدر؛ لأن العدد المتبقّي أكبر من الستمية.

سبعمية تسعة وستين ناقص ستمية. تسعة ناقص صفر، بتسعة. وستة ناقص صفر، بستة. وسبعة ناقص ستة، بواحد. يبقى كده عندنا عشر دقايق تانيين طرحناهم. معنى كده إن عدد الدقايق عشرين.

طب يا ترى العدد مية تسعة وستين، نقدر نطرح منه دقايق تاني؟ لو طرحنا منه ستين ثانية … بعد ما طرحنا منها ستين، هنلاقي إن العدد المتبقّي مية وتسعة. ومية وتسعة برضو نقدر نطرح منها ستين كمان. تسعة ناقص صفر، بتسعة. وعشرة ناقص ستة، بأربعة. طرحنا كده ستين مرتين كمان. يعني عدد الدقايق اللي عندنا اتنين وعشرين.

والعدد المتبقّي هو تسعة وأربعين. ولأنه أصغر من الستين، فمش هنقدر نطرح منه ستين تاني. وبكده هيتبقّى عندنا تسعة وأربعين ثانية. وبكده استنتجنا إنه التمن آلاف خمسمية تسعة وستين ثانية؛ بتساوي ساعتين، واتنين وعشرين دقيقة، وتسعة وأربعين ثانية.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.