فيديو: تقريب الأعداد الصحيحة

يوضح الفيديو مفهوم التقريب وأهميته، وكيفية تقريب الأعداد الصحيحة لأقرب عشرة، وأقرب مائة، وأقرب ألف.

١٠:٤٨

‏نسخة الفيديو النصية

تقريب الأعداد الصحيحة.

في الفيديو ده هنعرف إيه هو التقريب. وإيه هي فايدته أو ليه بنتعلمه. وإزّاي نقرب الأعداد الصحيحة.

التقريب هو إيجاد قيمة تقريبية لعدد ما. يعني بنجيب قيمة قريبة من قيمة العدد الأصلي بتاعنا. طيب ليه بنعمل كده؟ بنعمل كده علشان نسهّل قراءة الأعداد. يبقى من فوائد التقريب تسهيل قراءة الأعداد. كمان تسهيل تطبيق العمليات الحسابية عليها. زي إيه العمليات الحسابية دي؟ زي الجمع، والطرح، والضرب، والقسمة، وعمليات تانية كتير.

فمثلًا لو عندنا عدد زي ده. وعُزنا نقراه. هنقول تسعة وتلاتين ألف تمنمية سبعة وتسعين. ولكن لو قرّبناه ممكن نقوله بكل سهولة أربعين ألف. يبقى التقريب بيساعدنا في تسهيل قراءة الأعداد.

تاني حاجة لو عاوزين نجمع مثلًا ميتين سبعة وتسعين زائد ميتين وتلاتة. هنقعد نجمع رقم رقم، ونستخدم إعادة التسمية، وخطوات كتير علشان نوصل للنتيجة. في حين إننا لو استخدمنا التقريب هنقدر نجمعهم بسهولة جدًّا. فلو مثلًا قرّبنا الميتين سبعة وتسعين لتلتمية. والميتين وتلاتة لميتين. وجمعناهم على بعض بسهولة جدًّا هنلاقي إن تلتمية زائد ميتين يساوي خمسمية. يبقى باستخدام التقريب وبسهولة وبمجرد النظر، قدرنا نجمع الأعداد.

ودلوقتي هنتعلّم إزّاي نقرّب الأعداد الصحيحة. لو عندنا عدد زي ده سبعتاشر ألف تلتمية وتمنتاشر، وعاوزين نقربه لأقرب ألف. فيه تلات خطوات بنستخدمهم للتقريب. الخطوة الأولى: بنحط خط تحت الرقم اللي عاوزين نقرب ليه. إحنا هنا عاوزين نقرّب لأقرب ألف، يبقى هنحط خط تحت الرقم الموجود في خانة الألوف. هنبص عَ العدد … آحاد، عشرات، مئات، ألوف. يبقى السبعة هي اللي موجودة في خانة الألوف. حطينا تحتيها خط بالشكل ده.

الخطوة رقم اتنين: نبصّ على الرقم اللي موجود على يمين السبعة. الرقم ده هو اللي هيساعدنا في التقريب. هو اللي بإيده يسيب السبعة زي ما هي أو يضيف عليها واحد ويخليها تمنية. تعالوا نشوف إمتى التلاتة تخلي السبعة زي ما هي ما اتغيرش فيها حاجة. وإمتى تزودها واحد وتخليها تمنية.

لو عندنا جبل زي ده واتخيلنا إن الأرقام واقفة عليه بالشكل ده. من أول الواحد لحدّ التسعة. والرقم اللي إحنا بنقرّب ليه اللي هو في خانة الألوف السبعة موجودة هنا. ونفس العدد ده لما نزوّد عليه واحد موجود هنا. التمنية يعني السبعة موجودة هنا. والتمنية موجودة هنا. وبعدين نحدّد مكان الرقم اللي موجود على يمين السبعة في الجبل. هنلاقيه هنا. فهنتخيل إن فيه واحد بيطلع الجبل من الواحد لحدّ التلاتة. اللي طلع الجبل ده أقرب للسبعة ولّا أقرب للتمنية؟ هنلاحظ إنه أقرب للسبعة. يبقى التلاتة هتخلّي السبعة زي ما هي، ومش هتغير فيها حاجة. يبقى الخطوة رقم اتنين لاحظنا فيها الرقم اللي موجود على يمين السبعة. وقرَّرنا وشُفنا الرقم ده هيعمل إيه في السبعة. هيخليها تمنية ولا هيسيبها سبعة زي ما هي. لاحظنا إن التلاتة سابت السبعة زي ما هي. فما غيرتش فيها حاجة.

الخطوة رقم تلاتة والأخيرة: نحط أصفار مكان باقي الأرقام. يعني مكان التمنية هيكون صفر. ومكان الواحد برضو صفر. ومكان التلاتة برضو صفر. وده يبقى هو ناتج التقريب النهائي سبعتاشر ألف. يبقى كده إحنا قربنا سبعتاشر ألف تلتمية وتمنتاشر لأقرب ألف، فبقت تساوي تقريبًا سبعتاشر ألف.

طيب لو فرضنا إن بدل التلاتة دي فيه ستة. هنحل بنفس الطريقة. هنحط خط تحت الرقم الموجود في خانة الألوف. حطينا خط تحت السبعة. هنلاحظ الرقم الموجود على يمين السبعة. هنلاقيه ستة مش تلاتة. تعالوا نرجع للجبل تاني، ونشوف الستة فين. هنخلي الولد يكمل مشي، وهنوقّفه عند الستة. ونقارن المسافة ما بينه وما بين السبعة والتمنية. هنلاقي إنه أقرب للتمنية. يبقى هنا الستة هتدي السبعة واحد، فتخليها تمنية. وبكده نكون خلّصنا الخطوة رقم اتنين.

الخطوة رقم تلاتة: هي إننا بنحط أصفار مكان باقي الأرقام. فهنحط صفر مكان التمنية. وصفر مكان الواحد. وصفر مكان الستة. طبعًا إحنا بنحط أصفار مكان الأرقام اللي بعد الرقم اللي قرّبناه. يعني الأرقام اللي بعد التمنية مش اللي قبلها. ويبقى كده ناتج تقريب سبعتاشر ألف ستمية وتمنتاشر، هو تمنتاشر ألف.

نستنتج من الجبل ده قاعدة نمشي عليها. لو كان الرقم اللي موجود على يمين الرقم اللي بنقرب ليه أقل من الخمسة؛ يعني واحد، أو اتنين، أو تلاتة، أو أربعة. بنخلي السبعة زي ما هي. أما لو كان خمسة فيما فوق؛ يعني خمسة، أو ستة، أو سبعة، أو تمنية، أو تسعة. بنزوّد على السبعة واحد فنخليها تمنية. يبقى على الأساس ده بنقرّب وبنقرر إذا كنا هنخلي الرقم اللي بنقرّب ليه زي ما هو ولا نزود عليه واحد. في حالة إن كان أقل من الخمسة، بتفضل سبعة زي ما هي. ويبقى ناتج التقريب سبعتاشر ألف. وفي حالة كانت خمسة أو أكبر، بنزوّد واحد فبيكون الناتج تمنية. فبيكون ناتج التقريب تمنتاشر ألف.

وبكده نكون فهمنا كويس إزّاي نقرب الأعداد الصحيحة. ودلوقتي هنقرب العدد ده لأقرب عشرة.

أول حاجة هنقف تحت خانة العشرات ونحط خط. تاني حاجة هنبُصّ على الرقم اللي موجود على يمين خانة العشرات، هنلاقيه تسعة. التسعة أكبر من الخمسة، يبقى هتزود على التلاتة واحد، فهتخليها أربعة. ونشيل التسعة ونحط مكانها صفر. والأعداد اللي قبل الأربعة مش بنعمل فيها حاجة، بننزّلها زي ما هي. يبقى إحنا كده بكل سهولة قدرنا نقرّب العدد ده لأقرب عشرة.

ولو جينا نمثّل التقريب ده على خط الأعداد. ومثلنا أربعة آلاف ميتين تسعة وتلاتين، هنلاقيها موجودة هنا. وهي فعلًا أقرب لأربعة آلاف ميتين وأربعين، عنها من أربعة آلاف ميتين وتلاتين. يبقى ناتج التقريب أربعة آلاف ميتين وأربعين.

آخر مثال هناخده على التقريب: في سباق للعجل. في سباق للعجل كانت المسافة اللي قطعها المنافسين تلات آلاف ستمية تسعة وخمسين متر. عاوزين نعرف المسافة اللي قطعوها بالتقريب لأقرب مائة.

أول خطوة نحط خط تحت الرقم الموجود في خانة المئات وهو الستة. تاني خطوة نبصّ على يمينه. تاني خطوة نبصّ على الرقم اللي جنب الستة، هنلاقيه خمسة. الخمسة بتزوّد الرقم اللي جنبها، فتخلي الستة سبعة. تالت خطوة هي إننا نحط مكان الخمسة صفر، ومكان التسعة صفر. والتلاتة ننزّلها زي ما هي. يبقى ناتج التقريب لأقرب مائة هو تلات آلاف وسبعمية. ده هو مكان التلات آلاف ستمية تسعة وخمسين على خط الأعداد. وهو قريب جدًّا من التلات آلاف وسبعمية، أقرب ليها من التلات آلاف وستمية. وده بيأكد لنا إننا تقريبنا مظبوط.

وبكده في الفيديو ده نكون عرفنا إزّاي نقرّب الأعداد الصحيحة لأقرب عشرة، ولأقرب مية، ولأقرب ألف. وكمان عرفنا فوائد التقريب وليه بنستخدمه.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.