فيديو السؤال: استخدام الجدول التكراري لحساب المنوال لمجموعة بيانات الرياضيات • الصف الأول الإعدادي

نسخة الفيديو النصية

يبيّن الجدول التالي درجات تلاتين تلميذًا في أحد الاختبارات. أوجد درجة المنوال.

دلوقتي إحنا عارفين إن المنوال لمجموعة من القيم بيبقى أكثر القيم دي تكرارًا. دلوقي القيم اللي عندنا هي الممثَّلة بالدرجة. يعني عندنا القيمة الأولى خمس درجات. التانية ست درجات. التالتة سبع درجات. الرابعة تمن درجات. والخامسة تسع درجات. والساتّة عشر درجات. دي القيم المُعطاة. أما عدد الطلاب، فده بيمثّل عدد مرات تكرار القيمة دي. بمعنى إن القيمة اللي هي خمس درجات، عدد مرات تكرارها هو عدد الطلاب اللي حصلوا عليها، اللي هو خمسة. برضو الدرجة اللي هي ست درجات، عدد مرات تكرارها هو عدد الطلاب اللي حصلوا عليها، اللي هو هنا سبعة.

يبقى إحنا دلوقتي عشان نقدر نعرف المنوال، عايزين نشوف أكثر عدد من الطلاب سجّلوا درجة ما. لو قارنّا أعداد الطلاب المُعطاة في الجدول، هنلاقي إن أكبر عدد طلاب مسجل عندنا هو سبع طلاب، وده بيناظر تكرار القيمة اللي هي ستّ درجات. يبقى درجة المنوال اللي هي بتمثّل القيمة الأكثر تكرارًا، هي ست درجات. يبقى المنوال عندنا هو ستة.