فيديو: إيجاد اتحاد مجموعتين بمعلومية المجموعتين

أوجد ﺱ ∪ ﺹ؛ حيث ﺱ = {ﻥ ∈ ﻃ : ﻥ عدد فردي أقل من ٩}، ﺹ = {ﻥ ∈ ﻃ : ﻥ عدد أوَّلي أقل من ١٠}.

٠٣:٠٤

‏نسخة الفيديو النصية

أوجد س اتحاد ص؛ حيث س تساوي مجموعة كل ن تنتمي إلى طـ، حيث ن عدد فردي أقل من تسعة. وَ ص تساوي مجموعة كل ن تنتمي إلى ط؛ حيث ن عدد أولي أقل من عشرة.

هنبتدي نكتب عناصر المجموعة س. هي إيه عناصر المجموعة س؟ هي كل ن بتنتمي إلى ط بتحقق لنا الشرط إنه يبقى عدد فردي، وأقل من تسعة. هنبدأ من الواحد؛ ده أول عدد فردي وأقل من تسعة. يا ترى بعد كده في إيه؟ اتنين عدد زوجي، يبقى مش هيبقى معانا. تلاتة عدد فردي وأقل من تسعة. بعد كده أربعة عدد زوجي، مش هيبقى معانا. خمسة عدد فردي وأقل من تسعة. ستة عدد زوجي، يبقى هناخد اللي بعده. سبعة عدد فردي وأقل من تسعة. يبقى ده هيبقى آخر عدد فردي أقل من تسعة في المجموعة س.

هنبتدي دلوقتي نشوف عناصر المجموعة ص. هي العناصر اللي كلّ منها يعتبر عدد أولي أقل من عشرة. العدد الأولى عشان نفتكر، هو عدد مالهوش أي عوامل غير نفسه، العدد نفسه يعني، والواحد الصحيح.

أول عدد أولي عندنا هنحطه في المجموعة دي هو اتنين. ناخد بالنا إن واحد مش عدد أولي. العدد اللي بعد كده هيبقى تلاتة، ليس له عوامل أخرى غير العدد نفسه والواحد. العدد الأولي اللي بعده هو خمسة، والعدد الأولي اللي يليه اللي هو سبعة. بعد كده هنقفل أقواس المجموعة؛ عشان همّ دول الأعداد الأولية اللي أقل من عشرة.

دلوقتي إحنا مطلوب مننا نوجد س اتحاد ص. يعني اتحاد المجموعتين دول مع بعض. إيه هو الاتحاد؟ الاتحاد بين مجموعتين بيكوّن مجموعة جديدة بتحتوي على كل العناصر الموجودة في المجموعتين مع بعض. بس بدون تكرار العناصر المشتركة.

يعني هنبدأ نبُص على أول عنصر في المجموعة س اللي هو واحد، وهنكتبه عندنا في المجموعة الاتحاد. بعد كده هنشوف العنصر تلاتة، هيبقى عندنا تلاتة مشترك مش هنكرّره، هنكتبه مرة واحدة. العنصر اللي بعد كده اللي هو خمسة، هنلاقيه برضو مشترك، هنكتبه مرة واحدة. والعنصر اللي بعد كده اللي هو سبعة، برضو مشترك بين المجموعتين، فهنكتبه مرة واحدة.

كده المجموعة ص مش باقي فيها عندنا غير عنصر واحد بس، اللي هو اتنين. وكده يبقى أوجدنا المجموعة اللي بتمثّل اتحاد المجموعتين س وَ ص.

ناخد بالنا في المجموعات إن ترتيب العناصر مش بيفرق. يبقى إحنا دلوقتي وصلنا للنتيجة المطلوبة اللي هي س اتحاد ص. واللي هي هتبقى المجموعة: واحد، وتلاتة، وخمسة، وسبعة، واتنين.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.