فيديو: مساحة متوازي الأضلاع

نهال عصمت

يوضِّح الفيديو بالمثال طريقة إيجاد مساحة متوازي الأضلاع، واستنتاج القانون المستخدم لذلك.

٠٣:٠٥

‏نسخة الفيديو النصية

مساحة متوازي الأضلاع.

هنتكلم عن مساحة متوازي الأضلاع، وإزاي نقدر نحسبها. بس في البداية هنفتكر حاجة بسيطة. عايزين نحسب مساحة المستطيل. لو عندنا مستطيل بالشكل ده، وعايزين نحسب مساحته. عندنا ده طول المستطيل، وده العرض. مساحة المستطيل هي الطول في العرض.

بعد ما افتكرنا مساحة المستطيل، هنبدأ نتكلم عن مساحة متوازي الأضلاع. لو عندنا متوازي أضلاع بالشكل ده، وعاوزين نحسب مساحة متوازي الأضلاع اللي موجود قدامنا. هنبدأ نرسم خط عمودي على القاعدة، هنسميه الارتفاع. وهنبدأ ناخد الجزء المظلّل نبدأ ننقله هنا بالشكل ده. هنلاحظ إن بقى عندنا شكل عبارة عن مستطيل، هنحدده بالأزرق بالشكل ده. ومساحة المستطيل كانت عبارة عن الطول في العرض. هنفرض إن الارتفاع هو الطول، وإن العرض هنسميه القاعدة. في الحالة دي نقدر نقول إن مساحة متوازي الأضلاع هتساوي طول القاعدة في الارتفاع.

وبالتالي عشان نحسب مساحة متوازي الأضلاع، لازم نعرف طول القاعدة والارتفاع العمودي عليها. هنبدأ نجيب صفحة جديدة، ونشوف مثال.

لو عندنا متوازي أضلاع بالشكل ده، وعايزين نحسب مساحته. مُعطى إن الارتفاع تلاتة سنتيمتر، وإن طول القاعدة ستة سنتيمتر. يبقى دلوقتي عندنا الارتفاع، وعندنا طول القاعدة. يبقى نقدر نستخدم قانون حساب مساحة متوازي الأضلاع، وهو مساحة متوازي الأضلاع تساوي طول القاعدة في الارتفاع العمودي عليها.

هنبدأ نعوّض في القانون. هتساوي … طول القاعدة بستة سنتيمتر، في الارتفاع العمودي عليها تلاتة سنتيمتر. وبالتالي مساحة متوازي الأضلاع هتساوي تمنتاشر سنتيمتر تربيع. وبكده قدرنا نحسب مساحة متوازي الأضلاع.

يبقى اتكلمنا عن مساحة متوازي الأضلاع، وهي طول القاعدة في الارتفاع العمودي عليها.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.