فيديو: استخدام الأعداد النسبية

إذا ظلَّت الحرارة تنخفض بمعدَّل درجتين في الساعة الواحدة لمدة ٥ ساعات. فأيُّ المقادير الآتية لا يصف التغيُّر في الحرارة؟ [أ] −٢ − ٢ − ٢ − ٢ − ٢ [ب] ٢(−٥) [ج] −٢ + (−٢) + (−٢) + (−٢) + (−٢) [د] ٢(٥)

٠٢:٥٨

‏نسخة الفيديو النصية

إذا ظلَّت الحرارة تنخفض بمعدَّل درجتين في الساعة الواحدة لمدة خمس ساعات. فأيُّ المقادير الآتية لا يصف التغيُّر في الحرارة؟ ومعطى عندنا الاختيارات؛ أ: سالب اتنين، ناقص اتنين، ناقص اتنين، ناقص اتنين، ناقص اتنين. ب: اتنين في سالب خمسة. ج: سالب اتنين، زائد سالب اتنين، زائد سالب اتنين، زائد سالب اتنين، زائد سالب اتنين. د: اتنين في خمسة.

يعني معطى عندنا إن درجة الحرارة بتنخفض بمعدَّل درجتين في الساعة. والحرارة فضلت تنخفض لمدة خمس ساعات. فبالتالي هيبقى المقدار هو اتنين، اللي هو معدَّل الانخفاض، في الساعة الواحدة في خمسة، اللي هو عدد الساعات. وبما إن معطى عندنا في السؤال إن الحرارة بتنخفض، فمعنى كده إن الحرارة بتقلّ درجتين كل ساعة. فبالتالي هيبقى التغيُّر في الحرارة بالسالب. يعني هيبقى المقدار اللي بيصف التغيُّر في الحرارة هو سالب اتنين في خمسة. لكن المطلوب عندنا في السؤال إننا نشوف أيّ المقادير الآتية لا يصف التغيُّر في الحرارة. يعني أنهي اختيار من الاختيارات اللي عندنا هو اللي مش بيوصف المقدار ده.

فلمّا نيجي نشوف أول اختيار عندنا، اللي هو الاختيار أ. هنلاحظ إن هو: سالب اتنين، ناقص اتنين، ناقص اتنين، ناقص اتنين، ناقص اتنين. يعني هنلاحظ إن العدد سالب اتنين متكرّر خمس مرات. وبالتالي هيبقى قيمته هي هي قيمة سالب اتنين في خمسة. فمعنى كده إن الاختيار أ بيصف التغيُّر في الحرارة.

بعد كده هنشوف الاختيار ب. وهنلاحظ إن هو: اتنين في سالب خمسة. واتنين في سالب خمسة بتساوي سالب عشرة. ولو جينا نحسب المقدار اللي عندنا اللي هو سالب اتنين في خمسة، هنلاحظ برضو إن هو بيساوي سالب عشرة. وبما إن هم الاتنين ليهم نفس القيمة. فبالتالي هيبقى الاختيار ب بيصف التغيُّر في الحرارة.

بعد كده هنشوف الاختيار ج. هنلاحظ إن هو: سالب اتنين، زائد سالب اتنين، زائد سالب اتنين، زائد سالب اتنين، زائد سالب اتنين. فمعنى كده إننا بنجمع العدد سالب اتنين خمس مرات. وتكرار جمع العدد سالب اتنين خمس مرات هي هي بتساوي سالب اتنين في خمسة. وبالتالي هيبقى الاختيار ج بيصف التغيُّر في الحرارة.

وآخر اختيار عندنا الاختيار د: اتنين في خمسة. ولو حبِّينا نوجد قيمة المقدار اتنين في خمسة، هنلاقيها بتساوي عشرة. لكن المقدار اللي عندنا قيمته سالب عشرة. وبما إن المقدارين مالهمش نفس القيمة. فبالتالي هيبقى الاختيار د، اللي هو اتنين في خمسة، لا يصف التغيُّر في الحرارة.

فبالتالي هيبقى إجابة السؤال «أي المقادير الآتية لا يصف التغير في الحرارة؟» هو الاختيار د: اتنين في خمسة.

تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.