تستخدم نجوى ملفات تعريف الارتباط لضمان حصولك على أفضل تجربة على موقعنا. معرفة المزيد حول سياسة الخصوصية لدينا.

فيديو: فَهْم الفرق بين الأعداد الأولية وغير الأولية

سوزان فائق

يوضح الفيديو فهم الفرق بين الأعداد الأولية والأعداد غير الأولية.

٠٣:٣٧

‏نسخة الفيديو النصية

في الفيديو ده هنتكلم على فهم الفرق بين الأعداد الأولية وغير الأولية، هنعرف يعني إيه أعداد أولية، ويعني إيه أعداد غير أولية.

عند ضرب عددين أو أكتر فإن كل عدد منهما بيسمى عاملًا لناتج الضرب؛ يعني الواحد في سبعة بيساوي سبعة، ناتج الضرب سبعة، فبنسمي الواحد والسبعة عوامل للعدد سبعة. الاتنين في التلاتة بتساوي ستة، وكمان الواحد في ستة بيساوي ستة، فبنقول إن الاتنين والتلاتة والواحد والستة عوامل العدد ستة؛ ومن هنا بنِعرف معنى العدد الأولي والعدد غير الأولي؛ العدد الأولي هو العدد الذي له عاملان فقط الواحد والعدد نفسه، يعني هو العدد الذي يقبل القسمة على نفسه وعلى الواحد فقط. أما العدد غير الأولي فهو بيبقى عدد أكبر من واحد وبيبقى له أكتر من عاملين؛ السبعة عدد أولي علشان لها عاملان فقط، لكن الستة عدد غير أولي علشان لها أكتر من عاملين.

هناخد أمثلة توضح تعريفات العدد الأولي والعدد غير الأولي. الجدول التالي يوضح عوامل بعض الأعداد، حدد ما إذا كان العدد أولي أو غير أولي. العدد مية وواحد عوامله واحد ومية وواحد، ده يعتبر عدد أولي علشان يقبل القسمة على نفسه وعلى الواحد فقط، وله عاملين اللي هم الواحد والعدد نفسه. المية تلاتة وتلاتين عواملها واحد وسبعة وتسعتاشر ومية تلاتة وتلاتين، أكتر من عاملين، فتبقى عدد غير أولي. المية سبعة وخمسين، الواحد ونفسها فقط هي العوامل، يبقى المية سبعة وخمسين عدد أولي. المية خمسة وأربعين لها أكتر من عاملين، تبقى عدد غير أولي.

ناخد مثال كمان، صنّف كل عدد من الأعداد الآتية إلى أولي وغير أولي: السبعتاشر والاتناشر. السبعتاشر عواملها هي الواحد والسبعتاشر، يبقى عاملين بس اللي هو العدد ونفسه، يبقى عدد أولي. الاتناشر عواملها الواحد والاتنين والتلاتة والأربعة والستة والاتناشر، يبقى أكتر من عاملين، يبقى عدد غير أولي. يبقي كده السبعتاشر عدد أولي، والاتناشر عدد غير أولي.

في الفيديو ده عرفنا الفرق ما بين العدد الأولي والعدد غير الأولي، وعرفنا إن العدد الأولي هو العدد الذي له عاملان فقط، أي بيقبل القسمة على الواحد ونفسه فقط، والعدد غير الأولي هو عدد بيبقى له أكتر من عاملين.